6 تامىز, 15:21 552 0 ەكونوميكا انار لەپەسوۆا

وتاندىق اۋە كومپانيالارىنىڭ تابىسى 1,5 ەسە كەمىدى

قازاقستان اۋە كومپانيالارىنىڭ تابىسى 1,5 ەسە ازايدى.

ەnergyprom.kz مالىمەتىنشە، 2020 جىلدىڭ قاڭتار-ماۋسىمىندا ەلىمىزدىڭ اۋە كومپانيالارى 2,3 ملن جولاۋشى تاسىمالدادى. بۇل ءبىر جىل بۇرىنعى كورسەتكىشتەن 35,8 پايىزعا از.

ال ماۋسىم ايىندا اۋە كومپانيالارى 480,6 مىڭ جولاۋشىعا قىزمەت كورسەتتى جانە كارانتين كۇشەيىپ تۇرعان مامىر ايىنا قاراعاندا جولاۋشىلار اعىنى 2,9 ەسەگە ارتتى. 2020 جىلدىڭ 1-جارتىجىلدىعىندا جولاۋشىلار اعىنى 3,8 ملرد جولاۋشى-شاقىرىم بولدى. بۇل ءبىر جىل بۇرىنعى كورسەتكىشتەن 1,9 ەسە كەم. دەگەنمەن، ماۋسىمدا مامىرعا قاراعاندا جولاۋشىلار اعىنى 2 ەسەدەن استامعا ارتىپ، 476,3 ملن جولاۋشى-شاقىرىمعا جەتتى.

وسى جىلدىڭ قاڭتار-ماۋسىمىندا اۋە كومپانيالارى 9,6 مىڭ توننا جۇك پەن قول جۇگىن تاسىمالدادى. دەگەنمەن، بۇل دا ءبىر جىل بۇرىنعى كورسەتكىشتەن 21,9 پايىز از بولىپ وتىر. ماۋسىمدا مامىرعا قاراعاندا جۇك تاسىمالىنىڭ كولەمى 12,5 پايىزعا ارتىپ، 1,8 مىڭ توننا بولدى.

اۋە كومپانيالارىنىڭ جارتى جىلدىڭ ىشىندەگى كىرىسى 99,2 ملرد تەڭگەگە جەتتى. الايدا وتكەن جىلى كومپانيالار مۇنان 1,5 ەسە كوپ، ياعني 170,1 ملرد تەڭگە تابىس تاپقان بولاتىن. ماۋسىمدا اۋە كومپانيالارىنىڭ كىرىسى 18,2 ملرد تەڭگەگە جەتىپ، مامىرمەن سالىستىرعاندا 2 ەسە ءوسىم كورسەتتى.

جالپى اۋە كومپانيالارىنىڭ نەگىزگى تابىسىن جولاۋشىلار تاسىمالى قۇرايدى. بۇل كورسەتكىش جارتى جىلدا 95,1 ملرد تەڭگەنى قۇرادى. ال قالعان 4,1 ملرد تەڭگە جۇك پەن قول جۇگىن تاسىمالداۋدان تۇسكەن.

 

سوڭعى جاڭالىقتار