6 تامىز, 10:39 399 0 جاھان انار لەپەسوۆا

بانگلادەشتە سۋ تاسقىنىنان ميلليونداعان ادام باسپاناسىز قالدى

بانگلادەشتە بىرنەشە كۇن تولاسسىز جاۋعان جاۋىن  تاسقىنعا ۇلاسىپ، ميلليونداعان تۇرعىننىڭ باسپاناسى سۋ استىندا قالدى. 

باق دەرەگىنشە، بانگلادەشتىڭ 25 پايىزىن قىزىل سۋ باسقان. ايماقتاعى وزەن مەن كولدەر ارناسىنان اسىپ كەتكەن. مامانداردىڭ ايتۋىنشا، دجامۋنا وزەنىنىڭ سۋى قاۋىپتى دەڭگەيگە جەتتى.

اپات سالدارىنان 5 ميلليونعا جۋىق ادام زارداپ شەكتى، 135 ادام كوز جۇمدى. تۇتاس اۋداندار سۋ استىندا قالىپ، ءىرى اۆتوماگيسترالدار جابىلدى. جەرگىلىكتى تۇرعىنداردى قاتتى الاڭداتاتىنى - اۋىل شارۋاشىلىعى القاپتارىنىڭ جارامسىز كۇيگە ءتۇسۋى.  بارار جەر، باسار تاۋى قالماعان جەرگىلىكتى تۇرعىندار ۇكىمەتتەن ءتيىستى كومەك كورسەتىلمەگەنىن ايتىپ شاعىمدانۋدا. حالىقارالىق ۇيىمداردىڭ بولجامىنشا، ازىق-تۇلىك تاپشىلىعىمەن بەتپە-بەت كەلگەن وڭىرگە گۋمانيتارلىق داعدارىس قاۋپى ءتونىپ تۇر.

 

سوڭعى جاڭالىقتار