7 تامىز, 09:55 426 0 جاڭالىقتار اسىل تۇمار

ەرالى توعجانوۆ بيولوگيالىق قاۋىپسىزدىك جونىندەگى كەڭەستىڭ وتىرىسىن وتكىزدى

بۇگىن قر پرەمەر-ءمينيسترىنىڭ ورىنباسارى ە.توعجانوۆ بەينەكونفەرەنتسيا بايلانىسى رەجيمىندە جەتەكشى وتاندىق عالىمدار مەن ساراپشىلاردىڭ قاتىسۋىمەن مەملەكەت باسشىسىنىڭ تاپسىرماسى بويىنشا قۇرىلعان بيولوگيالىق قاۋىپسىزدىك جونىندەگى كەڭەستىڭ وتىرىسىن وتكىزدى. بۇل تۋرالى قر ۇكىمەتىنىڭ رەسمي سايتى حابارلادى.

كەڭەستە ەلىمىزدىڭ بيوقاۋىپسىزدىگىنە قاتىستى وزەكتى ماسەلەلەر، وسى سالا بويىنشا جەكە زاڭ ازىرلەۋ، حالىقتى COVID-19-عا قارسى ۆاكتسينالاۋ، كادرلار دايارلاۋ، سونداي-اق عىلىمي زەرتتەۋلەر جۇمىسىن دامىتۋ قاجەتتىگى تالقىلاندى. ماسەلەلەردى تالقىلاۋ بارىسىندا عالىمدار مەن ساراپشىلار ەلىمىزدىڭ بيوقاۋىپسىزدىگىن ودان ءارى دامىتۋ بويىنشا جۇيەلى شارالاردى ازىرلەۋ ءۇشىن ديالوگتىق الاڭ رەتىندە قۇرىلعان كەڭەستىڭ ماڭىزدىلىعىن جوعارى باعالادى.

ءبىلىم جانە عىلىم مينيسترلىگى بيوقاۋىپسىزدىك جانە بيوتەحنولوگيا سالاسىندا ەلىمىزدە 12 عىلىمي ۇيىم جۇمىس ىستەيتىنىن، بۇگىنگى تاڭدا وسى ۇيىمدار اسا قاۋىپتى اۋرۋلارعا قارسى 68 ۆاكتسينا، بيولوگيالىق پرەپاراتتاردىڭ 52 ءتۇرىن ازىرلەگەنىن حابارلادى.

بۇل كەڭەس ۇزدىك الەمدىك پراكتيكالاردى قازاقستانعا ەنگىزۋ ءۇشىن بەدەلدى حالىقارالىق ۇيىمدارمەن، بيوقاۋىپسىزدىك جونىندەگى زەرتتەۋ ينستيتۋتتارىمەن ىنتىماقتاستىقتى جولعا قويادى، سونداي-اق باسىم باعىتتاردى دامىتۋ جونىندە ۇسىنىمدار ازىرلەي وتىرىپ، بيوقاۋىپسىزدىك سالاسىنداعى ءونىم ءوندىرۋدىڭ وتاندىق نارىعىنا تالداۋ جاسايدى.

پرەمەر-ءمينيستردىڭ ورىنباسارى پاندەميا جاعدايىندا بيولوگيالىق قاۋىپسىزدىك سالاسىن دامىتۋدىڭ ەرەكشە ماڭىزدىلىعىن اتاپ ءوتتى.

«كەڭەس جاڭا تەحنولوگيالاردى ەنگىزۋدى، تسيفرلاندىرۋدى، عىلىمي جاڭالىقتاردى، سونداي-اق بولاشاقتى بولجايتىن دەرەكتەردى ەسكەرە وتىرىپ، بيوقاۋىپسىزدىكتى دامىتۋ بويىنشا جۇيەلى ۇسىنىستار ازىرلەۋى ءتيىس. قىسقا مەرزىمدە بيوقاۋىپسىزدىك سالاسىنداعى كادرلاردىڭ قاجەتتىلىگىن انىقتاۋ، قازىرگى تالاپتاردى ەسكەرە وتىرىپ، وقۋ باعدارلامالارىن وزەكتەندىرۋ، سونداي-اق عىلىمي زەرتتەۋلەردىڭ باعىتتارى مەن تاقىرىپتارىن، ولاردىڭ پراكتيكالىق ماڭىزدىلىعىن كۇشەيتە وتىرىپ قايتا قاراۋ تالاپ ەتىلەدى. سونىمەن قاتار بيوقاۋىپسىزدىك ماسەلەلەرىن زاڭنامالىق رەتتەۋ ءۇشىن ءتيىستى زاڭ جوباسىن ازىرلەۋ قاجەت»، – دەدى ە.توعجانوۆ.

سوڭعى جاڭالىقتار