12 تامىز, 11:08 438 0 ساياسات انار لەپەسوۆا

سەناتتا وڭىرلەر مۇددەلەرىنىڭ ءبىلدىرىلۋى اسا ماڭىزدى – ماۋلەن اشىمباەۆ

سەنات ەلىمىزدىڭ بارلىق ءوڭىرىنىڭ پارلامەنتتەگى وكىلدىگىن قامتاماسىز ەتەدى. بۇل تۋرالى قر پارلامەنتى سەناتىنىڭ توراعاسى Facebook-تەگى پاراقشاسىنا جازدى. 

ماۋلەن اشىمباەۆ بۇگىن ەلىمىزدە سەنات دەپۋتاتتارىنىڭ سايلاۋى ءوتىپ جاتقانىن ايتىپ، قولدانىستاعى زاڭناماعا سايكەس ءار وبلىستان، استانادان جانە رەسپۋبليكالىق ماڭىزى بار قالالاردان ءبىر-بىردەن سايلاناتىن 17 سەناتوردى تاڭداۋشىلار-ءماسليحات دەپۋتاتتارى سايلايتىنىنا نازار اۋدارعان.

«زاڭ شىعارۋشى بيلىك جۇيەسىنە سايكەس سەنات ەلىمىزدىڭ بارلىق ءوڭىرىنىڭ پارلامەنتتەگى وكىلدىگىن، ءماجىلىس قۇرامى جاڭارعان كەزدە زاڭنامالىق ساياساتتىڭ ساباقتاستىعىن جانە زاڭ جوبالارىنىڭ ساپالى قارالۋىن قامتاماسىز ەتەدى. ءماجىلىس دەپۋتاتتارىنىڭ پارتيالىق تىزىمدەر بويىنشا جانە قازاقستان حالقى اسسامبلەياسىنان سايلاناتىنىڭ ەسكەرسەك، سەناتتا وڭىرلەر مۇددەلەرىنىڭ ءبىلدىرىلۋى اسا ماڭىزدى»، – دەيدى ماۋلەن اشىمباەۆ.

سونىمەن قاتار سەنات توراعاسى زاڭ شىعارۋشى بيلىكتى ۇيىمداستىرۋدىڭ قازىرگى جۇيەسى قابىلدانعان زاڭداردى ساپالى پىسىقتاۋدى قامتاماسىز ەتەتىنىن تىلگە تيەك ەتكەن.

«قارالاتىن ماسەلە جان-جاقتى ءارى تەرەڭ زەرتتەلىپ، زاڭ قابىلداۋ جۇمىستارى كەزەڭ-كەزەڭمەن جانە قيسىندى جۇرگىزىلۋگە ءتيىس. اتالعان جۇمىستىڭ ساپاسى مەملەكەتتىك ورگانداردىڭ نورمالارىنا، ياعني، تۇتاس ەلدىڭ تىنىس-تىرشىلىگىنە ىقپال ەتەدى. ءار قابىلدانعان زاڭنىڭ ونداعان مىڭ وتباسى مەن ناقتى ادامداردىڭ تىنىس-تىرشىلىگىنە تىكەلەي اسەرى بار. وسى رەتتە پارلامەنت پالاتالارىنىڭ جۇمىسى زاڭ شىعارۋ ۇدەرىسىنىڭ بارىنشا ءتيىمدى ءارى تەڭگەرىمدى بولۋىنا مۇمكىندىك بەرەدى جانە زاڭداردى ەلدىڭ، سونداي-اق، ءار ازاماتتىڭ مۇددەسىن ەسكەرىپ قابىلداۋدى قامتاماسىز ەتەدى»، – ماۋلەن اشىمباەۆ.

مۇنان بولەك ول قابىلداناتىن زاڭدار قازاقستان پرەزيدەنتىنىڭ باستامالارىن زاڭنامالىق تۇرعىدان قامتاماسىز ەتۋگە ءتيىس ەكەندىگىن اتاپ وتكەن.

«دامۋدىڭ جاڭا كەزەڭىندە مەملەكەت باسشىسى ۇسىنعان حالىقتىڭ تۇرمىس ساپاسىن ارتتىرۋعا جانە ينكليۋزيۆتى ەكونوميكالىق وسۋگە ارنالعان جاڭعىرتۋ باعدارىن زاڭنامالىق تۇرعىدان قامتاماسىز ەتۋدىڭ ماڭىزى زور. بۇل رەتتە دەپۋتاتتاردىڭ ءرولى ەرەكشە. كوروناۆيرۋس ىندەتىمەن جانە ونىڭ سالدارىمەن كۇرەسۋ ءۇشىن قۇقىقتىق بازانى جەتىلدىرۋ دە ماڭىزدى مىندەتتەردىڭ ءبىرى بولىپ قالا بەرەدى. بۇگىن سايلانعان سەناتورلار ءتيىستى وكىلەتتىكتەرىن العان ساتتەن باستاپ اتالعان ستراتەگيالىق مىندەتتەردى ورىنداۋعا ءوز ۇلەستەرىن قوسىپ، بەلسەندى جۇمىس ىستەيدى دەپ سەنەمىن»، – دەيدى سەنات توراعاسى.

 

سوڭعى جاڭالىقتار