10 شىلدە, 12:22 820 0 جاڭالىقتار اسىل تۇمار

قازاقستاندا كوروناۆيرۋستان دا قاۋىپتى پنەۆمونيا تاراعانى راس پا – مينيسترلىك ءتۇسىندىردى

قىتايدىڭ بۇقارالىق اقپارات قۇرالدارى قازاقستاندا كوروناۆيرۋستان اناعۇرلىم قاۋىپتى پنەۆمونيا تاراعانى تۋرالى مالىمەت تاراتتى. قازاقستاننىڭ دەنساۋلىق ساقتاۋ مينيسترلىگى بۇعان قاتىستى تۇسىنىك بەردى.

«قىتايدىڭ كەيبىر بۇقارالىق اقپارات قۇرالدارىندا قازاقستاندا كوروناۆيرۋسقا قاراعاندا، ءولىم-جىتىمگە اناعۇرلىم كوبىرەك الىپ كەلەتىن بەلگىسىز پنەۆمونيا انىقتالعانى تۋرالى اقپارات تاراپ جاتىر. قازاقستان رەسپۋبليكاسىنىڭ دەنساۋلىق ساقتاۋ مينيسترلىگى اتالعان اقپارات شىندىققا جاناسپايتىنىن ءمالىم ەتەدى.

دۇنيەجۇزىلىك دەنساۋلىق ساقتاۋ ۇيىمى اۋرۋلاردىڭ حالىقارالىق تىزىلىمىنە – احت-10-عا پنەۆمونيانى ەسەپكە الاتىن كودتار ەنگىزدى. مىسالعا، «كۇڭگىرت شىنى» سيمپتومى كەزىندە وكپەنىڭ زاقىمدانۋىندا، كۆي كلينيكالىق جانە ەپيدەميولوگيالىق تۇردە داگنوستيكالانادى، بىراق زەرتحانالىق تۇردە راستالمايدى.

وسى رەتتە، قازاقستان وزگە ەلدەر سياقتى وسىنداي پنەۆمونيا تۇرىنە مونيتورينگ جانە ەسەپ جۇرگىزەدى. بۇل، كوروناۆيرۋس ينفەكتسياسىنا شالدىعۋ جانە ونىڭ تارالۋ جاعدايىن تۇراقتاندىرۋعا باعىتتالعان باسقارۋشىلىق شەشىمدەردى ۋاقىتىلى قابىلداۋعا مۇمكىندىك بەرەدى.

9 شىلدە كۇنى قازاقستاننىڭ دەنساۋلىق ساقتاۋ ءمينيسترى الەكسەي تسوي پنەۆمونيا بويىنشا جالپى ەلدەگى ساندار تۋرالى ايتتى: سونىڭ ىشىندە باكتەريا، زەڭ، ۆيرۋس تۋدىراتىندار، سونىڭ ىشىندە اكحت-10 تىزىلىمىنە سايكەس «بەلگىسىز ەتيولوگياداعى ۆيرۋستى پنەۆمونيا» بار. وسىلايشا، قر دەنساۋلىق ساقتاۋ مينيسترلىگى قىتايلىق باق-تىڭ حابارلاماسى شىندىققا جاناسپايتىنىن ءمالىم ەتەدى»، – دەدى ۆەدومستۆودان.

سوڭعى جاڭالىقتار