17 قىركۇيەك, 14:26 428 0 پرايمەريز انار لەپەسوۆا

پرايمەريز: پىكىرتالاس تارتىستى وتۋدە

14 قىركۇيەكتە «Nur Otan» پارتياسى پارتياىشىلىك سايلاۋى – پرايمەريزگە قاتىسۋشى كانديداتتاردىڭ جاريا پىكىرسايىسى باستالدى. ەلىمىزدىڭ تۇكپىر-تۇكپىرىندە ءوتىپ جاتقان دەباتتار بارىسىندا ۇمىتكەرلەر ءوز وڭىرلەرىندەگى وزەكتى ماسەلەلەردى كوتەرىپ، ولاردى شەشۋ جولدارىن ۇسىنۋدا.

اقتوبەلىك پرايمەريزگە قاتىسۋشى­لار­دىڭ اراسىندا ءبىلىم سالاسىنداعى قور­دالانعان ماسەلەلەردى شەشۋگە، ەكولوگيانى جاقسارتۋعا ءوز ۇسىنىسىن ايت­قان­دار بولدى. سونداي-اق جول ساپاسىن جاق­سارتۋعا جاڭا تەحنولوگيالاردى پاي­دالانۋ، اۋلالاردى اباتتاندىرۋ ماق­سا­تىندا ەلىمىزدە جوق تاجىريبەلەردى ۇسىن­دى.

«پرايمەريزگە اقتوبە وبلىسىنان ءتىر­كەلگەن 486 كانديدات 7 قىركۇيەكتەن باس­تاپ پارتيالاستارىمەن بەتپە-بەت جانە ونلاين ادىسىمەن كەزدەسۋلەر وتكىزىپ، ۇگىت-ناسيحات جۇمىستارىن جۇرگىزۋدە. 14 قىر­كۇيەكتەن باستاپ جاريا پىكىر­سايىس­تارعا قاتىسىپ جاتىر. ولار ءوڭىرىمىزدىڭ وزەكتى ماسەلەلەرىن اشىق كوتەرىپ، ناقتى شەشىمدەر ۇسىنۋى ءتيىس. وسىنداي ءتۇرلى وي-پىكىرلەردىڭ توعىسىنان كەلەلى وي، كە­مەل يدەيالار تۋىندايدى»، – دەيدى پار­تيا­نىڭ وبلىستىق فيليالى توراعاسىنىڭ ءبىرىنشى ورىنباسارى ەربول داناعۇلوۆ.

پاۆلودار وبلىسىندا پرايمەريزگە قا­تىسۋشى 612 ۇمىتكەر 89 توپقا بولىنگەن. العاشقى توپتىڭ جاريا پىكىرسايىسى «كولوس» مادەني ويىن-ساۋىق ورتالىعىن­دا ءوتتى. ۇمىتكەرلەر وزدەرىنىڭ سايلاۋالدى باع­دارلامالارىن ورتاعا سالىپ، جيىلعان قاۋىمدى تولعاندىراتىن سۇراقتارعا جاۋاپ بەردى.

– پىكىرسايىس ءۇش كەزەڭ بويىنشا ءوتۋ­دە: العاشىندا كانديداتتار ءوز ماقسات­تارى­مەن بولىسەدى، ءارى قاراي ءبىر-ءبىرىنىڭ سۇراق­تارىنا جاۋاپ بەرەدى دە سوڭىندا زالعا جينالعانداردىڭ ساۋالدارىنا جاۋاپ ىزدەيدى. پىكىر الماسۋ بارلىق ساني­تار­لىق ەرەجەلەردى ەسكەرە وتىرىپ ءوت­كىزىلۋدە، – دەپ اتاپ ءوتتى پارتيانىڭ پاۆ­لودار وبلىستىق فيليالى توراعا­سىنىڭ ءبىرىنشى ورىنباسارى يليا تەرەنچەنكو.

پىكىرسايىسقا قاتىسۋشىلار ايماق­تاعى شەشىمىن كۇتكەن وزەكتى ماسەلەلەردى كو­تەردى. ۇمىتكەرلەر وبلىس تۇرعىندارى­نىڭ ءال-اۋقاتىن ارتتىرۋ، ايماق ەكو­نومي­كاسىن دامىتۋعا قاتىستى بىرقاتار ۇسى­نىس ايتتى. اتاپ ايتقاندا، جاس وتبا­سى­لاردىڭ باسپانا ساتىپ الۋىنا نەسيە ءمول­شەرلەمەسىن تومەندەتۋ جانە ءمۇم­كىندىگى شەكتەۋلى ازاماتتارعا كورسەتىلەتىن قول­داۋدى ارتتىرۋ جونىندە وي ءوربىتتى.

ال اقمولا وبلىسى بۋراباي اۋدانىنا قا­راستى ۆەدەنوۆكا اۋىلىنىڭ مادەنيەت ۇيىندە وتكەن پىكىرسايىستا پرايمەريزگە قاتىسۋشىلار ەلدى مەكەندەردەگى تۇيتكىل­دەردى شەشۋ بويىنشا ءوز جوسپارلارىمەن ءبولىستى.

بۋرابايلىقتار ءۇشىن اۋىل شارۋا­شى­لىعىن جانە تۋريزم سالاسىن دامىتۋ ماسەلەسى كۇن تارتىبىندە تۇر. سونداي-اق «ديپ­لوممەن – اۋىلعا» باعدارلاماسى اياسىندا جاس مامانداردى اۋىلدىق جەرلەرگە تارتۋ جانە ششۋچە قالاسىن اباتتان­دىرۋ، قالا ىشىندەگى جولداردى كۇردەلى ءجون­دەۋدەن وتكىزۋ دە شەشىمىن كۇتكەن ءما­سەلەلەر.  ال كەنەسارى حاننىڭ ەسىمىن يەم­دەنگەن كەنەسارى اۋىلدىق وكرۋگى وبلىس ورتالىعى كوكشەتاۋدىڭ ءدال ىرگەسىندە ورنالاسقانىمەن، اۋىل ىشىندەگى جولداردىڭ جاعدايى كوڭىل كونشىتپەيدى. زەينەتكەرلەر پوشتا قىزمەتىنىڭ ساپاسىنا ءجيى شاعىمدانادى. سونداي-اق تۇرعىن­دار ءۇشىن مال جايىلىمى جوقتىڭ قاسى. وسى جانە وزگە دە ماسەلەلەر پرايمەريزگە قاتىسۋشىلاردىڭ سايلاۋالدى باعدارلا­ما­سىندا كورىنىس تاپقان. پىكىرسايىس بارىسىندا ۇمىتكەرلەر ءوز باعدارلامالارىن­دا ايتىلعان شارالاردى قالاي جۇزەگە اسىراتىندارىن ءتۇسىندىردى.

شىعىس قازاقستان وبلىسىندا دا كان­ديداتتار قىزۋ پىكىرسايىسقا ءتۇسىپ، ءوڭىر تۇرعىندارىن مازالايتىن سۇراقتاردى بەلسەنە تالقىلاۋدا. التاي اۋدانىنىڭ ءۇمىت­كەرلەرى بۇقتىرما سۋ قويماسى جاعا­لاۋىنداعى تۋريستىك ينفراقۇرىلىمدى جاقسارتۋ قاجەتىن، سونداي-اق جاڭا بۇق­تىرما كەنتىندەگى قازاق مەكتەبىنىڭ عي­ماراتى زامان تالابىنا ساي ەمەس ەكەنىن ءسوز ەتتى. شەمونايحا اۋدانىنىڭ كانديداتتارى «ديپلوممەن اۋىلعا» باعدار­لا­ماسى اياسىندا جاس مامانداردى اۋىلدىق جەرلەرگە تارتۋدى جانە شاڭعى سپورتىن دامىتۋ ءۇشىن جاتتىقتىرۋشىلارعا قو­سىم­شا جۇمىس ورنىن اشۋ ماسەلەسىن كو­تەردى.

سولتۇستىك قازاقستان وبلىسىندا پراي­مەريزگە قاتىسۋشىلار بيلىكتىڭ حا­لىقپەن كەرى بايلانىس ورناتۋ، جولداردى جوندەۋ، ازاماتتاردىڭ ازىق-تۇلىك سەبەتىن جاقسارتۋ، بيزنەستى، دەنساۋلىق ساقتاۋ، ءبىلىم بەرۋ سالالارىن دامىتۋ ماسەلەلەرىن تالقىلادى.

ءبىلىم بەرۋ جۇيەسىن دامىتۋ، كاسىپكەر­لەردى قولداۋ ماسەلەلەرى باتىس قازاقستان وبلىسىندا وتكەن پىكىرسايىستار كەزىندە دە ءجيى كوتەرىلدى. بۇدان بولەك، ورالدا ءوت­­كەن العاشقى دەباتتا كانديداتتار كوپ­بالالى وتباسىلارعا بەرىلەتىن جەڭىل­دىكتەردى ارتتىرۋ، مۇمكىندىگى شەكتەۋلى ازا­ماتتاردى قولداۋ، جۇمىسشى ماماندى­عى­نىڭ بەدەلىن كوتەرۋ جونىندەگى ۇسى­نىس­تارىن ورتاعا سالدى.

جاريا پىكىرسايىستار 30 قىركۇيەككە دەيىن جەكسەنبىدەن باسقا كۇندەرى كۇن سايىن وتكىزىلەدى. ەل تۇرعىندارى دەبات­تار­دى الەۋمەتتىك جەلىلەردە تىكەلەي ەفير ارقىلى تاماشالاپ، پرايمەريز كانديداتتارىنا سۇراق قويا الادى. سونداي-اق قا­زاقستاندىقتار پارتيا فيليالدارى­نىڭ الەۋمەتتىك جەلىلەردەگى رەسمي اككاۋنتتارىندا وزدەرىن مازالاعان ماسەلەلەر جايلى جازىپ قالدىرا الادى. بۇل پرايمەريز ۇمىتكەرلەرىنە جەرگىلىكتى جاعدايدى جاقسارتۋ بويىنشا دايىن ۇسىنىستارمەن پىكىرتالاسقا قاتىسۋعا مۇمكىندىك بەرەدى. حالىقپەن كەرى بايلانىس سايلاۋ الدىن­داعى باعدارلامالاردى پىسىقتاۋ ءۇشىن مۇمكىندىكتەردى كەڭەيتەتىنى جانە بىرلەسىپ وڭتايلى شەشىمدەردى تابۋعا كومەك­تەسەتىنى ءسوزسىز.

سوڭعى جاڭالىقتار