2 تامىز, 19:55 468 0 جاڭالىقتار اسىل تۇمار

بايقوڭىردا كارانتين تاعى ءبىر اپتاعا سوزىلدى

بايقوڭىر قالاسىندا كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى جەدەل شتاب وتىرىسىندا قالا اۋماعىندا كارانتين شارالارىن ۇزارتۋ جونىندە شەشىم قابىلداندى.

ەكى اپتا بۇرىن شۇعىل شتاب كارانتيندى 2 تامىزدان باستاپ جۇمسارتۋدى جوسپارلاعان ەدى.

ستاتيستيكاعا سەنسەك، شىلدە ايىندا اۋرۋ جۇقتىرۋ دەڭگەيى ءبىرشاما تومەندەگەن، بىراق بۇل كورسەتكىش ءالى ورنىقتى ەمەس. سوندىقتان شەكتەۋ شارالارى تاعى ءبىر اپتاعا، ياعني 9 تامىزعا دەيىن ۇزارتىلدى.

شۇعىل شتاب مۇشەلەرى ازىق-تۇلىككە جاتپايتىن تاۋارلاردىڭ تازا اۋاداعى ساۋداسىن قايتا جانداندىرۋ ۇسىنىسىن قولدادى.

وقشاۋلانۋ رەجيمىنىڭ ۋاقىتى – تۇنگى 23:00-دەن تاڭعى 06:00-عا دەيىن. 3 تامىزدان باستاپ بايقوڭىر قالاسىنا كىرەبەرىستەگى وتكىزۋ بەكەتىندە قاۋىپسىزدىك باسقارماسى مەن قالالىق اكىمشىلىك ماماندارى جۇمىس ىستەيدى. ولار تورەتام مەن اقاي ەلدىمەكەندەرى تۇرعىندارىنىڭ شۇعىل جاعدايدا قالاعا ءبىر مارتە كىرىپ-شىعۋىنا جانە قالا حالقىنىڭ قالادان شىعۋىنا رۇقسات بەرەتىن قۇجاتتاردى راسىمدەيدى.

«كەلەسى اپتانىڭ سوڭىنا قاراي شاھار اۋماعىندا كوروناۆيرۋس ينفەكتسياسى جاعدايىنىڭ دامۋ ءۇردىسى ايقىنىراق كورىنەدى. بۇل مەديتسينا ماماندارىنىڭ شەكتەۋ شارالارىن ءارى قاراي قاتايتۋ كەرەك پە، الدە جۇمسارتقان ءجون بە – سول جونىندە ناقتى شەشىم شىعارۋىنا مۇمكىندىك بەرەدى»، – دەپ اتاپ ءوتتى شۇعىل شتاب توراعاسى، بايقوڭىر قالاسى اكىمشىلىگىنىڭ باسشىسى كونستانتين بۋسىگين.

رەسمي مالىمەت بويىنشا، 31 شىلدەگە دەيىن قالادا 959 ادامنىڭ كوروناۆيرۋس جۇقتىرعانى بەلگىلى بولعان. 90 ادام ينفەكتسيالىق ستاتسيوناردا ەم الىپ جاتىر. 1 ماۋسىم مەن 31 شىلدە ارالىعىندا 351 ناۋقاس ىندەتتەن جازىلىپ، ۇيىنە شىققان، 60 سىرقات قايتىس بولعان.

سوڭعى جاڭالىقتار