11 تامىز, 09:49 1598 0 قوعام انار لەپەسوۆا

پرەمەر-مينيستر كارانتيندى كەزەڭ-كەزەڭىمەن الۋدى تاپسىردى

دەنساۋلىق ساقتاۋ مينيسترلىگى كارانتين شارالارىن كەزەڭ-كەزەڭىمەن الىپ تاستاۋ جوسپارىن مەملەكەتتىك كوميسسيا قاراۋىنا بەيسەنبى كۇنى ەنگىزۋى ءتيىس. ۇكىمەت وتىرىسىندا اسقار مامين وسىنداي تاپسىرما بەردى.  

«جالپى قابىلدانعان كەشەندى شارالاردىڭ ناتيجەسىندە ەلىمىزدەگى كوروناۆيرۋستىڭ تارالۋى دەڭگەيى جانە وسىعان بايلانىستى بارلىق كورسەتكىشتەر قارقىندى تومەندەۋى تىركەلىپ وتىر. سونىڭ ىشىندە ۆيرۋستىق رەپرودۋكتيۆتىلىك دەڭگەيىنىڭ ورتاشا كورسەتكىشى 0,82 پايىزعا دەيىن تومەندەدى. ەمدەلىپ شىققانداردىڭ ۇلەسى 73,6 پايىزدى قۇراپ وتىر. قالعاندارى قاجەتتى ەم الىپ جاتىر»، - دەدى اسقار مامين.

ۇكىمەت باسشىسى اۋرۋحانالاردىڭ جۇكتەمەسى 61 پايىزعا، جەدەل جاردەم شاقىرۋ 62 پايىزعا تومەندەگەنىن اتاپ ءوتتى.

«قالىپتاستىپ وتىرعان ەپيدەميولوگيالىق جاعدايدى ەسكەرە وتىرىپ دەنساۋلىق ساقتاۋ مينيسترلىگىنە كارانتين شارالارىن كەزەڭ-كەزەڭىمەن الىپ تاستاۋ جوسپارىن مەملەكەتتىك كوميسسيا قاراۋىنا بەيسەنبى كۇنى ەنگىزۋدى تاپسىرامىن»، - دەدى پرەمەر-مينيستر.

ەسكە سالا كەتسەك، بۇعان دەيىن قر دەنساۋلىق ساقتاۋ مينيسترلىگىنىڭ رەسمي وكىلى باعدات قوجاحمەتوۆ ەلىمىزدە كوروناۆيرۋستى جۇقتىرۋ ءوسىمى توقتاعانىن مالىمدەدى. ونىڭ ايتۋىنشا، ەندىگى مىندەت – ىندەتتى جۇقتىرۋ مەن ءولىم-ءجىتىمدى توقتاتۋ.

مينيسترلىكتىڭ سوڭعى دەرەگى بويىنشا، قازاقستاندا كوروناۆيرۋس جۇقتىرعاندار سانى 100 مىڭنان استى. ىندەتتەن 73,7 مىڭ ادام ەمدەلىپ شىقتى. 1269 ادام كوز جۇمدى.

 

سوڭعى جاڭالىقتار