10 شىلدە, 11:35 556 0 جاڭالىقتار اسىل تۇمار

جىل باسىنان بەرى ۇلتتىق ەكونوميكا كۇردەلى جاعدايدا دامىپ كەلەدى – پرەزيدەنت

مەملەكەت باسشىسى قاسىم-جومارت توقاەۆ ۇكىمەتتىڭ كەڭەيتىلگەن وتىرىسىندا قانداي ماسەلەلەر قارالاتىنىن ايتتى، – دەپ جازدى قازاقپارات.

«بۇگىن ءبىز كوروناۆيرۋس ىندەتىنە قارسى قابىلدانىپ جاتقان شارالارعا قاتىستى ماسەلەلەردى قارايمىز. سونىمەن قاتار، بيىلعى ءبىرىنشى جارتىجىلدىقتاعى ەلىمىزدىڭ الەۋمەتتىك-ەكونوميكالىق دامۋىن قورىتىندىلايمىز. جىل باسىنان بەرى ۇلتتىق ەكونوميكا كۇردەلى جاعدايدا دامىپ كەلەدى. ەل ەكونوميكاسى جالپى 1,8 پايىزعا تومەندەدى. پاندەمياعا بايلانىستى قىزمەت كورسەتۋ سالاسى ايتارلىقتاي قۇلدىرادى (5,6 پايىز). حالىقتى جانە بيزنەستى قولداۋ ءۇشىن اسا ماڭىزدى شارالار قابىلدادىق. مەنىڭ تاپسىرمام بويىنشا ەكونوميكالىق ءوسىمدى قايتا قالپىنا كەلتىرۋ جونىندە كەشەندى جوسپار قابىلداندى. بۇگىن ۇكىمەت پەن اكىمدەردىڭ ەكونوميكالىق ءوسىمدى قالپىنا كەلتىرۋ جانە حالىقتىڭ ءال-اۋقاتىن قامتاماسىز ەتۋ جونىندە قابىلداعان شارالارىن تالقىلايمىز»،  – دەدى ق.توقاەۆ كىرىسپە سوزىندە.

پرەزيدەنت ۇكىمەتتىڭ كەڭەيتىلگەن وتىرىسىن كەلەسى تارتىپپەن وتكىزۋدى ۇسىندى: ەلىمىزدىڭ الەۋمەتتىك-ەكونوميكالىق دامۋىنىڭ قورىتىندىلارى مەن جىل سوڭىنا دەيىن ورىندايتىن مىندەتتەر جونىندە پرەمەر-مينيستر اسقار مامين بايانداما جاسايدى.

اقشا-نەسيە ساياساتىنا قاتىستى شارالار تۋرالى ۇلتتىق بانكتىڭ توراعاسى ەربولات دوساەۆ باياندايدى.

ەلىمىزدەگى ەپيدەميولوگيالىق احۋالدى جاقسارتۋ جونىندەگى شارالار تۋرالى دەنساۋلىق ساقتاۋ ءمينيسترى الەكسەي تسوي باياندايدى.

«سوسىن بىرقاتار وبلىستىڭ باسشىلارىنا ءسوز بەرەمىن. قاجەت بولسا، باسقالارعا دا ءسوز بەرىلەدى. قىسقا ءارى نۇسقا، نەگىزگى ماسەلەلەرگە توقتالىڭىزدار»، – دەدى مەملەكەت باسشىسى.

 

سوڭعى جاڭالىقتار