9 شىلدە, 17:22 695 0 جاڭالىقتار انار لەپەسوۆا

جامبىل وبلىسىندا «پاراتسەتامولدى» بازاردا ءتيىستى رۇقساتسىز ساتقاندار ۇستالدى

ءدارىحانالاردى تەكسەرۋ بارىسىندا ءدارى-دارمەكتەر باعاسىن نەگىزسىز قىمباتتاتۋ، كاسسالىق اپپاراتتاردى ادەيى ءوشىرۋ دەرەكتەرى انىقتالدى.

قر سىبايلاس جەمقورلىققا قارسى ءىس-قيمىل اگەنتتىگىنىڭ پاراساتتىلىق دەپارتامەنتىنىڭ ديرەكتورى عانيجان اسانۇلىنىڭ ايتۋىنشا، ەلوردا ءدارىحانالاردا مونيتورينگ قورىتىندىسى بويىنشا «املوديمەد» پرەپاراتىنىڭ باعاسىن 327 تەڭگەگە، ال «تسەف-3» پرەپاراتىنىڭ باعاسىن 2 950 تەڭگەگە كوتەرۋ فاكتىلەرى انىقتالعان.

ال جامبىل وبلىسىندا ءدارىحانالاردا تاپشى بولىپ وتىرعان «پاراتسەتامولدى» بازارلاردا ءتيىستى رۇقساتسىز ساتىلعاندىعى بەلگىلى بولدى.

الماتى وبلىسىندا شەكتى سوماسى 1 382 تەڭگە بولاتىن «اسپيرين-كارديو» 3 500 تەڭگەگە، «زيتماك» 4 052 تەڭگەنىڭ ورنىنا 7 000 تەڭگەگە، ال «تسيپرولەت» 1 260 تەڭگەنىڭ ورنىنا 2 200 تەڭگەگە ساتىلعان.

«سونداي-اق، كەيبىر ءدارىحانالار كاسسالىق اپپاراتتاردى ادەيى وشىرەتىنى انىقتالدى. باتىس قازاقستان وبلىسىندا شەكتى قۇنى 118 تەڭگەلىك ماسكالار ءدارىحانالاردا 150 تەڭگەدەن ساتۋ فاكتىسى انىقتالدى. پاۆلودار وبلىسىندا ءدارىحانالاردىڭ بىرىندە ساتىپ الىنعان «پاراتسەتامول» ءبىزدىڭ ەلىمىزدىڭ اۋماعىندا تىركەلگەنىنە كۇمان تۋعىزدى. ويتكەنى ونىڭ قاپتاماسىندا مەملەكەتتىك تىلدە جازباسى جوق جانە مەديتسينالىق قولدانۋ جونىندەگى نۇسقاۋلىق بەرىلمەگەن. تۇركىستان وبلىسىندا «كلاۆام» پرەپاراتى 980 تەڭگە ورنىنا 1 680 تەڭگەگە ساتىلعان. سونداي-اق، اتالعان وبلىستا ءوز قىزمەتىن ءتيىستى رۇقساتسىز جۇزەگە اسىراتىن ءدارىحانا انىقتالدى»، - دەدى عانيجان اسانۇلى.

دەپارتامەنت باسشىسى بارلىق انىقتالعان فاكتىلەر بويىنشا ءتيىستى شارالار قابىلداۋ ءۇشىن ماتەريالدار ۋاكىلەتتى ورگاندارعا جولدانعانىن جەتكىزدى.

ايتا كەتەيىك، كەشە مەملەكەت باسشىسى ەلىمىزدە قالىپتاسقان احۋالعا بايلانىستى جاساعان تەلەۆيزيالىق ۇندەۋىندە ءدارى-دارمەك باعاسىن نەگىزسىز قىمباتتاتقاندار جازالاناتىنىن ەسكەرتتى.

بۇعان دەيىن اتىراۋدا ءدارى-دارمەكتى ون ەسە قىمباتقا ساتقان ەمحانا باسشىسى ۇستالعانىن حابارلاعانبىز.

سونداي-اق، الماتى پوليتسياسى جۇرگىزگەن رەيد بارىسىندا ءدارى-دارمەكتەردى جاپپاي ساتىپ الۋدى ۇيىمداستىرعان ەكى ادام ۇستالدى.

 

 

 

سوڭعى جاڭالىقتار