17 قىركۇيەك, 14:48 459 0 ايماق انار لەپەسوۆا

سقو-دا قۇس تۇماۋى تاراعان 10 ەلدىمەكەن كارانتينگە جابىلدى

سولتۇستىك قازاقستان وبلىسىندا قۇس تۇماۋىنىڭ تارالۋىنا بايلانىستى 7 اۋداننىڭ 10 ەلدىمەكەنى كارانتينگە جابىلدى.

سقو اۋماعىندا قۇس تۇماۋىنىڭ انىقتالۋىنا بايلانىستى ءتيىستى ۆەدومستۆو باسشىلارى مەن وكىلدەرىنىڭ قاتىسۋىمەن بريفينگ ءوتتى، دەپ حابارلايدى قازاقپارات.

زەرتحانا قورىتىندىسىنا سايكەس اۋرۋدىڭ تارالۋىنا جول بەرمەۋ ماقساتىندا وبلىستاعى تيميريازەۆ، تايىنشا، جامبىل، قىزىلجار، شال اقىن، ع.مۇسىرەپوۆ، م.جۇماباەۆ - 7 اۋداننىڭ 10 ەلدىمەكەنى كارانتينگە جابىلادى.

«كارانتين تالابىنا ساي بۇل ەلدىمەكەندەرگە كىرىپ-شىعۋ شەكتەلەدى. كىرىپ-شىققان كولىكتەردى زالالسىزداندىرۋ ءۇشىن كىرەبەرىستەردە دەزينفەكتسيالىق توسقاۋىلدار قويىلادى. حالىقتىڭ تىرشىلىگىن قامتاماسىز ەتەتىن ۇيىمداردىڭ، قۇقىق قورعاۋ، مەديتسينالىق جانە ۆەتەرينارلىق قىزمەتتەردىڭ كولىكتەرى ۆەتەرينارلىق قاۋىپسىزدىكتى ساقتاي وتىرا كەدەرگىسىز جۇرەدى. كارانتيندىك ايماقتاردان ءتىرى قۇستاردى، قۇس ونىمدەرىن، قاۋىرسىنى مەن مامىعىن، جەمازىقتى جانە قۇس شارۋاشىلىعىندا قولدانىلعان قوندىرعىلاردى شىعارۋعا تىيىم سالىنادى»، - دەيدى سقو ۆەتەريناريا باسقارماسىنىڭ باسشىسى بەرىك ءالجانوۆ.

رەسپۋبليكالىق بيۋدجەت ەسەبىنەن قۇسى قىرىلعان تۇرعىندارعا وتەماقى بەرىلەدى. ول ءۇشىن ارنايى كوميسسيا قۇرىلعان. قۇستىڭ تۇرىنە، جىنىستىق-جاستىق توبىنا قاراي نارىقتاعى ورتاشا باعاسى بويىنشا وتەماقى تولەنبەك.

«قۇس تۇماۋىنان قۇتىلۋ ءۇشىن اۋرۋ قۇستاردى جويۋ كەرەك. قۇستار الىنىپ، ورتەلەدى. بۇل جۇمىستارمەن رەسپۋبليكالىق ەپيزووتياعا قارسى وتريادتار اينالىسادى. ولار قۇستاردى الۋ بارىسىندا قۇجات تولتىرىپ، وندا قۇستىڭ ءتۇرىن، جىنىستىق-جاستىق توبىن كورسەتەدى. كەيىن بۇل قۇجات وتەماقى تولەۋگە نەگىز بولادى»، - دەيدى بەرىك ءالجانوۆ.

ال اۋرۋ جۇقتىرماعان قۇستارعا ەكپە جاسالىپ، ولار ۆەتەرينارلىق دارىگەرلەردىڭ باقىلاۋىندا بولادى. كارانتين اۋرۋدىڭ سوڭعى جاعدايى تىركەلگەن كۇننەن كەيىن 3 اپتا وتىسىمەن الىنادى.

 

سوڭعى جاڭالىقتار