18 قىركۇيەك, 21:32 485 0 جاڭالىقتار اسىل تۇمار

ەلباسى اقتاۋدا حالىقارالىق تۋريستىك حابتىڭ تۇساۋكەسەرىنە قاتىستى

قازاقستاننىڭ تۇڭعىش پرەزيدەنتى نۇرسۇلتان نازارباەۆ ماڭعىستاۋ وبلىسىنا جۇمىس ساپارىمەن باردى. ەلباسى اقتاۋ قالاسىندا حالىقارالىق تۋريستىك حابتىڭ تۇساۋكەسەرىنە قاتىستى.

تۋريستىك حابتى دامىتۋ جوباسى كاسپي تەڭىزى جاعالاۋىن قامتىماق.
ن.نازارباەۆ وتاندىق تۋريزم سالاسىن وركەندەتۋدىڭ ماڭىزدىلىعىنا توقتالا كەلە، قازاقستان بىرەگەي تابيعاتقا، سونىمەن قاتار تاريحي-مادەني ماڭىزداعى كيەلى ورىندارعا، ۇلى جىبەك جولىنىڭ نىساندارىنا، قۇندى ارحەولوگيالىق ەسكەرتكىشتەرگە يە ەكەنىن اتاپ ءوتتى.

بۇل ەلىمىزدە ۇيىمداسقان دەمالىستىڭ كەز كەلگەن ءتۇرىن ورگە باستىرۋعا مۇمكىندىك بەرەدى.

– ءتۋريزمدى دامىتۋ مەملەكەتتىك باعدارلاماسى اياسىندا تۋريستىك الەۋەتكە تالداۋ جۇرگىزىلدى جانە بارىنشا كورنەكتى نىساندار مەن ماڭىزدى وڭىرلەر انىقتالدى. ولاردى ىرىكتەۋ كەزىندە ساياحاتشىلار ءۇشىن «ماگنيت» قىزمەتىن اتقارار الەۋەتى باستى شارت بولدى. وسى باعىتتاعى جەتەكشى وڭىرلەر قاتارىنا الاكول، بالقاش كولدەرى، ششۋچينسك-بۋراباي كۋرورتتىق ايماعى، تۇركىستان قالاسى جانە باسقاسى قاتارىندا ماڭعىستاۋ دا كىرىپ وتىر، – دەدى تۇڭعىش پرەزيدەنت.

كاسپي تەڭىزى جاعاسىندا مەملەكەتىمىزدە تۇڭعىش رەت «بارلىعى قوسىلعان» كونتسەپتسياسى نەگىزىندە وتباسىلىق دەمالىسقا ارنالعان قوناقۇي كەشەنىن تۇرعىزعان شەتەلدىك ينۆەستوردىڭ كەلۋى – وسى وڭىردەگى ەلەۋلى وقيعاعا اينالدى.
Rixos قوناقۇيلەر جەلىسىنىڭ باسقارما توراعاسى ف.تاميندجە Rixos Water World Aktau اتتى ليۋكس سىنىبىنداعى بەس جۇلدىزدى كۋرورتتىق وتەلدى دامىتۋ جوباسىن تانىستىردى. سونداي-اق قازاقستاندىق جانە شەتەلدىك ينۆەستورلاردى تارتۋ ارقىلى تۋريستىك كلاستەردى ارى قاراي كەڭەيتۋدىڭ پەرسپەكتيۆاسى تۋرالى اڭگىمەلەدى.

ەلباسىنىڭ بايلامىنشا، بۇل – كاسپيدە كەڭ اۋقىمدى حالىقارالىق تۋريستىك حابتى قۇرۋ جولىندا جاسالعان تەك ءبىرىنشى قادام. وندا ەندى قازاقستاندىقتار دا، سونىمەن بىرگە شەتەلدىك قوناقتار دا جوعارى دارەجەدە دەمالا الادى.

بۇعان قوسا، ن.نازارباەۆ تەڭىز جاعالاۋىنداعى كۋرورتتىق ايماعىمىز جاڭا جۇمىس ورىندارىن اشاتىنىنا باسا ءمان بەردى. ءىس-شارا بارىسىندا وڭىردە وسى كلاستەردى دامىتۋ شامامەن 50 مىڭ جۇمىس ورنىن قۇرۋعا، سونداي-اق جوبانى جۇزەگە اسىرۋعا شامامەن 2 ميلليارد دوللار تارتۋعا مۇمكىندىك بەرەتىنىنە ەكپىن ءتۇسىرىلدى.

– تاۋەلسىزدىك جىلدارى كوپ ءىس تىندىردىق. بۇرىن الەم بىلمەگەن قازاقستان بۇگىندە دۇنيەجۇزى كارتاسىندا لايىقتى ورىن الدى. ءبىز جاڭا استانانى تۇرعىزدىق. ول وزگە وڭىرلەر مەن وبلىس ورتالىقتارىنىڭ وركەندەۋىنە باعدار بەرىپ كەلەدى. مەن الدا بارشا مۇسىلمان ءۇشىن كيەلى مەكەن – تۇركىستان قالاسىنا ساپارلاۋدى جوسپارلاپ وتىرمىن. قازاق حاندىعىنىڭ وسى بايىرعى استاناسى سوڭعى ۋاقىتتا كەرەمەت تۇرلەندى جانە قازىر ۇلكەن تۋريستىك الەۋەتكە يە، – دەدى قازاقستاننىڭ تۇڭعىش پرەزيدەنتى.

ول ءتۋريزمدى نىسانالى تۇردە وركەندەتۋگە باعىتتالعان ناقتى قادامدار تەك جەكەلەگەن وڭىرلەردىڭ عانا ەمەس، سونداي-اق تۇتاستاي العاندا بۇكىل رەسپۋبليكانىڭ ەكونوميكاسىنا زور تيىمدىلىك، وڭدى سەرپىن بەرەتىنىنە نازار اۋدارتتى.

تۇساۋكەسەر سوڭىندا ەلباسى Rixos Water World Aktau قوناقۇي كەشەنىن ارالاپ كوردى.

ءىس-شاراعا ونلاين-كونفەرەنتسيا فورماتىندا بىرقاتار وتاندىق جانە شەتەلدىك ينۆەستورلار قاتىستى. ولاردىڭ اراسىندا ACCOR كومپانياسىنىڭ ەۋروپا، تاياۋ شىعىس جانە افريكا وڭىرىندە ليۋكس سىنىپتى وتەلدەردى دامىتۋ جونىندەگى ءبىرىنشى ۆيتسە-پرەزيدەنتى ف.بودەن، ÖG Holding باسقارما توراعاسى و.گيۋر، وتاندىق BI Group قۇرىلىس حولدينگىنىڭ ديرەكتورلار كەڭەسىنىڭ توراعاسى ا.راقىمباەۆ، «بازيس-ا» كورپوراتسياسىنىڭ ديرەكتورلار كەڭەسىنىڭ توراعاسى ا.بەلوۆيچ بولدى.

سوڭعى جاڭالىقتار