11 تامىز, 10:43 684 0 دەنساۋلىق انار لەپەسوۆا

قازاقستان كوروناۆيرۋس جۇقتىرعاندار سانى جونىنەن الەمدە نەشىنشى ورىندا؟

قازاقستان پتر دياگنوستيكامەن قامتۋ بويىنشا الەمدە 37-ورىندا، ال ىندەتكە شالدىققاندار سانى جونىنەن 43-ورىندا تۇر. 

بۇل تۋرالى ۇكىمەت وتىرىسىندا قر دەنساۋلىق ساقتاۋ ءمينيسترى الەكسەي تسوي مالىمدەدى.

«قازاقستاندا 11 تامىزداعى دەرەك بويىنشا 100 164 ناۋقاس تىركەلگەن. ونىڭ ىشىندە 25 171 ناۋقاس ەم الىپ جاتىر. 73 702 پاتسيەنت نەمەسە 73,6 پايىزى ەمدەلىپ شىقتى. 1 091 ادام قايتىس بولدى. ۆيرۋس رەپرودۋكتيۆتىلىگىنىڭ نەمەسە 1 ناۋقاستىڭ وزگەلەرگە جۇقتىرۋ كورسەتكىشى 1,72 بولاتىن. كارانتين ەنگىزگەننەن كەيىن رەپرودۋكتيۆتىلىك كورسەتكىشىنىڭ تۇراقتى تۇردە تومەندەگەن كورىپ وتىرمىز. ول 2 ەسەگە، ياعني 0,82-گە دەيىن تومەندەدى»، - دەدى مينيستر.

الەكسەي تسويدىڭ سوزىنشە، ەل تۇرعىندارىن تەستىلەۋمەن قامتۋ كەڭەيدى. قازاقستان پتر دياگنوستيكامەن قامتۋ كورسەتكىشى بويىنشا الەمدە 37-ورىندا تۇر. ناۋقاستاردى دەر ۋاقىتىندا دياگنوستيكالاۋدىڭ ناتيجەسىندە Covid-19-دان قازا تاپقاندار كورسەتكىشى بويىنشا ەلىمىز 70-ورىندا.

«ەلدە ىندەت ستاتيستيكاسى جاڭارتىلىپ، تىركەلگەن جاعدايلار سانى ارتتى. قازىرگى ۋاقىتتا قازاقستان الەمدە 43-ورىندا تۇر. انىقتالعان ناۋقاستاردىڭ دەر ۋاقىتىندا ءوزىن-ءوزى وقشاۋلاۋى، امبۋلاتوريالىق جانە ستاتسيونارلىق ەمدەۋمەن قامتۋ، سونىمەن قاتار بايلانىستا بولعان ادامداردى باقىلاۋعا الۋ اۋرۋدىڭ تارالۋىن تەجەۋگە، جاعدايى اۋىر ناۋقاستاردى باقىلاۋعا الۋعا مۇمكىندىك بەردى»، - دەدى ۆەدومستۆو باسشىسى.

ەسكە سالا كەتەيىك، بۇعان دەيىن پرەمەر-مينيستر اسقار مامين دەنساۋلىق ساقتاۋ مينيسترلىگىنە كارانتين شارالارىن كەزەڭ-كەزەڭىمەن الىپ تاستاۋ جوسپارىن مەملەكەتتىك كوميسسيا قاراۋىنا ەنگىزۋدى تاپسىردى.

ۇكىمەت باسشىسىنىڭ ايتۋىنشا، كارانتين ەنزىگىلۋىنىڭ ناتيجەسىندە اۋرۋحانالاردىڭ جۇكتەمەسى 61 پايىزعا، جەدەل جاردەم شاقىرۋ 62 پايىزعا تومەندەگەن.

 

سوڭعى جاڭالىقتار