18 قىركۇيەك, 14:55 444 0 جاڭالىقتار اسىل تۇمار

2021 جىلعى پرەزيدەنتتىك جاستار كادرلىق رەزەرۆىنە ىرىكتەۋ قالاي جۇرگىزىلەدى؟

قر مەملەكەتتىك قىزمەت ىستەرى اگەنتتىگىنىڭ توراعاسى انار جايىلعانوۆا 2021 جىلعى پرەزيدەنتتىك جاستار كادرلىق رەزەرۆىنە ىرىكتەۋ قالاي جۇرگىزىلەتىنىن ايتىپ بەردى.

«مەملەكەت باسشىسى جۇكتەگەن تاعى ءبىر ماڭىزدى مىندەتتىڭ ءبىرى – 2021 جىلى پرەزيدەنتتىك جاستار كادرلىق رەزەرۆىن وتكىزۋ. قازىرگى ۋاقىتتا ءبىز ونىڭ مەحانيزمى بويىنشا جۇمىس جۇرگىزىپ جاتىرمىز. بۇل جولى شاعىن عانا مەنەدجەرلەر مەن كاسىبي مامانداردى ىرىكتەپ الۋ جوسپارلانىپ وتىر»، – دەدى انار جايىلعانوۆا وكق-دا وتكەن ءباسپاسوز ءماسليحاتىندا.

اگەنتتىك باسشىسى العاش رەت پرەزيدەنتتىك جاستار كادرلىق رەزەرۆىنە ىرىكتەۋ جۇمىسى 2019 جىلى وتكىزىلگەنىن ەسكە سالدى.

«پرەزيدەنتتىڭ جاستار كادر رەزەرۆىنە ىرىكتەۋدىڭ ناتيجەسىندە مىقتى دەگەن 300 ۇمىتكەر تاڭداپ الىندى. بۇگىنگە دەيىن ونىڭ 153-ءى جۇمىسقا ورنالاسقان. ولاردىڭ ىشىندە ونى - ساياسي قىزمەتكە، «ا» كورپۋسىنا ەكەۋى، قالعانى جەكە جانە كۆازيمەملەكەتتىك سەكتورداعى جۇمىسقا ورنالاستى. 2021 جىلعى ىرىكتەۋدىڭ 2019 جىلعى ىرىكتەۋدەن باستى ايىرماشىلىعى – ناقتىلىققا نەگىزدەلەدى. ياعني، ىرىكتەۋ مەملەكەتتىك ورگانداردىڭ شىنايى قاجەتتىلىگىنە بايلانىستى وتكىزىلەدى»، – دەدى ول.

انار جايىلعانوۆا ودان بولەك تاپسىرمانى ساپالى ورىنداۋ ءۇشىن ىرىكتەۋ جۇمىسىنا قاجەتتىلىگى بار مەملەكەتتىك ورگانداردىڭ ءوزى تارتىلاتىنىن جەتكىزدى.

«قازىرگى ۋاقىتتا مەملەكەتتىك ورگاندارعا قاجەتتىلىگى جونىندە ۇسىنىستاردى جىبەرۋ بويىنشا حاتتار جولداندى. ۇمىتكەرلەردى ىرىكتەۋ كەلەسى كەزەڭدەردەن تۇرادى: ءبىرىنشىسى – قاتىسۋشىلاردىڭ قۇجاتتارىن قابىلداۋ. بۇل جۇمىس اۆتوماتتاندىرىلعان ونلاين-فورماتتا جۇرگىزىلەدى. سونداي-اق قاشىقتان الىناتىن تەستىلەۋ ۇمىتكەرلەردىڭ كۇردەلى اقپاراتتارمەن جۇمىس جۇرگىزۋ قابىلەتىن ايقىنداپ، ولاردىڭ اناليتيكالىق جانە سىني پايىمداۋىنا انىقتاۋعا مۇمكىندىك بەرەدى. ۇمىتكەرلەر بۇل جەردە ءوز مۇمكىندىكتەرى مەن قابىلەتىن دالەلدەۋى ءتيىس. كەلەسى كەزەڭ – كەيستىك مىندەتتەردى ورىنداۋ. بۇل كەزەڭدە ۇمىتكەرلەر جازباشا جانە كوممۋنيكاتسيالىق داعدىلارىن، سونداي-اق ناقتى ءبىر سالاداعى ءبىلىم دەڭگەيىن، سىني ويلاي ءبىلۋ دەڭگەيىن كورسەتەدى. ولاردىڭ جۇمىسىن ناقتى سالاداعى ساراپشىلار باعالايدى»، – دەدى ول.

سوڭعى جاڭالىقتار