31 ناۋرىز 2015, 11:31 1871 0 جاڭالىقتار اسەل انۋاربەك

جالعان اقپارات تاراتۋشى 6 جىلعا سوتتالۋى مۇمكىن

29 جاستاعى اقتوبە تۇرعىنى پوليتسەيلەرگە «مەگا-اقتوبە» ويىن-ساۋىق ورتالىعىنا جارىلعىش زات قويىلدى دەگەن جالعان اقپارات جەتكىزگەن. بۇل تۋرالى وبلىستىق ءىىد ءباسپاسوز قىزمەتى مالىمدەدى. جالعان اقپارات تاراتقان قالا تۇرعىنى ءبىر ساعات ىشىندە پوليتسەيلەردىڭ قولىنا ءتۇستى. ەندى ول 6 جىلعا دەيىن باس بوستاندىعىنان ايىرىلۋى مۇمكىن.
وقيعانىڭ ءمان-جايى بىلاي بولعان. بەلگىسىز ادام 29 ناۋرىزعا قاراعان ءتۇنى پوليتسەيلەرگە حابارلاسىپ، «مەگا-اقتوبە» ويىن-ساۋىق ورتالىعىنا جارىلعىش زات قويىلعاندىعىن ايتقان. مۇنداي اقپارات العان ءىىد-ءنىڭ جەدەل تەرگەۋ توبى، توتەنشە جاعدايلار دەپارتامەنتىنىڭ كەزەكشى جاساعى، ۇلتتىق قاۋىپسىزدىك قىزمەتكەرلەرى وقيعا ورنىنا جەتەدى. قۇقىق قورعاۋ ورگاندارىنىڭ قىزمەتكەرلەرى وقيعا ورنىنا جەتكەنشە، ورتالىقتىڭ قاۋىپسىزدىك قىزمەتى جيىرماعا جۋىق ادامدى سىرتقا شىعارعان. عيماراتتىڭ ءىشىن تۇگەل ءتىنتىپ شىققان ماماندار ەشقانداي دا جارىلعىش زات تاپقان جوق. سول ءتۇنى-اق جالعان اقپارات تاراتتى دەگەن كۇدىكپەن قولعا تۇسكەن 29 جاسار قالا تۇرعىنى مۇنداي اقپاراتتى بۇزاقىلىق نيەتپەن حابارلاعانىن جاسىرمادى. قازىر ورتالىققا جانە مەملەكەتكە كەلتىرىلگەن شىعىن كولەمى ەسەپتەلۋدە. ال كۇدىكتى ۋاقىتشا ۇستاۋ يزولياتورىندا.

سوڭعى جاڭالىقتار