10 شىلدە, 22:23 23153 0 ءبىلىم انار لەپەسوۆا

"ايماعامبەتوۆ ويلانۋى ءتيىس": پرەزيدەنت مەكتەپتەگى تاربيە جۇمىستارىن كۇشەيتۋدى تاپسىردى

ءبىلىم بەرۋ ىسىندە بالالاردى قورشاعان ورتانى قورعاۋعا تاربيەلەۋ ماسەلەسى نازاردان تىس قالماۋى كەرەك. بۇل جونىندە ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقاەۆ ايتتى. 

«ادامدارعا جىلدار بويى تابيعاتتى لاستاماۋ كەرەكتىگى تۇسىندىرىلمەگەن. بۇل ءبىر. ەكىنشىدەن جانۋارلار الەمى تۋرالى. جاقىندا ماڭعىستاۋ وبلىسىنىڭ اقتاۋ قالاسىندا ءبىر وقيعا بولدى. وندا ادامدار يتبالىقتاردى تاياقپەن، تاسپەن ۇرىپ ءجۇر. ەكىنشى جاعىنان بالالار مەن جاسوسپىرىمدەردى بۇل قىلىقتارى ءۇشىن تاعى كىنالاي المايسىڭ. سەبەبى ۇيدە بولسىن، مەكتەپتە بولسىن ولارعا بۇل ارەكەتتىڭ دۇرىس ەمەستىگىن ەشكىم دە تۇسىندىرمەگەن. مەن ءيتتى قىلقىندىرىپ، كۇشىكتى ورتەپ جىبەرەتىن «قاتارداعى» جاعدايلاردى ايتىپ تۇرعان جوقپىن. مەنىڭ ويىمشا، ايماعامبەتوۆ ء(بىلىم جانە عىلىم ءمينيسترى) بۇل ماسەلەگە بايلانىستى ويلانۋى ءتيىس»، - دەدى مەملەكەت باسشىسى.

ەسكە سالا كەتسەك، 6 شىلدە كۇنى الەۋمەتتىك جەلىدە دەمالىپ جاتقان ادامدار كاسپي يتبالىعىنا تاس لاقتىرعان ءساتى تاسپالانعان  ۆيدەو تارادى. اتالعان دەرەك بويىنشا  ماڭعىستاۋ وبلىسىنىڭ ورمان شارۋاشىلىعى جانە جانۋارلار الەمى اۋماقتىق ينسپەكتسياسى وبلىستىق پوليتسيا دەپارتامەنتىنە حات جولداپ،  جانۋاردى قورلاعان ادامداردى جاۋاپكەرشىلىكە تارتۋدى ءوتىندى.

كوپ ۇزاماي قر ەكولوگيا، گەولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار الەمى كوميتەتىنىڭ ءباسپاسوز حاتشىسى ساكەن دىلداحمەت  يتبالىقتى قورلاعان قاسكويلەر قىلمىستىق جاۋاپكەرشىلىككە تارتىلعانىن حابارلادى.

 

سوڭعى جاڭالىقتار