10 تامىز, 14:34 453 0 ادەبيەت انار لەپەسوۆا

تۇركيادا ابايدىڭ 175 جىلدىعى اتاپ ءوتىلدى

انكارادا قازاقستان ەلشىلىگىنىڭ ۇيىمداستىرۋىمەن اباي قۇنانبايۇلىنىڭ 175 جىلدىق مەرەيتويىنا ارنالعان ءىس-شارا ءوتتى.

القالى جيىنعا تر مادەنيەت ەكس-ءمينيسترى ن.ك. زەيبەك، ەۋرازيا جازۋشىلار وداعىنىڭ پرەزيدەنتى يا.ومەروعلۋ، سونداي-اق جەرگىلىكتى زيالى قاۋىم جانە انكاراداعى ديپلوماتيالىق ميسسيالاردىڭ، بۇقارالىق اقپارات قۇرالدارىنىڭ وكىلدەرى مەن تۇركيادا ءبىلىم الىپ جاتقان قازاقستاندىق جاستار جانە ت.ب. قاتىستى.

ءىس-شارانىڭ اشىلۋىندا ءسوز سويلەگەن قازاقستاننىڭ تۇركياداعى ەلشىسى ابزال ساپاربەكۇلى ۇلى اقىننىڭ قازاق حالقى ءۇشىن ماڭىزى تۋرالى ايتىپ، «ابايدى تانۋ – ءوزىمىزدى تانۋ» دەپ، ونىڭ تەرەڭ ويلارىنىڭ قازاق بولمىسىن قالىپتاستىرعانىن اتاپ ءوتتى.

ەلشى ا.ساپاربەكۇلى ادەبيەتپەن قاتار قوعامدىق ومىردەگى جاڭالىقشى پىكىرلەرىمەن اباي وزىنەن كەيىنگى قازاق زيالىلارىنىڭ ونەگە تۇتقان ۇلگىگە اينالعانىن ايتتى.

ەلشى 1995 جىلى يۋنەسكو تاراپىنان اباي جىلى بولىپ جاريالانعانىن، بيىل اباي قۇنانبايۇلىنىڭ 175 جىلدىعىن يۋنەسكو دەڭگەيىندە اتاپ ءوتۋ شەشىمى قابىلدانعانىن، تۇركسوي تاراپىنان دا 2020 جىلى اباي جىلى بولىپ جاريالانعانىن ەسكە سالا وتىرىپ، مۇنىڭ ۇلى اقىننىڭ شىعارمالارى مەن ويلارىنىڭ الەمدىك دەڭگەيدە تانىلعاندىعىنىڭ كورىنىسى ەكەندىگىن العا تارتتى.

ءسوزىنىڭ سوڭىندا ەلشى ا.ساپاربەكۇلى وسى جىلدىڭ اقپان ايىندا تۇركيادا اباي قۇنانبايۇلىنىڭ 175 جىلدىعىن اتاپ ءوتۋ ءىس-شارالارى انكارادا وتكەن سالتاناتتى كونتسەرتپەن اشىلعانىن جانە جىلدىڭ اياعىنا دەيىن بۇل شارالاردىڭ جالعاسىن تاباتىنىن حابارلادى.

تۇركيانىڭ بۇرىنعى مادەنيەت ءمينيسترى ن.ك. زەيبەك ءوز سوزىندە ابايعا قازىرگى قازاق ادەبيەتىنىڭ نەگىزىن قالاۋشىسى دەگەن باعا بەرىپ، ۇلى اقىننىڭ ماڭىزىنا توقتالدى.

ەۋرازيا جازۋشىلار وداعىنىڭ پرەزيدەنتى يا.ومەروعلۋ ابايدىڭ ۇلىلىعىنىڭ ءبىر كورىنىسى رەتىندە «قازاق ادەبي ءتىلى – اباي ءتىلى» دەي وتىرىپ، كەمەڭگەر اقىننىڭ ءوز شىعارمالارىمەن قازاق ادەبي ءتىلىنىڭ نەگىزىن قالاپ كەتكەنىن ايتتى. سونداي-اق، يا.ومەروعلۋ ابايدىڭ ەجەلگى ساقتاردان بەرى جالعاسىپ كەلگەن ادەت-عۇرىپتار مەن يسلام تاساۋىفىن قازىرگى زامانعى پىكىرلەرمەن بىرلەستىرە وتىرىپ قازاق فيلوسوفياسىن قالىپتاستىرعان ءىرى ويشىل ەكەنىن دە العا تارتتى. يا.ومەروعلۋ ءتىپتى ابايدىڭ قازاق ۇلتتىق بولمىسىن قالىپتاستىردى دەپ سانايدى.

جيىن بارىسىندا ەلشى ا.ساپاربەكۇلى م.اۋەزوۆتىڭ «اباي جولى» رومانىن جاقىندا تۇرىكشەگە اۋدارعان بەلگىلى تۇرىك اقىنى، جازۋشى زافەر كيبارعا قازاقستان رەسپۋبليكاسى پرەزيدەنتىنىڭ جارلىعىنا سايكەس بەرىلگەن قازاقستاننىڭ مەملەكەتتىك ناگراداسى II دارەجەلى «دوستىق» وردەنىن تابىستادى.

ءوز كەزەگىندە ز.كيبار تابىستالعان وردەن ءۇشىن پرەزيدەنت ق.توقاەۆقا، قازاق حالقىنا العىسىن ءبىلدىرىپ، ابايدىڭ بارشا ادامزاتتى اعارتار تەرەڭ سوزدەردى جاي ايتىپ قانا قويماي، قاعاز بەتىنە توگىپ، وشپەس مۇرا قىلىپ كەتكەنى جايلى ءسوز قوزعادى.

جيىن سوڭى ۇلى اقىننىڭ ولەڭدەرى، پوەمالارى مەن قارا سوزدەرىن مانەرلەپ وقۋعا ارنالعان ادەبي كەشكە ۇلاسىپ، ۇلتتىق تاعامدار ۇسىنىلعان فۋرشەتپەن جالعاستى. سونداي-اق، اباي قۇنانبايۇلىنىڭ پورترەتتەرىنەن قۇرالعان سۋرەت كورمەسى سالتاناتتى شارا قاتىسۋشىلارىنا پاش ەتىلدى.

سوڭعى جاڭالىقتار