23 شىلدە, 09:17 1012 0 ساياسات ارايلىم بيمەنديەۆا

حالىقتىڭ سەنىمى بارىنەن دە ماڭىزدى

مەملەكەت باسشىسى قاسىم-جومارت توقاەۆتىڭ «حالىق ۇنىنە قۇلاق اساتىن مەملەكەت»  تۇجىرىمداماسى كوپتەگەن ماسەلەگە قوزعاۋ سالىپ، قالىڭ ەل تاراپىنان قولداۋ تاۋىپ وتىر. قاراپايىم جۇرت كوكەيدەگى مۇڭ-زارى مەن ءوتىنىش-شاعىمىنىڭ مەملەكەت قۇلاعىنا جەتكەنىن قالايدى. پرەزيدەنتتىڭ باستاماسىمەن بىلتىر پرەزيدەنت اكىمشىلىگىنىڭ وتىنىشتەردى قاراۋدى باقىلاۋ ءبولىمى قۇرىلعانى ەسىمىزدە. سودان بەرگى ءبىر جىل ۋاقىت ىشىندە ءبولىم قانشا ادامنىڭ ماسەلەسىن شەشۋگە كومەكتەستى، حالىق ۇنىنە قۇلاق اساتىن مەملەكەتتى قالىپتاستىرۋداعى جۇمىسى قانداي ناتيجە بەردى دەگەن سۇراقتارعا ءبولىم باسشىسىنىڭ ورىنباسارى دانيار قادىروۆ جاۋاپ بەردى.

– مەملەكەت باسشىسىنىڭ تۇجىرىم­دا­ماسى ازاماتتار مەن مەملەكەت اراسىنداعى ديا­لوگتىڭ، ءوزارا بايلانىس پەن ىنتىماق­تاستىقتىڭ جاڭا نەگىزىن قۇرايدى. ازامات­تار وتىنىشىنە جەدەل ءارى ءتيىمدى جاۋاپ بەرۋ –تۇجىرىمدامانىڭ ءبىر اسپەكتىسى عانا. حالىقپەن تىكەلەي جۇمىس ىستەي ءجۇرىپ كوپتەگەن ادام ءۇشىن پرەزيدەنت اكىم­شى­لىگىنىڭ قابىلداۋ ءبولىمى  ماسەلەسىن شەشۋدىڭ سوڭعى ءۇمىتى ەكەنىنە كۋا بولدىم. ولار بىزگە ۇلكەن سەنىممەن كەلەدى، سوندىقتان جاۋاپ­كەر­شىلىكتى سەزىنە وتىرىپ، ماسەلەنى شەشۋدىڭ زاڭدى مۇمكىندىگىن تابۋعا تىرىسامىز. ءبولىم اشىلىپ، جۇمىس ىستەگەن ءبىر جىلدان كەيىن ءبىز بەلگىلى ناتيجەگە جەتتىك دەپ سەنىممەن ايتا الامىن، – دەيدى دانيار قادىروۆ.

ونىڭ ايتۋىنشا، ءبولىم ازاماتتار مەن مەملەكەتتىك ورگاندار اراسىنداعى بايلا­نىس ساپاسىن ارتتىرۋ ءۇشىن حالىقتان كەل­گەن ءوتىنىش-شاعىمدارمەن جۇمىس ىستەۋدىڭ بىرەگەي ەكوجۇيەسىن قۇرۋدى كوز­دەيدى. ءبولىمنىڭ مىندەتى – مەملەكەتتىك ور­گان­دار مەن حالىق اراسىنداعى ءوزارا ارە­كەتتەس­تىكتىڭ تۇبەگەيلى جاڭا ساپاسىن قا­لىپ­تاستىرۋ.

«ءبولىم ازاماتتاردى قابىلداۋدىڭ ەكى فورماتىن قاراستىرادى: پرەزيدەنت اكىمشىلىگىنىڭ فرونت-كەڭسەسىندەگى قابىلداۋ جانە پرەزيدەنت كومەكشىسىنىڭ  كوشپەلى قابىلداۋى. قابىلداۋعا جازىلعان  كەز كەل­گەن ازاماتتىڭ تاڭداۋ جاساۋ قۇقىعى بار، ياعني ول نۇر-سۇلتانعا كەلىپ ءوتىنىشىن اۋىزشا ايتا الادى نەمەسە ءوز وڭىرىندەگى اكىمدىك پەن پرەزيدەنت اكىمشىلىگىنىڭ فرونت-كەڭسەسى اراسىنداعى بەينەكونفە­رەن­تسيا  ارقىلى قابىلداۋعا قاتىسا الادى. سونىمەن قاتار ءوزى تۇراتىن وڭىردە پرەزي­دەنت كومەكشىسى كوشپەلى قابىلداۋ وتكىزگەن­دە قابىلداۋىنا كىرە الادى.  ەگەر ادامنىڭ دەنساۋلىعى، قارجىلىق، وتباسىلىق جاع­دايى نەمەسە ۋاقىتىنىڭ جەتىسپەۋى سىندى سەبەپتەرگە بايلانىستى نۇر-سۇلتانعا كەلۋگە مۇمكىندىگى بولماسا دا، ءبىز وعان ءاردايىم قولجەتىمدىمىز. بۇل، اسىرەسە نۇر-سۇلتان قالاسىنا، پرەزيدەنت اكىمشىلىگىنىڭ فرونت-كەڭسەسىنە كەلۋگە قارجىلىق مۇمكىن­دىگى جوق الەۋمەتتىڭ ءالسىز ازاماتتا­رى­نا قاتىس­تى»، – دەيدى ول.

جالپى، بولىمدە ازاماتتاردى قابىلداۋ­دى پرەزيدەنتتىڭ كومەكشىسى نەمەسە ونىڭ ورىنباسارلارى عانا جۇرگىزەدى. ءوتىنىشتى قاراۋعا قۇزىرەتىنە بەلگىلى ءبىر ازاماتتىڭ ءوتىنىشىن قاراۋ ماسەلەسى كىرەتىن مەملەكەتتىك ورگان وكىلدەرى دە قاتىسادى.  ءوتىنىش بەرۋشىنىڭ كوتەرگەن ماسەلەسى سول جەردە شەشىلەتىن جاعدايلار دا كەزدەسەدى ەكەن.

ءبولىم باسشىسىنىڭ ورىنباسارى ءبىر­لەسكەن جۇمىسقا ازاماتتىق قوعام ينس­تيتۋتتارى دا تارتىلعانىن ايتتى. قازاق­ستان زاڭگەرلەر پالاتالارى قاۋىمداستىعى­نىڭ وكىلدەرى كەلىپ تۇسكەن وتىنىشتەرگە تاۋەلسىز ساراپتاما جۇرگىزىپ، ءتيىستى قورى­تىندى دايىندايدى، ول قورىتىندى پرو­كۋراتۋرا، قۇقىق قورعاۋ، ورتالىق جانە جەرگىلىكتى اتقارۋشى ورگاندارعا جىبەرىلەدى. بۇل ورايدا بىلتىر قالىپتاسقان ءتاجىري­بەنىڭ جوعارى تيىمدىلىگىن اتاپ وتۋگە بولادى.  مىسالى، جەكەلەگەن وتىنىشتەر بويىنشا، ازاماتتىق قوعاممەن ءوزارا ارەكەتتەسۋدىڭ ارقاسىندا پروكۋروردىڭ ارەكەت ەتۋ اكتى­لەرىن ەنگىزۋگە قول جەتكىزىلدى، ال سوت ورگان­دارى الدىڭعى سوت شەشىمدەرىن قايتا قارا­دى. سونىمەن قاتار ازاماتتاردى قابىلداۋ كەزىندە تارتىلعان زاڭگەرلەر مىڭعا جۋىق تەگىن زاڭگەرلىك كەڭەس بەرگەن.

ءبولىم جۇمىس ىستەگەن ءبىر جىلدىڭ ىشىندە قابىلداۋعا 1 777 ازامات كەلگەن. ال 2019 جىل­­دىڭ 21 قاراشاسىندا ءبولىم باستا­ماسىمەن تۇڭعىش رەت بىرىڭعاي قابىلداۋ كۇنى وتكىزىلدى. ول كۇنى ورتالىق مەملەكەتتىك ورگانداردىڭ باسشىلارى مەن بارلىق دەڭگەيدەگى اكىمدەر ازاماتتاردى جەكە قابىلدادى. بىرىڭعاي قابىلداۋ كۇنىندە رەسپۋبليكا بويىنشا قابىلداۋ ورگان­دارى­نا 14 مىڭنان استام ادام جۇگىنىپتى.

ءبولىم بۇگىنگى تاڭدا پاندەمياعا بايلا­نىس­تى وتىنىشتەردى بەينەكونفەرەنتسيا ارقىلى  قابىلداپ جاتىر. ال پرەزيدەنتكە ءوتى­نىش ايتۋشىلار سانى كوپ-اق. مىسالى، ماۋ­سىم ايىندا پرەزيدەنت كومەكشىسى تا­مارا دۇيسەنوۆا ەلىمىزدىڭ 7 وڭىرىنەن 55 ادام­دى قابىلدادى. بۇگىنگى قيىن كەزەڭدە ءوتى­نىشتەردىڭ اراسىندا شۇعىل شەشۋدى تا­لاپ ەتەتىندەرىن ساراپتاۋ كۇشەيتىلدى جانە ول ماسەلەنى جەدەل تۇردە شەشۋگە نازار اۋ­دا­رىلادى. سەبەبى ءبولىمنىڭ نەگىزگى مىندەتى – وسىناۋ قيىن كەزەڭدە وتىنىشتەردى ساپالى جانە ۋاقىتىلى قاراۋدى قامتاماسىز ەتۋ.

ءبولىم ازاماتتاردى قابىلداپ، ءوتىنىشىن قاراۋدان بولەك، اي سايىن مەملەكەتتىك ورگانداردىڭ ازاماتتاردى قالاي  قابىل­دايتىنىنا دا باقىلاۋ جۇرگىزەدى. ەگەر مەملەكەتتىك ورگانداردىڭ اراسىندا ازامات­تارعا ارناپ قابىلداۋ وتكىزبەيتىن نەمەسە ازاماتتاردى قابىلداۋعا تىركەمەي جاتقانى تۋرالى دەرەكتى انىقتاسا، بىردەن ول ماسە­لەنى زەرتتەپ، ناقتى شارا قابىلدانادى. بولا­شاقتا بۇل تاجىريبەنى دە وبلىس اكىم­دىك­تەرى دەڭگەيىندە تاراتۋ جوسپارلانىپ وتىر ەكەن.

دانيار قادىروۆتىڭ ايتۋىنشا، بولىمگە تۇسكەن وتىنىشتەردىڭ 47 پايىزى الماتى، اق­مولا، قوستاناي، جامبىل جانە تۇركىستان وبلىستارىنان كەلگەن.  ولاردىڭ باسىم بولىگى (68,8%) كوممۋنالدىق قىزمەت، الەۋ­مەتتىك قورعاۋ، تۇرعىن ءۇي جانە جەر ءما­سە­لەلەرىن كوتەردى.

– ازاماتتاردىڭ كوتەرەتىن ماسەلەنى ال­دىن الا جان-جاقتى زەرتتەپ العانى وزدە­رىنە پايدالى. قابىلداۋ سول ازاماتتاردىڭ ءوزى مۇقيات دايىندالىپ كەلگەن كەزدە عانا ماعىنالى بولاتىنىن ايتقىم كەلەدى، – دەيدى ول.

ءبولىم وتىنىشتەردى قاراۋ ساپاسىن جاق­سارتۋعا باسىمدىق بەرىپ وتىر. ەگەر بىرنەشە ازاماتتىڭ ءوتىنىشى ءبىر-ءبىرىن قايتالايتىن بولسا، وندا ءبولىمنىڭ قولداۋىمەن مەكەمەارالىق ۇيلەستىرۋ جۇزەگە اسىرىلادى، ونىڭ ىشىندە ناقتى پروبلەمالار بويىنشا جۇمىس توپتارى قۇرىلادى. مۇنداي مى­سال­دى  ۇلەسكەرلەر وتىنىشتەرىنە قاتىستى كەل­تىرۋ­گە بولادى.  بۇل رەتتە ءبولىم قىزمەت­كەر­لەرىنىڭ ۇسىنىسى بويىنشا مەملەكەتتىك ورگانداردان باستاپقى ماتەريالداردى قالپىنا كەلتىرۋ جانە تالداۋ تاجىريبەسى ەنگىزىلدى. ادەتتە، بۇل ينسپەكتسيالىق حات­تامالار، ساراپشىلاردىڭ پىكىرلەرى، وتى­رىستاردىڭ حاتتامالارى، تيپتىك كەلىسىم­شارتتار جانە ت.ب.

وسىلايشا، مەملەكەتتىك ورگانداردىڭ وتىنىشتەردى قاراۋ ساپاسىن باعالاۋ بولىمگە بەرىلگەن جاۋاپقا عانا ەمەس، بىراق مەم­لە­كەتتىك ورگاندار جۇرگىزەتىن جۇمىستاردىڭ بارلىق سپەكترىنە نەگىزدەلەدى.

– جوعارىدا اتاپ وتكەنىمدەي، قاجەت بول­عان جاعدايدا ءوتىنىش بەرۋشىنىڭ سۇراعى بويىنشا، سونداي-اق مەملەكەتتىك ورگان­داردىڭ جاۋاپتارى بويىنشا قۇقىقتىق ساراپتاما جۇرگىزىلەدى. سونىمەن قاتار ءبولىم قىزمەتكەرلەرى مەملەكەتتىك ورگان­داردىڭ دالەلدەرىن ەكى رەت تەكسەرۋ ءۇشىن ءوتىنىش بەرۋشىلەرمەن مىندەتتى تۇردە بايلانىسقا شىعادى. تۇرعىندار وتىنىشىنە نەگىزدەلگەن ماسەلەلەر شەشىلگەن سوڭ  شاعىم ءجيى ايتىلاتىن قۇرىلىمنىڭ جۇمىسىنا  شاعىن تەرگەۋ جۇرگىزەمىز. سەبەبى ءبىز كو­تەرىلگەن ماسەلەلەردىڭ  تۇپكى سەبەبىن انىق­تاۋعا تىرىسامىز. سونداي جاعدايدا كوبىنە-كوپ ادامي فاكتورعا تاپ بولامىز، ياعني بىرەۋ  قىزمەتىنە نەمقۇرايدى قارايدى، قا­تەلىك جىبەرەدى، لاۋازىمىن تەرىس پايدا­لانادى نەمەسە مۇلدە ارەكەت ەتپەگەن بولىپ شى­عادى.  سوندىقتان ءبىز فورماليزم فاك­تىلەرىمەن، قىزمەتتىك مىندەتىنە نەمقۇرايلى قاراۋشىلارمەن دە كۇرەسىپ جاتىرمىز، – دەيدى دانيار رامازانۇلى.

ەڭ باستىسى، ءبولىم قۇرىلعالى بەرى ءوت­كەن ءبىر جىلدا مول تاجىريبە جينالدى. ەندى وڭىرلەردەگى تۇرعىندار ءوتىنىشىن قاراۋ جۇ­مىسىن باستاعان وبلىس اكىمدىكتەرىندەگى ۇقساس بولىمدەر دە وسىنداي فاكتىلەردى انىق­تاۋعا جانە ۋاقىتىلى جاۋاپ بەرۋگە جۇ­مىل­دىرىلماق.  بۇل رەتتە بولىمدە قىز­مەتكەر­لەرىنىڭ داعدىسى، ءبىلىمى مەن ءتا­جىريبەسى باسقا مەملەكەتتىك ورگاندار ارا­سىندا تارا­تىلاتىن ادىسناماعا نەگىز ەتىپ الىنباق.

سوڭعى جاڭالىقتار