17 قىركۇيەك, 12:33 773 0 زاڭ انار لەپەسوۆا

"قورعاس ءىسى": شۆەيتسارياعا اكەتىلگەن 390 ملن تەڭگەدەن استام قارجى ەلگە قايتارىلدى

ەلىمىزدەن زاڭسىز تۇردە شۆەيتسارياعا اكەتىلگەن 390 ملن تەڭگەدەن استام قاراجات قازاقستانعا قايتارىلدى. بۇل تۋرالى قازاقستان باس پروكۋراتۋراسىنىڭ رەسمي سايتىندا حابارلاندى. 

قاراجات ەلىمىزگە 14 قىركۇيەك كۇنى قايتارىلىپتى. اتالمىش سومانى «قورعاس ءىسى» بويىنشا ۇيىمداسقان قىلمىستىق قوعامداستىق مۇشەلەرى جىمقىرىپ، شۆەيتسارياعا الىپ كەتكەن. شۆەيتساريانىڭ فەدەرالدىق بيلىگى 390 ملن تەڭگەدەن استام قاراجاتتى قازاقستانعا قايتاردى.

"اتالعان قاراجات 2012 جىلدان بەرى حالىقارالىق ىزدەۋدە جۇرگەن قىلمىستىق ۇيىمداسقان توپتىڭ بەلسەندى مۇشەلەرىنىڭ ءبىرى ماعزۇم ابدىراليەۆكە تيەسىلى شۆەيتساريا بانكىندەگى شەتەلدىك كومپانيانىڭ شوتىندا بولعان", - دەپ جازادى باس پروكۋراتۋرانىڭ رەسمي سايتى.

بەلگىلى بولعانداي، شۆەيتساريادان ابدىراليەۆتىڭ قىلمىستىق اكتيۆتەرىن قايتارۋ بويىنشا جۇمىس 2018 جىلدان بەرى جۇرگىزىلىپ كەلىپتى. اتالمىش ءىس بويىنشا بۇعان دەيىن 2019 جىلى مەملەكەت كىرىسىنە شۆەيتساريادان 140 ملن تەڭگە قايتارىلعان ەكەن.

قۇزىرلى مەكەمە "قورعاس ءىسى" اياسىندا شۆەيتساريادان مەملەكەتتىك بيۋدجەتكە شەتەلدەن اكتيۆتەردى قايتارۋ بويىنشا جۇمىس بارىسىندا تۇسكەن قاراجاتتىڭ جالپى سوماسى شامامەن 530 ملن تەڭگەنى، ياعني 1,3 ملن اقش دوللارىنان استام قاراجاتتى قۇراعانىن العا تارتتى.

سوڭعى جاڭالىقتار