19 قىركۇيەك, 19:11 876 0 جاڭالىقتار اسىل تۇمار

«تالدىقورعان-وسكەمەن» جولىنىڭ قۇرىلىس جۇمىسى قالاي ءجۇرىپ جاتىر؟

الماتى وبلىسىنداعى جۇمىس ساپارى بارىسىندا پرەمەر-ءمينيستردىڭ ورىنباسارى رومان سكليار «تالدىقورعان-وسكەمەن» جولىنىڭ قۇرىلىس جۇمىستارىمەن تانىستى.

«تالدىقورعان-وسكەمەن» جولىنىڭ قۇرىلىس-مونتاجداۋ جۇمىسى قارقىندى ءجۇرىپ جاتىر. جۇمىستى جۇرگىزۋگە 1847 ادام مەن 889 تەحنيكا جۇمىلدىرىلعان. كۇندەلىكتى جولدىڭ بىرنەشە قاباتىن توسەۋ مەن تەگىستەۋ جۇمىستارى اتقارىلىپ، اسفالت قاباتىن توسەۋگە ازىرلەنۋدە. سونىمەن قاتار 14 سۋ وتكىزۋ قۇبىرلارى مەن 23 كوپىر جۇمىسىنىڭ 50% اياقتالدى.

«ءۇشارال-دوستىق» جولى بويىنشا ايتار بولساق، جولدىڭ 60 شاقىرىمىن «قىران» جشس سالىپ جاتىر. نىساندا 265 ادام جۇمىس ىستەيدى. 144 ارنايى تەحنيكا تارتىلعان. بۇگىندە جولدى تەگىستەۋ ماقساتىندا 1170 مىڭ تەكشە مەتردەن استام تاس-توپىراق جول قاباتتارى توسەلىپ، تەگىستەلدى. جول قۇرىلىسىنا قاجەتتى ماتەريالداردىڭ قاجەتتى قورى ازىرلەندى.

بيىل جىل سوڭىنا دەيىن جولدىڭ 30 شاقىرىمىن قولدانىسقا بەرۋ جوسپارلانىپ وتىر. كولىك قاتىناسىن ۇزبەۋ ماقساتىندا 21 شاقىرىمدىق ۋاقىتشا اينالما جول سالىندى. وسى جولدىڭ 60-120 شاقىرىمى ارالىعىنداعى جول قۇرىلىسىن «ابك-اۆتودور نس» جشس جۇرگىزۋدە. قۇرىلىس جۇمىستارىنا 115 تەحنيكا جانە 239 ادام جۇمىلدىرىلعان. ۋاقىتشا پايدالانۋ ءۇشىن 20 شاقىرىمدىق اينالما جول سالىنعان. قوسىمشا 10 شاقىرىم اينالما جول سالۋ جۇمىستارى جۇرگىزىلۋدە. قازىرگى ۋاقىتتا جول بويىنداعى جەرلەردى راسىمدەۋ مەن كارەرلەردى پايدالانۋعا رۇقسات بەرەتىن قۇجاتتار دايىندالىپ جاتىر. 27 سۋ وتكىزۋ قۇبىرلارىنىڭ تەمىر-بەتون قۇرىلعىلارى ورناتىلدى.

جولدىڭ 120-180 شاقىرىمىندا بيىل 1 تامىزدا اينالما جول سالۋ جۇمىستارى باستالدى.

ۆيتسە-پرەمەر ر.سكليار جول قۇرىلىسى جۇمىستارىن ساپالى جۇرگىزىپ، بەلگىلەنگەن مەرزىمدە اياقتاۋدى تاپسىردى.

سوڭعى جاڭالىقتار