2 تامىز, 12:40 475 0 جاڭالىقتار اسىل تۇمار

«Nur Otan» پارتياسى مەديتسينا عالىمدارىنىڭ باسىن قوستى

الەمنىڭ بارشا دارىگەرلەرى مەن عالىمدارى كوروناۆيرۋس ىندەتىن توقتاتۋ ءارى جۇقتىرعانداردى ەمدەۋ جولىن ىزدەۋدە. ىندەتتىڭ باستالعانىنا ءبىرشاما ۋاقىت وتسە دە ءوزىن جاقسى جاعىنان كورسەتكەن نە ەمدەۋ ءادىسى، نە بىرىڭعاي پىكىر ءالى دە جوق.

جينالعان جۇمىس تاجىريبەسىن تالداپ قورىتۋ ءارى وزىق تاجىريبەلەر جونىندە اقپارات الۋ ماقساتىندا الماتى قالاسى ءماسليحاتىنىڭ دەپۋتاتى زياتدين كاسانوۆ «Nur Otan» پارتياسى الماتى قالالىق فيليالىمەن بىرلەسىپ، الماتى قالاسىنا مەديتسينا عىلىمىنىڭ دوكتورى، كلينيكالىق ميكروبيولوگ، «Medicana International Istanbul» (تۇركيا) كلينيكاسىنىڭ ۆيرۋستىق اۋرۋدى زەرتتەۋ جانە ەمدەۋ بويىنشا جەتەكشى مامانداردىڭ ءبىرى دوكتور دجەنگيز ۋزۋن (Dr. Cengiz Uzun) مىرزانى ارنايى شاقىرتقان.

بۇل شارانى وتكىزۋدىڭ باستى ماقساتى حالىقارالىق ساراپشىلارمەن تاجىريبە الماسۋ، قازاقستاندىق مامانداردى COVID-19 بويىنشا زاماناۋي جولمەن دياگنوز قويۋ جانە ەمدەۋ ادىستەرىمەن ءبولىسۋ.

شەبەرلىك سىنىبىندا تانىمال عالىم «COVID-19 ۆيرۋسىنان ەمدەۋدىڭ زاماناۋي جولدارى» اتتى بايانداماسىن وقىدى. ول ىندەتتىڭ الدىن-الۋ جانە باقىلاۋ مەحانيزمى، جۇقتىرعانداردى انىقتاۋ الگوريتمى جانە وقشاۋلاۋ، ەپيدەميولوگيالىق زەرتتەۋ ادىستەرى، ەمدەۋ، دياگنوز قويۋ جانە مەديتسينالىق قىزمەتكەرلەرىن ىندەتتى جۇقتىرۋدان ساقتاۋ ەرەجەلەرى تۋرالى ءسوز ەتتى.

سونىمەن قاتار سپيكەر رەتىندە «ورحۋن مەديكال» دو ديرەكتورىنىڭ مەديتسينالىق ماسەلەلەرى جونىندەگى ورىنباسارى، ساۋلەلىك دياگنوستيكا دارىگەرى ماكسيم گولۋشكين جانە دارىگەر-تەراپەۆت ايدوس سىيقىمباەۆ ءسوز سويلەدى.

– ەڭ الدىمەن ءماسليحات دەپۋتاتى زياتدين كاسانوۆ پەن «Nur Otan» پارتياسىنىڭ الماتى قالالىق فيليالىنا وسىنداي قاجەت ءارى قىزىقتى ماستەر-كلاسستى ۇيىمداستىرعانىنا العىسىمدى بىلدىرەمىن. بۇگىنگى شارا بارلىق سانيتارلىق نورمالار مەن حاتتامالاردى ساقتاي وتىرىپ ۇيىمداستىرىلعان. ەنگىزىلگەن كارانتين جانە جۇقتىرعانداردى ەمدەۋ شارالارى ىندەتتى جاقىن ارادا جويادى دەپ سەنەمىن، – دەدى ايدوس سىقىمباەۆ.

شاراعا الماتى قالاسىنىڭ دەنساۋلىق ساقتاۋ جۇيەسىنىڭ 30 استام ماماندارىنىڭ قاتىستى.

– قازاق ەلىنە كەزدەيسوق ەمەس، كاسىپكەر، ءماسليحات دەپۋتاتى زياتدين كاسانوۆ مىرزانىڭ شاقىرۋىمەن كەلدىم. ارىپتەستەرىممەن ۆيرۋستى جۇقتىرعانداردى انىقتاۋ، وقشاۋلاۋ ءارى ەمدەۋ بويىنشا جينالعان تاجىريبەممەن بولىسكەنىمە قۋىنىشتىمىن. ماستەر-كلاسس تاجىريبە الماسۋ فورماتىندا ءوتتى. مەن دە وسى سالاداعى قازاقستاندىق مامانداردان كوپ نارسە ۇيرەندىم. سونداي-اق زياتدين كاسانوۆ مىرزامەن ىندەتپەن كۇرەسۋدى جەتىلدىرۋ بويىنشا ورتاق جوسپارلارىمىز بار. ول تۋرالى جاقىن ارادا بىلەتىن بولاسىزدار، – دەپ قورىتىندىلادى دجەنگيز ۋزۋن.

سوڭعى جاڭالىقتار