17 قىركۇيەك, 19:20 486 0 ەكونوميكا انار لەپەسوۆا

ەلوردادا گاز ءتاريفى بەكىتىلدى

نۇر-سۇلتاندا گازدىڭ ءتاريفى تەكشە مەترىنە 45 تەڭگە بولىپ بەلگىلەندى. بۇل جونىندە قالا اكىمى التاي كولگىنوۆ قوعامدىق كەڭەس مۇشەلەرىمەن كەزدەسۋىندە مالىمدەدى. 

"بۇعان دەيىن گازدىڭ ءبىر تەكشە مەترىنىڭ باعاسى 60 تەڭگە دەپ بەلگىلەنۋى ءتيىس بولعان. سولاي دەسەك تە، اكىمدىك ورتالىق ۋاكىلەتتى ورگاندارمەن بىرلەسىپ، ءتاريفتى تومەندەتۋ جونىندەگى وراسان زور جۇمىستار اتقاردى. وسىلايشا گازدىڭ تەكشە مەترىنىڭ باعاسى 45 تەڭگەگە دەيىن تومەندەتىلدى", – دەدى كولگىنوۆ.

قازىرگى كەزدە نۇر-سۇلتانداعى تۇرعىن ءۇي الابتارىن گازبەن قامتاماسىز ەتۋدە ىشكى جەلىلىك جۇمىستارى جۇرگىزىلۋدە.

كوممۋنالدىق مەكەمە قىزمەتكەرلەرى تۇرعىن ۇيلەرگە گاز قۇبىرىن جۇرگىزۋدە

اتاپ ايتقاندا، وندىرىسشىلەر مەن كوكتال-2-دە – 95%، ال كوكتال-1 تۇرعىن الابىنداعى قۇرىلىس جۇمىستارى 80 پروتسەنتكە ورىندالدى. سونداي-اق، "اگروقالاشىق" پەن وڭتۇستىك-شىعىس تۇرعىن الابىنداعى جۇمىستار وسى شامادا جۇرگىزىلسە، تەمىرجولشىلار كەنتىندەگى گاز تاراتۋ جەلىلەرىنىڭ جوسپارى 100 پروتسەنت جۇزەگە اسىرىلدى.

"اعىمداعى جىلىتۋ ماۋسىمىندا وسى اۋداندارداعى تۇرعىن ۇيلەردى، سونىڭ ىشىندە اگروقالاشىقتاعى كەيبىر ۇيلەردى گازبەن جىلىتۋعا بولادى. ول ءۇشىن تۇرعىندار ۇيلەردى گازعا قوسۋدىڭ تەحنيكالىق شارتتارىن الۋ ءۇشىن فرونت-كەڭسەلەرگە حابارلاسۋى كەرەك. جەكە سەكتور تۇرعىندارىنا ەسەپتەگىش قۇرالدارى اكىمدىك تاراپىنان تەگىن ۇسىنىلادى", – دەپ اتاپ ءوتتى كولگىنوۆ.

ايتا كەتەيىك، بيىلعى جىلى جەو-1 مەن جەو-2-دەگى بىرقاتار قازاندىقتاردى گازعا اۋىستىرۋ جوسپارلانىپ وتىر. گازداندىرۋ پروتسەسى ءۇش كەزەڭگە بولىنەدى. بارلىق تۇرعىن اۋداندار كەزەڭ-كەزەڭىمەن قوسىلادى.

 

سوڭعى جاڭالىقتار