11 تامىز, 12:31 538 0 ادەبيەت ارايلىم بيمەنديەۆا

ابايدىڭ شىعارمالارى الەمنىڭ 10 تىلىنە اۋدارىلدى

اباي قۇنانبايۇلىنىڭ 175 جىلدىق مەرەيتويى اياسىندا پرەزيدەنت قاسىم-جومارت توقاەۆتىڭ باستاماسىمەن ۇلى اقىن، ويشىل، اعارتۋشى شىعارمالارى الەمنىڭ 10 تىلىنە اۋدارىلدى. ولار: اعىلشىن، اراب، قىتاي، يسپان، يتاليان، نەمىس، ورىس، تۇرىك، فرانتسۋز جانە جاپون تىلدەرى. اۋدارما جيناقتارعا اقىننىڭ 145 ولەڭى، 3 پوەماسى مەن 45 قارا ءسوزى كىردى.

اباي شىعارمالارى وزگە تىلدەرگە بۇعان دەيىن دە اۋدارىلدى. الايدا بۇل باستاما مەملەكەتتىڭ وسىنداي ءىرى اۋقىمدا ىسكە اسىرعان العاشقى اۋدارما جۇمىسى. جوبا اياسىندا اۋدارما ساپاسىن قامتاماسىز ەتۋگە ەرەكشە ءمان بەرىلدى. اۋدارما جۇمىسى مەن جيناق باسىلىمىن ۇيىمداستىرۋعا ءار تىلدە سويلەيتىن اسا تاجىريبەلى ماماندار، ءتيىستى ەلدىڭ مادەنيەتى مەن ادەبيەتىن تانىستىراتىن، كوركەم اۋدارماعا ماماندانعان ەڭ بەدەلدى باسپا ۇيىمدارى تاڭدالىپ، تارتىلدى.

جيناقتىڭ بارلىق تىلدەگى فورماتى مەن مۇقاباسى بىردەي بولماق. مۇقابا سۋرەتىنىڭ اۆتورى – تانىمال سۋرەتشى داۋرەن قاستەەۆ ء(ابىلحان قاستەەۆتىڭ نەمەرەسى).

ءار تىلدەگى جيناقتىڭ تارالىمى – 3 مىڭ دانادان. تارالىم وسى تىلدەردە سويلەيتىن جۇزدەن اسا ەلدىڭ ءىرى كىتاپحانالارى مەن ادەبي جانە عىلىمي ورتالىقتارىنا جەتكىزىلەدى.

بۇل جوبا اياسىندا العاش رەت اباي شىعارمالارى اعىلشىن، اراب، تۇرىك، قىتاي، نەمىس جانە جاپون تىلدەرىنە قازاق تىلىنەن تىكەلەي اۋدارىلدى. تەك يسپان، يتاليان، فرانتسۋز تىلدەرىنە ءالى دە ورىس ءتىلى ارقىلى جول سالۋعا تۋرا كەلدى. ابايدىڭ شەت تىلدەگى اۋدارمالارىنىڭ دەنى كەڭەس داۋىرىندە جاسالعان، ياعني ول اۋدارمالار ەركىن جاسالدى دەۋگە بولمايدى. بەرتىندەگى اۋدارما جوبالارى اياسىندا جەكەلەگەن ولەڭدەر نەمەسە قارا سوزدەر بولەك اۋدارىلدى. سوندىقتان بۇل اۋدارما اياسىندا اباي اۋدارماسىنداعى بارلىق ماسەلەلەر جان-جاقتى قامتىلدى.

سوڭعى جاڭالىقتار