18 قىركۇيەك, 19:35 417 0 جاڭالىقتار اسىل تۇمار

«Nur Otan» پارتياسى بىرقاتار شەنەۋنىكتى جاۋاپقا تارتۋدى تالاپ ەتتى

«Nur Otan» پارتياسىنىڭ سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەسىنىڭ جۇمىس توبى اقمولا جانە الماتى وبلىستارىنىڭ وتكەن 2,5 جىلداعى سىبايلاس جەمقورلىققا قارسى قىزمەتىنىڭ جۇمىستارىن زەردەلەدى.

وتىرىس بارىسىندا كەڭەس توراعاسى، «Nur Otan» پارتياسىنان ءماجىلىس دەپۋتاتى ومارحان وكسىكباەۆ مەملەكەت باسشىسىنىڭ جولداۋدا ايتقان تاپسىرماسىنا سايكەس سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەستىڭ (سجقىرك) جۇمىسى كۇشەيتىلەتىنىن اتاپ ءوتتى. بۇل رەتتە سىبايلاس جەمقورلىق فاكتورلارىن انىقتاۋ ءۇشىن نورماتيۆتىك اكتىلەرگە جانە مەملەكەتتىك ورگاندار مەن كۆازيمەملەكەتتىك سەكتورلارداعى جۇمىس پروتسەستەرىنە سىبايلاس جەمقورلىققا قارسى تالداۋ جاساۋعا باسىمدىق بەرىلمەك.

«كوروناۆيرۋستىق ينفەكتسيا جاعدايىندا مەملەكەتتىك ورگاندارعا ازاماتتاردىڭ ەكونوميكالىق جانە الەۋمەتتىك ماسەلەلەرىن شەشۋ بويىنشا ۇلكەن جاۋاپكەرشىلىك جۇكتەلىپ وتىر. الايدا، وسىنداي كۇردەلى كەزەڭگە قاراماستان، كەيبىر مەملەكەتتىك قىزمەتكەرلەر قىزمەت بابىن جەكە مۇددەسى ءۇشىن پايدالانعان»، - دەدى ومارحان وكسىكباەۆ.

پارتيالىقتاردىڭ پىكىرىنشە، نەگىزگى سەبەپ – وبلىس باسشىلىعىنىڭ سىبايلاس جەمقورلىق قۇقىق بۇزۋشىلىقتاردىڭ الدىن-الۋ بويىنشا جەتكىلىكتى جۇمىس اتقارماۋى. سونداي-اق، سىبايلاس جەمقورلىق تاۋەكەلدەرىن تالداۋعا قاتىستى دا سۇراقتار بار.

كەڭەس مۇشەسى، «Nur Otan» پارتياسىنان ءماجىلىس دەپۋتاتى ءابدىماناپ بەكتۇرعانوۆ اقمولا وبلىسىنداعى ورەسكەل كادرلىق جونسىزدىكتەرگە باسا نازار اۋداردى.

«دەنە شىنىقتىرۋ جانە سپورت باسقارماسىندا، سونداي-اق «قازاۆتوجول» اق فيليالىندا قىلمىستىق تەرىس قىلىق جاساعان جانە باسشىلىق لاۋازىمداردى اتقارۋ قۇقىعى جوق باسشىلاردى قىزمەتكە قابىلداۋ فاكتىلەرى انىقتالدى. سونعى قابىلدانعاندارى قىزمەتىنەن بوساتىلدى، بىراق بۇعان قالاي جول بەرىلدى دەگەن سۇراق تۋىنداپ تۇر»،- دەدى ءابدىماناپ بەكتۇرعانوۆ.

ال، كوكشەتاۋ قالاسىندا اكىمدىك تۇرعىن اۋدانداردىڭ بىرىنە تيەسىلى ءۇيدىڭ اۋماعىنا ساۋدا ورتالىعىن سالۋعا رۇقسات بەرگەن. جەرگىلىكتى تۇرعىندار ءتۇرلى ورىندارعا شاعىم تۇسىرگەنمەن، ناتيجەسى بولماعان. نۇروتاندىق جۇمىس توبى كەلگەننەن كەيىن عانا قۇرىلىس توقتاتىلعان.

«اكىمدىككە وسى جەر ۋچاسكەسىن ءبولۋ تۋرالى شەشىمنىڭ كۇشىن جويۋدى جانە قۇرىلىس سالۋشىعا بالامالى ۋچاسكەنى ۇسىنۋ مۇمكىندىگىن قاراستىرۋ ۇسىنىلدى. مۇنداي ماسەلەلەردى پارتيانىڭ ورتالىق اپپاراتى وكىلدەرىنىڭ كەلۋىن كۇتپەي-اق، جەرگىلىكتى جەرلەردە جەدەل شەشۋگە بولاتىن ەدى»، - دەپ سانايدى ءابدىماناپ بەكتۇرعانوۆ.

جالپى، جوعارىدا كورسەتىلگەن مەرزىمدە اقمولا وبلىسىندا 376 سىبايلاس جەمقورلىق قىلمىس تىركەلگەن، ولاردىڭ باسىم بولىگىن جەرگىلىكتى اتقارۋشى ورگانداردىڭ قىزمەتكەرلەرى جاساعان.

الماتى وبلىسىنىڭ سىبايلاس جەمقورلىققا قارسى كۇرەس جۇمىسىنا قاتىستى دا شاعىمدار كوپ. بۇل رەتتە كەڭەس مۇشەسى، سەنات دەپۋتاتى مانسۇرحان ماحامبەتوۆ ەڭبەكشىقازاق اۋدانىنداعى بيۋدجەت قاراجاتىنا سالعىرت قاراۋشىلىققا اشۋلاندى.

«اۋدان اكىمدىگى قىربالتاباي اۋىلىندا ينجەنەرلىك-كوممۋنيكاتسيالىق جەلىلەردىڭ قۇرىلىسىنا 485 ملن. تەڭگەنى يگەرگەن. الايدا، اكىمدىك جەكە تۇرعىن ءۇي قۇرىلىسى ءۇشىن ءتيىستى ۋچاسكەنى تاڭداۋدى دۇرىس جۇرگىزبەگەندىكتەن، ءبىر جارىم جىل ىشىندە قاراستىرىلعان 300 ۋچاسكەنىڭ ەشقايسىسى بەرىلمەگەن. جەلىلەردى پايدالانباۋ ولاردىڭ كۇيرەۋىنە سوقتىرادى، ال جوعارى ۆولتتى كابەلدەر ۇرلانعان. وسىلايشا، كەلەشەگى جوق جوبا قارجىلاندىرىلىپ، سالىق تولەۋشىلەردىڭ اقشاسى جەلگە ۇشقان»، - دەدى مانسۇرحان ماحامبەتوۆ.

جالپى، الماتى وبلىسىندا 2018 جىلدان باستاپ 317 سىبايلاس جەمقورلىق قىلمىسى تىركەلىپ، ءار ءتۇرلى دەڭگەيدەگى 56 باسشى قىلمىستىق جاۋاپكەرشىلىككە تارتىلعان.

سىبايلاس جەمقورلىققا قارسى ءىس-قيمىل جونىندەگى رەسپۋبليكالىق قوعامدىق كەڭەستىڭ وتىرىسىن قورىتىندىلاي كەلە، ومارحان وكسىكباەۆ اقمولا جانە الماتى وبلىستارىنىڭ بىرقاتار شەنەۋنىكتەرىن سىبايلاس جەمقورلىققا قارسى جۇمىستى دۇرىس اتقارماعانى جانە قوعامدا ونداي كەلەڭسىزدىككە توزبەۋشىلىكتى قالىپتاستىرماعانى ءۇشىن پارتيالىق جاۋاپكەرشىلىككە تارتۋدى تاپسىردى.

اتاپ ايتقاندا، كەڭەس اقمولا وبلىسى اكىمىنىڭ ورىنباسارى عالىمجان ابدىحالىقوۆتى، مەملەكەتتىك ساتىپ الۋ جانە كوممۋنالدىق مەنشىك باسقارماسىنىڭ باسشىسى مۇرات راحىمبەرگەنوۆتى، مەملەكەتتىك ساۋلەت-قۇرىلىس باقىلاۋ باسقارماسى باسشىسىنىڭ مىندەتىن اتقارۋشى باۋىرجان ەرنازاروۆتى پارتيالىق جاۋاپكەرشىلىككە تارتۋدى قاراستىرۋدى ۇسىندى.

سونىمەن قاتار الماتى وبلىسى جەر قاتىناستارى باسقارماسىنىڭ باسشىسى ءسابيت سادۋاقاسوۆ پەن وبلىستىق جەر قاتىناستارى باسقارماسىنىڭ باسشىسى ەرمەك امىرعاليەۆتى جاۋاپقا تارتۋ ۇسىنىلدى.

سوڭعى جاڭالىقتار