9 تامىز, 15:21 855 0 قاۋىپسىزدىك انار لەپەسوۆا

الماتى وبلىسىندا كوپقاباتتى ءۇي ورتەنىپ، 5 ادام زارداپ شەكتى (ۆيدەو)

بۇگىن تۇندە الماتى وبلىسىنىڭ قاراساي اۋدانىندا بولعان ورتتەن ءۇش ەرەسەك ادام مەن ەكى بالا زارداپ شەكتى. بۇل تۋرالى ءوڭىردىڭ توتەنشە جاعدايلار دەپارتامەنتىنىڭ ءباسپاسوز قىزمەتى حابارلادى.

ءورت ءسوندىرۋ قىزمەتىنىڭ جەكە قۇرامى تۇنگى 12.30-دا ءورت شىققانى تۋرالى حابار العان. قاسكەلەڭ قالاسىندا ورنالاسقان 9 قاباتتى تۇرعىن ءۇيدىڭ ءۇشىنشى قاباتىنداعى پاتەر ورتەنگەن. ءورتتى سوندىرۋگە تەك جەرگىلىكتى ءورت ءسوندىرۋ قىزمەتتەرى عانا ەمەس، سونىمەن بىرگە الماتىداعى ارىپتەستەرى دە اتتاندى.

وقيعا ورنىنا جەتكەن ءورت ءسوندىرۋ بريگادالارى جوعارعى قاباتتاعى تۇرعىنداردىڭ قالىڭ ءتۇتىننىڭ كەسىرىنەن ۇيىنەن شىعا الماي جاتقانىن بايقاعان. ءورتتى ءسوندىرۋ كەزىندە ءورت سوندىرۋشىلەر 25 ادامدى قۇتقاردى.

جالپى العاندا، تۇرعىن ءۇي كەشەنىنەن ءۇش جۇزگە جۋىق ادام قاۋىپسىز جەرگە كوشىرىلدى، كەيبىرى وزدىگىمەن شىعا الدى، ال كەيبىرەۋلەرى ءورت سوندىرۋشىلەردىڭ كومەگىنە مۇقتاج بولدى. ءورتتى اۋىزدىقتاۋعا 40 مينۋت ۋاقىت قاجەت بولدى. وسى ۋاقىتقا دەيىن ءورت 15 شارشى مەترگە جايىلىپ ۇلگەرگەن.

وقيعانىڭ سەبەبى ءالى انىقتالعان جوق، تەك تۇرمىستىق زاتتار مەن جيھازدار ورتەنگەنى بەلگىلى بولدى.

زارداپ شەككەندەردىڭ ءبىرى 51 جاستاعى ءۇي يەسى، ونىڭ 26 ​​جاستاعى ۇلى جانە 11 جاسار تۋىسى. ولاردىڭ دەنەسى كۇيىك شالىپ، اۋرۋحاناعا جەتكىزىلدى. سونىمەن قاتار، ولاردىڭ كورشىلەرى، 36 جاستاعى ەر ادام جانە 10 جاسار بالا جانعان زاتتاردان بولىنگەن يىسىنە ۋلانىپ، اۋرۋحاناعا جەتكىزىلدى. ءورتتى سوندىرۋگە الماتى وبلىسى مەن الماتى قالاسىنىڭ توتەنشە جاعدايلار دەپارتامەنتىنەن 33 ادام مەن 7 تەحنيكا جۇمىلدىرىلدى.

سوڭعى جاڭالىقتار