7 تامىز, 12:11 452 0 جاڭالىقتار اسىل تۇمار

COVID-19: نۇر-سۇلتاندا ناۋقاستاردىڭ 76 پايىزى ەمدەلىپ شىقتى

نۇر-سۇلتان قالاسى اكىمىنىڭ ورىنباسارى باقتيار ماكەننىڭ مەديتسينا ۇيىمدارىنىڭ باسشىلارىمەن كەڭەسى ءوتتى. كەزدەسۋ بارىسىندا كوروناۆيرۋس ينفەكتسياسى بويىنشا قازىرگى احۋال تالقىلاندى، – دەپ جازدى اكىمدىكتىڭ رەسمي سايتى.

بۇگىنگى كۇنى قالادا 12 530 كۆي جاعدايى تىركەلىپ، ونىڭ ىشىندە 9 629 ادام (76%) ەمدەلىپ شىقتى. كارانتين شارالارى مەن امبۋلاتوريالىق ەمدەۋدى كۇشەيتۋ ناتيجەسىندە ەمحانالاردا ەپيدەميولوگيالىق احۋال جاقسارىپ، پنەۆمونيامەن سىرقاتتانۋشىلىق تومەندەگەنى بايقالادى. پنەۆمونيامەن اۋىراتىن ناۋقاستار سانى بەس ەسە ازايدى.

«سونداي-اق كارانتين كەزىندە، ياعني 6 شىلدەدەن باستاپ ستاتسيونارلاردا ەمدەلىپ جاتقان ناۋقاستار سانى 4,4 ەسە ازايىپ، توسەك-ورىن قورىنىڭ جۇكتەمەسى 90%- ان 25%-عا دەيىن تومەندەدى. كوروناۆيرۋس ينفەكتسياسى راستالىپ اۋرۋحاناعا جاتقىزىلعاندار سانى 4,3 ەسە ازايدى. جەدەل جاردەم شاقىرۋ سانى 3 مىڭنان مىڭعا دەيىن تومەندەگەنى بايقالادى»، – دەلىنگەن قوعامدىق دەنساۋلىق ساقتاۋ باسقارماسىنىڭ حابارلاماسىندا.

كەڭەس قورىتىندىسى بويىنشا قالا اكىمىنىڭ ورىنباسارى باقتيار ماكەن قوعامدىق دەنساۋلىق ساقتاۋ باسقارماسى مەن مەديتسينا مەكەمەلەرىنىڭ باسشىلارىنا ازاماتتار تاراپىنان شاعىمدار تۋدىرعان ناۋقاستارعا ارنالعان ەلەكتروندى مەديتسينالىق سەرۆيس – DamuMed قوسىمشاسى مونيتورينگىن تۇراقتى نەگىزدە جۇرگىزىپ، ساپالى جۇمىسىن قامتاماسىز ەتۋدى تاپسىردى.

«بۇل ماسەلە DamuMed اقپاراتتىق جۇيەسىنىڭ جەتىلمەگەنى، سونداي-اق كورسەتىلگەن قىزمەت تۋرالى دارىگەرلەردىڭ جازباسىن كەش ەنگىزۋمەن بايلانىستى. نۇر-سۇلتان قالالىق قوعامدىق دەنساۋلىق ساقتاۋ باسقارماسى وسى باعدارلامانىڭ اكىمشىلىگىمەن بىرلەسىپ ءاربىر ناقتى جاعدايعا تالداۋ جۇرگىزەدى. سونىمەن قاتار قازىرگى ۋاقىتتا قارجىلىق پايدا الۋ ماقساتىنداعى جالعان جازبالاردىڭ ناقتى فاكتىلەرى تىركەلگەن جوق»، – دەپ حابارلادى قالالىق قوعامدىق دەنساۋلىق ساقتاۋ باسقارماسى.

سوڭعى جاڭالىقتار