6 تامىز, 21:07 569 0 اتاجۇرت انار لەپەسوۆا

ىندەتتىڭ بەتى قايتۋىن تىلەپ، تاساتتىق جاسادى

رۋدنىي قالاسى مەن ونىڭ توڭىرەگىندەگى ەلدى مەكەندەردە بارلىعى 16 مىڭعا جۋىق قانداس تۇرادى.  اتامەكەنىم دەپ كەلگەن ولار وسىنداعى كەن ورنىنان، باسقا دا كاسىپورىنداردان جۇمىس تاۋىپ، ەشكىمگە قول جايماي، ءوزىنىڭ تىرشىلىگىن باستاعان. نەگىزىنەن وزبەكستاننان كەلىپ جاتقان قانداس اعايىن ارقاسىندا رۋدنىي قالاسى قازاقتانىپ، مەملەكەتتىك تىلدە ءبىلىم بەرەتىن مەكتەپ سانى كوبەيدى.

دۇنيەنى ءبىر تارىنىڭ قاۋىزىنا سىي­عىز­عان كوروناۆيرۋس ىندەتى ءبىزدىڭ ەلگە دە ناۋبەت بو­لىپ تۇر. بۇكىل جەر جۇزىندە وسى كەسەلگە قار­سى ءتۇرلى جۇمىستار ءجۇرىپ جاتىر. بىراق ءدال قازىر اۋرۋدىڭ ءبىرجولا بەتى قايتقان جوق. ادام شىعىنى بىزدە دە از ەمەس. جاقسى دا، جاي­ساڭ دا، كارى دە، جاس تا وسى اۋرۋدان و ءدۇ­­نيە­لىك بولدى. بۇل، ارينە حالقىمىزدىڭ جا­­نىن سىزداتادى. قازاقتىڭ كورگەن قۇ­قايى تەك بۇل ەمەس. ۇلت بولىپ ساقتالىپ قالۋى ءۇشىن قانداي جاۋمەن الىسپادى دەي­سىز؟ ۇلى دالادا مالدى دا، جاندى دا شى­بىن­داي قىرعان جۇت پەن جۇقپالى اۋرۋ سەكىلدى تا­بي­عاتتان كەلگەن اپات تا از بولماعان. سون­­داي كەزدە اتالارى­مىز مال سويىپ، تا­سات­تىق جاساپ، اللادان مەدەت سۇراعان. اتا­جۇرت­تاعى قۇتتى قونىسىن رۋدنىي قالا­سى­نان تاپقان قانداستار اتالارىمىز ۇستانعان وسى جولىمەن سيىر سويىپ، تاساتتىق جا­سادى. ونىڭ باسى-قاسىن­دا دۇنيەجۇزى قا­زاق­تارىنىڭ قاۋىمداستىعى مەن «وتانداستار» قورى وبلىستىق فيليالى­نىڭ بەلسەندى ءمۇ­شەلەرى ءجۇردى.

– دۇنيەجۇزىنە از ۋاقىتتا جايى­لىپ كەتكەن ۆيرۋس بۇكىل ادامزاتقا قاۋىپ ءتوندىردى. ەلىمىزدە وسى ىندەت­تىڭ قۇربانى كوبەيدى. اللاعا جال­بارىندىق، سيىر سويىپ، تاساتتىق جا­سادىق. اللا تىلەگىمىزدى بەرسىن، ەل ىرگەسى مىقتى بولسىن، ەل-جۇرت امان بولسىن دەپ تىلەدىك، – دەيدى نۇ­ريد­دين بۇكىرباەۆ اقساقال.

قازىر الەۋمەتتىك جەلىلەر ناعىز «جىل­دام حابار العىزىپ» تۇرعان كەز. بەل­سەندى توپ مۇشەلەرى WhatsApp-قا تا­ساتتىق جا­ساۋ تۋرالى حابارلاندىرۋ بەرگەننەن كەيىن-اق، جۇرت تيىن-تەبەنىن ورتاعا تاس­تاي باستادى. «كوپ تۇكىرسە – كول» ەمەس پە، شا­مالى ۋاقىت ءىشىن­دە ەداۋىر قارجى جينا­لىپ قالدى.

– قالالىق مەشىت يمامىمەن اقىلداسا وتى­رىپ، ەل-جۇرتتان تۇسكەن 400 مىڭ تەڭ­گەدەن اسا قارجىعا الدىمەن ءبىر سيىر ساتىپ الدىق. ونى باتا جاساپ، اللادان جالبارى­نىپ، تىلەك تىلەپ، سويىپ، اۋىرىپ تۇرعان، سورپا قاجەت ەتەتىن ادامدارعا، تۇرمىسى تومەن، كوپبالالى جانە ناۋقاس، مۇگەدەك با­عىپ وتىرعان 45 وتباسىعا تاراتتىق. قال­عان 4 وتباسىعا 10 مىڭ تەڭگەدەن بەردىك. ار­­­تىلعان 40 مىڭ تەڭگەنى جاساندى تىنىس الدىرۋ اپپاراتىن الۋعا قارجى جيناعان مەشىت يمامىنا وتكىزدىك، – دەيدى دۇنيەجۇزى قازاقتارىنىڭ قاۋىمداستىعى مەن «وتان­داستار قورى» وبلىستىق فيليالىنىڭ تاعى ءبىر بەلسەندىسى قىدىر وتەباەۆ.

اتاجۇرتقا كەلىپ جاتقان قانداستار ءناۋ­بەتكە قارسى بۇكىل دۇنيە كۇرەسىپ جاتقان كەزدە، وسىنداي اۋىزبىرلىكتىڭ، يماندى­لىق­تىڭ، ادامگەرشىلىكتىڭ ۇلگىسىن كورسەتتى.

 

ءنازيرا جارىمبەت،

قوستاناي وبلىسى

سوڭعى جاڭالىقتار