6 تامىز, 16:09 570 0 اتاجۇرت باقىتبەك قادىر

733 قانداسىمىز ۇبت-عا ونلاين قاتىستى

شەتەلدەگى قانداستاردىڭ قازاقستاندا وقۋى ءۇشىن شاقىرۋ الۋ ماسەلەسى ءبىلىم جانە عىلىم مينيسترلىگى تاراپىنان جۇيەلى جولعا قويىلعان. ولاردىڭ ەلگە كەلىپ، ءبىلىم الىپ، كەيىننەن ماماندىعىنا قاراي جۇمىس ءىس­تەپ، وتباسىن قۇرىپ اتاجۇرتتا قالۋىنا جاعداي جاسالدى. دەسە دە، وزگە ەلدە ساۋات اشىپ، ورتا مەكتەپتى سىرتتا تامامداعان جاستارعا ەلىمىزدە ءبىر­دەن ۇبت تاپسىرۋ قيىنعا تۇسەتىنى راس. سول ءۇشىن ءبىلىم جانە عىلىم مي­نيسترلىگى تاراپىنان تالاپكەرلەردى ۇلتتىق بىرىڭعاي تەستىلەۋگە دايار­لايتىن دايىندىق ءبولىمى اشىلدى. 2018-2019 جىلدارى 992, 2019-2020 جىل­دارى 1 300 قانداسىمىز دايىندىق بولىمىنە قابىلداندى.

قانداستاردى وقۋعا قابىلداۋعا ارنالعان كۆوتا 2 پايىزدان، 4 پايىزعا ءوستى. اتاجۇرتتا ءبىلىم العىسى كەلەتىن تالاپكەر جاستاردىڭ سا­نى جىل سايىن ارتىپ كەلەدى. بيىل ۇبت تاپ­سىرۋعا 2025 قانداسىمىزدان ءوتىنىش كە­لىپ تۇسكەن. تالاپكەر جاستاردىڭ باسىم ءبو­لىگى ۇبت-نى ەل ىشىندە تاپسىردى.

«وتانداستار قورى» الەمدىك پاندەمياعا باي­لانىستى ەلگە كەلە الماي ۇبت تاپسىرۋ مۇمكىندىگىنەن شەت قالعان قانداس­تارى­مىز­دىڭ ماسەلەسىن كوتەرگەن بولاتىن. بۇل جۇ­مىس  ءۇش اي ۋاقىتقا سوزىلدى.

ناتيجەسىندە، ءبىلىم جانە عىلىم، سىرتقى ىستەر مينيسترلىكتەرىنىڭ، ۇلتتىق تەستىلەۋ ور­تالىعىنىڭ قولداۋىمەن، قازاقستان اۋ­ماعىندا كوروناۆيرۋس ينفەكتسياسىنىڭ پاي­دا بولۋى مەن تارالۋىنا جول بەرمەۋ ءجو­نىندەگى ۆەدومستۆوارالىق كوميسسيا وتى­رىسىندا شەتەلدە قالعان تالاپكەر قان­داس­تارعا ۇبت-نى ونلاين وتكىزۋ شەشىمى قابىل­دان­دى. بۇعان دەيىن ەلىمىزدە ۇبت ونلاين رە­جيمدە وتكىزىلمەگەن. «جۇمىلا كوتەرگەن جۇك جەڭىل» دەگەندەي، بىرىگىپ اتقارعان جە­مىستى قىزمەت اياسىندا 733 قانداسىمىز 19 ءشىل­دەدە ونلاين ۇبت-عا قاتىستى. قانداس تا­لاپكەرلەردىڭ ونلاين تەست تاپسىرۋىنا ات­سالىسقان بارشا ماماننىڭ قىزمەتىنە ريزاشىلىعىمدى بىلدىرەمىن»، – دەيدى «وتان­داستار قورىنىڭ» ۆيتسە-پرەزيدەنتى ما­عاۋيا سارباسوۆ.

شەتتەگى قانداس تالاپكەرلەرىمىز «وتان­داستار قورى» كوتەرگەن ماسەلەنىڭ وڭ شەشىم تابۋىنا ىقپال ەتكەن ۇلتتىق تەستىلەۋ ورتا­لىعى، سىرتقى ىستەر مەن ءبىلىم جانە عىلىم مينيسترلىگىنە العىسىن جەتكىزدى.

«بۇكىل الەمدى جايلاعان COVID-19 ءىن­دە­تىنە بايلانىستى شەكارا جابىلىپ، ءبىز قا­زاق­ستانداعى ۇلتتىق بىرىڭعاي تەستىلەۋگە قا­تىسۋ مۇمكىندىگىنەن شەت قالدىق. دەگەنمەن «وتانداستار قورى» ماسەلە كوتەرىپ، ۇلتتىق تەست ورتالىعى، سىرتقى ىستەر مينيسترلىگى مەن ءبىلىم جانە عىلىم مينيسترلىگىنىڭ قول­داۋىمەن شەتەلدە قالىپ قويعان قازاق با­لالارىنا ونلاين ۇبت تاپسىرۋعا رۇقسات بەرىلدى. بۇل بىزگە جاسالعان ۇلكەن جەڭىلدىك بولدى»، – دەيدى قازاق يننوۆاتسيالىق گۋما­نيتارلىق-زاڭ ۋنيۆەرسيتەتىنىڭ تىڭداۋشى­سى، بايان-ولگەي ايماعىنداعى قانداسىمىز ەرجان امانجول.

ەسكەرتە كەتەتىن جايت، قىتاي، موڭعوليا جانە وزبەكستانداعى قانداستار نازارىنا! ونلاين تاپسىرعان ۇبت ناتيجەلەرىن https://certificate.testcenter.kz/.  سايتىنان جسن، تجك ەنگىزىپ بىلە الادى. سودان كەيىن جوو-نىڭ ۆيرتۋالدى قابىلداۋ كوميسسياسىنا كونكۋرسقا قاتىسۋ ءۇشىن قۇجاتتاردى تاپ­سىرۋ قاجەت. كونتاكتىلەردى كەلەسى سىلتەمەدەن جۇكتەپ الۋعا بولادى http://www.testcenter.kz/press-tsentr/novosti/detail.php?ID=2059. تالاپكەرلەر 2020 جىلعى 19 شىلدەدە وتكىزىلگەن ونلاين تەستىلەۋ بارىسىنىڭ بەي­نە­جازباسىن ۇلتتىق تەستىلەۋ ورتالىعىنا جىبەرمەسە، تەست ناتيجەسى شىقپايدى. تەس­تىلەۋ ناتيجەسى بەينەجازبا قارالعاننان كەيىن عانا جارامدى. بەينەجازبا ۇلتتىق تەس­تىلەۋ ورتالىعىنىڭ nct-kt@mail.ru پوش­تاسىنا جىبەرىلمەگەن جاعدايدا، تەستىلەۋ ءنا­تيجەسى جويىلاتىن بولادى.

تالاپكەرلەر تەستتەن العان باعاسىنا قا­راي ەل ىشىندەگى وقۋ وردالارىنىڭ ستۋدەنتى اتا­نادى. بۇل ءار تالاپكەردىڭ تەستتەن العان ۇپايى­نىڭ ناتيجەسىنە قاراي جەكە قارا­لادى.

سوڭعى جاڭالىقتار