20 قىركۇيەك, 10:38 484 0 جاھان انار لەپەسوۆا

COVID-19: يسپانيادا كارانتين قايتا كۇشەيتىلدى

يسپانيادا كوروناۆيرۋس قايتا ءورشىدى. ىندەتتىڭ تارالۋىن توقتاتۋ ءۇشىن مادريد بيلىگى قالانىڭ بىرنەشە اۋدانىندا شەكتەۋ شارالارىن كۇشەيتۋگە ءماجبۇر بولدى.  

850 مىڭ ادام تۇراتىن اۋدانداردى قامتيتىن شەكتەۋ 2 اپتاعا سوزىلادى. تۇرعىندار ۇيلەرىنەن تەك جۇمىسقا، مەكتەپكە نەمەسە دارىگەرگە قارالۋ ءۇشىن عانا شىعا الادى. ساياباقتار جابىلىپ، دۇكەندەر كەشكى ساعات 22:00-گە دەيىن عانا جۇمىس ىستەيدى. 6 ادامنان كوپ كىسىنىڭ جينالۋىنا تىيىم سالىنادى.

قالا تۇرعىندارى شەكتەۋلەر نەگىزىنەن كەدەي اۋداندارعا ەنگىزىلگەلى جاتقانىن ايتىپ، شاعىمدانۋدا. ولاردىڭ پىكىرىنشە، جاڭا شەكتەۋلەر ەش ناتيجە بەرمەيدى. سەبەبى مەترولاردا ادام كوپ.قوعامدىق كولىككە كۇننىڭ قاي مەزگىلىندە دە جولاۋشى قاراسى ۇزىلمەيدى. سوندىقتان مەترو ۆيرۋستىڭ تارالۋىن ورشىتەتىن نەگىزگى ورىنداردىڭ بىرىنە اينالىپ وتىر دەيدى مادريدتىكتەر.

دجونس حوپكينس ۋنيۆەرسيتەتىنىڭ دەرەگىنشە، پاندەميا باستالعالى يسپانيادا 640 مىڭنان استام ادام كوروناۆيرۋس جۇقتىرعان. ەلدە ىندەت قۇرباندارىنىڭ سانى 30 مىڭنان استى.

ال الەمدە ىندەتكە شالدىققاندار سانى 30,6 ميلليوننان اسىپ جىعىلدى. قاتەرلى ۆيرۋستان 955 841 ادام قايتىس بولدى.

ايتا كەتەيىك، وتكەن تاۋلىكتە قازاقستاندا 63 ادامنان كوروناۆيرۋس انىقتالىپ, ىندەت جۇقتىرعانداردىڭ جالپى سانى 107 262-گە جەتتى. ىندەتتەن 1671 وتانداسىمىز كوز جۇمدى. 102 مىڭعا جۋىق ادام ەمدەلىپ شىقتى.

سوڭعى جاڭالىقتار