10 تامىز, 11:27 403 0 الەۋمەت انار لەپەسوۆا

42 500 تەڭگە: 2,25 ملن قازاقستاندىق بىرجولعى تولەم الدى

2 ملن 25 مىڭ قازاقستاندىق كارانتين كەزىندە تابىسىن جوعالتقانى ءۇشىن بىرجولعى تولەم الدى، دەپ حابارلايدى قر ەڭبەك جانە حالىقتى الەۋمەتتىك قورعاۋ مينيسترلىگى.

«10 تامىز ساعات 09.00-دەگى جاعداي بويىنشا شىلدەدە شەكتەۋ شاراسىن ەنگىزۋگە بايلانىستى تابىسىنان ايىرىلعان جاعدايدا مەملەكەتتىك الەۋمەتتىك ساقتاندىرۋ قورىنان بىرجولعى تولەم تاعايىنداۋعا ازاماتتاردان 2 ملن 508 مىڭ بىرەگەي ءوتىنىش قابىلداندى، تولەم مولشەرى ەڭ تومەنگى جالاقىعا – 42 500 تەڭگەگە تەڭ. تولەمدى 2 ملن 257,3 مىڭ قازاقستاندىق الدى، ونىڭ ىشىندە 2 ملن 241,6 مىڭ ادام تامىز ايىندا كارانتيننىڭ ۇزارتىلۋىنا بايلانىستى 0,5 ەتج – 21 250 مىڭ تەڭگە مولشەرىندە قوسىمشا اقى الدى»، دەلىنگەن حابارلامادا.

2 ملن 508 مىڭ ءوتىنىمنىڭ ىشىندە:

– 835,1 مىڭ ادام پرواكتيۆتى فورماتتا تولەم تاعايىنداۋعا كەلىسىم بەرگەن;

– 641 مىڭ ادام Egov.kz پورتالى جانە telegram-بوتتار ارقىلى;

– 381,3 مىڭ ادام 42500.enbek.kz پورتالى ارقىلى;

– 650,5 مىڭ ادام ەكىنشى دەڭگەيدەگى بانكتەردىڭ موبيلدىك قوسىمشالارى مەن ينتەرنەت-رەسۋرستارى ارقىلى ءوتىنىش بەرگەن.

ازاماتتاردىڭ ساناتتارى بولىنىسىندە:

– 835,1 مىڭ ءوتىنىش بىرىڭعاي جيىنتىق تولەم تولەۋشىلەردەن كەلگەن (پرواكتيۆتى فورماتتا);

– 231,1 مىڭ ءوتىنىشتى جالدامالى قىزمەتكەرلەرى ءۇشىن جۇمىس بەرۋشىلەر بەرگەن;

– 1 ملن 441,8 مىڭ ءوتىنىش ازاماتتاردىڭ باسقا ساناتتارىنان كەلىپ ءتۇستى (جەكە كاسىپكەرلەر، جەكە پراكتيكامەن اينالىساتىن ادامدار، ازاماتتىق-قۇقىقتىق سيپاتتاعى شارتتار بويىنشا تابىس الاتىن جەكە تۇلعالار).

تولەم 2 ملن 282 مىڭ ادامعا تاعايىندالدى. اقشالاي قاراجات 2 ملن 257,3 مىڭ قازاقستاندىققا اۋدارىلدى.

بۇعان دەيىن حابارلانعانداي، قازاقستان اۋماعىندا كارانتيننىڭ 2 اپتاعا سوزىلۋىنا بايلانىستى ماسق-تان بىرجولعى تولەم الۋشىلارعا 0,5 ەتج – 21 250 تەڭگە مولشەرىندە قوسىمشا اقى تولەنەدى.

2020 جىلدىڭ شىلدەسىندە ماسق-تان بىرجولعى تولەم العان قازاقستاندىقتارعا كارانتيننىڭ ۇزارتىلۋىنا بايلانىستى قوسىمشا اقى اۆتوماتتى تۇردە تاعايىندالادى. قايتا ءوتىنىش بەرۋدىڭ قاجەتى جوق. ءوتىنىش قابىلداۋ 2020 جىلدىڭ 1 قىركۇيەگىنە دەيىن جالعاسادى.

 

سوڭعى جاڭالىقتار