5 تامىز, 11:57 454 0 جاڭالىقتار اسىل تۇمار

پرەزيدەنت ليۆانداعى قازاقستاندىق ازاماتتاردىڭ قاۋىپسىزدىگىن قامتاماسىز ەتۋدى تاپسىردى

قر سىرتقى ىستەر ءمينيسترى مۇحتار تىلەۋبەردى بەيرۋتتا بولعان جارىلىسقا قاتىستى تۇسىنىكتەمە بەردى.

«ليۆانداعى بەيرۋت قالاسىنىڭ پورتىندا بىرنەشە جويقىن جارىلىس بولدى. قالالىق ينفراقۇرىلىمعا زيان كەلدى، ادام شىعىنى بار. جارىلىس تۋرالى اقپاراتتى العاننان كەيىن پرەزيدەنتىمىز قاسىم-جومارت توقاەۆ سىرتقى ىستەر مينيسترلىگىنە ليۆانداعى قازاقستاندىق ازاماتتاردىڭ قاۋىپسىزدىگىن قامتاماسىز ەتۋدى تاپسىردى»، – دەلىنگەن قر سىرتقى ىستەر مينيسترلىگىنىڭ پاراقشاسىندا جاريالانعان مۇحتار تىلەۋبەردىنىڭ تۇسىنىكتەمەسىندە.

ونىڭ دەرەگىنشە، قازىرگى ۋاقىتتا قازاقستاننىڭ 113 ازاماتى ليۆاندا كونسۋلدىق ەسەپتە تۇر.

«ديپلوماتتار ولارمەن بايلانىستا، قازاقستاندىقتاردىڭ اراسىندا زارداپ شەككەندەر جوق. وزدەرىڭىز بىلەتىندەي، ديپلوماتيالىق ميسسيا كەڭسەسىنە دە جارىلىستىڭ زيانى تيگەن بولاتىن. ول الداعى ۋاقىتتا قالپىنا كەلتىرىلەدى. قىزمەتكەرلەرىمىز بەن ولاردىڭ وتباسى مۇشەلەرى زارداپ شەككەن جوق. وزدەرىڭىز بىلەتىندەي، ليۆاندا بۇۇ بىتىمگەرشىلىك كونتينگەنتى بار. ونىڭ قۇرامىنا 120 قازاقستاندىق جاۋىنگەر كىرەدى. قازىر ولاردى روتاتسيالاۋ پروتسەسى ءجۇرىپ جاتىر جانە كۇنى كەشە عانا قازاقستاندىق بىتىمگەرلەر قىزمەت ەتەتىن ورىندارىنا امان-ەسەن جەتتى»، – دەدى مينيستر.

قازاقستاننىڭ ليۆانداعى بىتىمگەرشىلىك ميسسياسى 2018 جىلدىڭ قازان ايىندا بۇۇ-نىڭ مانداتىنا سايكەس، ليۆاندا قازاقستاندىق جانە ءۇندى بىتىمگەرلەرىن بىرلەسىپ ورىستەتۋ تۋرالى مەموراندۋمعا قول قويىلعاننان كەيىن باستالدى. وسى ايدىڭ باسىندا عانا قازاقستان ليۆانعا ءتورتىنشى بىتىمگەرلەر توبىن جىبەرگەن ەدى.

قورعانىس مينيسترلىگىنىڭ مالىمەتىنشە، بەيرۋتتاعى جارىلىس سالدارىنان قازاقستاندىق بىتىمگەرلەر زارداپ شەككەن جوق.

سوڭعى جاڭالىقتار