17 قىركۇيەك, 16:50 353 0 جاڭالىقتار انار لەپەسوۆا

تارازدا «Biz birgemiz» مونۋمەنتى بوي كوتەرەدى

جامبىل وبلىسىنىڭ اكىمى بەردىبەك ساپارباەۆتىڭ توراعالىعىمەن وتكەن تاراز قالاسى قۇرىلىسى كەڭەسىنىڭ كەزەكتى وتىرىسىندا تاراز قالاسىن اباتتاندىرۋ بويىنشا جوبالار تالقىلاندى، دەپ حابارلايدى  وبلىس اكىمدىگىنىڭ رەسمي سايتى.

جىل سايىن وبلىس ورتالىعىنداعى كورنەكى ورىندار قاتارى ارتىپ كەلەدى. ونىڭ ايقىن ءبىر مىسالى - «تەكتۇرماس» ەتنو-تاريحي كەشەنى. سوڭعى ۋاقىتتا اۋماق ايتارلىقتاي وزگەرىپ شىعا كەلدى. ايماقتىڭ تۇكپىر-تۇكپىرىنەن تۇرعىندار سوندا اعىلۋدا، شاھار قوناقتارى دا سول جەردى كورىپ قايتۋدى ماقسات ەتەدى.

«تەكتۇرماس» اۋماعىنداعى قۇرىلىس جۇمىستارى قازىر دە ءجۇرىپ جاتىر. ساۋلەت جانە قالا قۇرىلىسى باسقارماسىنىڭ باسشىسى ارمان ابدەشوۆ سول ماڭايداعى جاعاجاي مەن جاساندى سارقىراما جوباسى تۋرالى باياندادى. جوسپار بويىنشا ونداعى دەمالۋشىلار ءۇشىن قويىلاتىن ورىندىقتار ۇلتتىق ناقىشتا بەزەندىرىلەتىن بولادى.

«Biz birgemiz» مونۋمەنتى دە شاھاردىڭ ماقتانىشىنا اينالۋى ءتيىس. جوبا ءوز قۇرىلىمىمەن ەلدەگى بىرلىك پەن تاتۋلىقتى اسپەتتەيدى.

ايتا كەتەيىك، مونۋمەنت كوروناۆيرۋسپەن كۇرەسكەن ازاماتتارعا ارناپ ورناتىلىپ جاتىر. كوپفيگۋرالى كومپوزيتسيانىڭ قاق ورتاسىندا جەر شارى ورنالاسقان. ءتۇرلى ماماندىق يەلەرىنىڭ مۇسىندەرى ونى قول ۇستاسا اينالدىرىپ تۇر. كەشەن دە، مونۋمەنت تە ۇلتتىق ناقىشتا ورىندالادى.

وبلىس اكىمىنە سونداي-اق، ونەر ءۇيى، جاستار ورتالىعى، اسا ىقشاماۋدانىندا سالىناتىن اللەيالار جوبالارى دا كورسەتىلدى. جەرگىلىكتى ساۋلەتشىلەر جوسپاردى وزگە قالالارداعى تاجىريبەگە قاراپ ازىرلەگەن ەكەن.

«ءار عيمارات بىرەگەي بولۋى كەرەك. بىراق ءوزارا ۇيلەسىم دە ەسكەرىلگەنى ءجون»،- دەپ ەسكەرتتى ايماق باسشىسى.

ارمان ابدەشوۆ اباي مەن جامبىل داڭعىلدارى ءبىرشاما وزگەرەتىنىن جەتكىزدى.

«ەڭ ءبىرىنشى كەزەكتە ساۋاتسىز جارناما ىلىنگەن قالقاندار، بيلبوردتاردى جويۋ كەرەك. رۇقسات ەتىلمەگەن جەردە نىسان سالىپ جاتقان كاسىپكەرلەردى جاۋاپكەرشىلىككە تارتۋ كەرەك»، - دەپ تالاپ قويدى بەردىبەك ساپارباەۆ. باسقوسۋ بارىسىندا گرودەكوۆو مەن شۋ قالاسىن اباتتاندىرۋ ماسەلەلەرى دە قارالدى.

 

سوڭعى جاڭالىقتار