9 شىلدە, 16:39 553 0 جاڭالىقتار انار لەپەسوۆا

سىبايلاس جەمقورلىققا قارسى قىزمەت وكىلدەرىنەن قاشقان شەنەۋنىك وزەنگە سەكىرىپ كەتتى

الماتى وبلىسىنا قاراستى تەكەلى اۋدانى اكىمى اپپاراتىنىڭ باسشىسىنا قاتىستى سوتقا دەيىنگى تەرگەۋ باستالدى.

بۇل تۋرالى قر سىبايلاس جەمقورلىققا قارسى ءىس-قيمىل اگەنتتىگى 1-ءشى دەپارتامەنتتىڭ اسا ماڭىزدى ىستەر جونىندەگى تەرگەۋشىسى قايسار بارجاقسىنوۆ ايتتى، دەپ حابارلايدى قازاقپارات.

«ول «مۇگەدەكتەر قوعامى» قوعامدىق بىرلەستىگىنىڭ ديرەكتورىنان وڭىرلەردى دامىتۋدىڭ 2020 جىلعا دەيىنگى مەملەكەتتىك باعدارلاماسىن ىسكە اسىرۋ اياسىندا جۇرگىزىلىپ جاتقان تەكەلى قالاسىنىڭ اۋماعىن اباتتاندىرۋعا قاتىستىكەلىسىمشارت بويىنشا قوعامنىڭ قىزمەتىنە جالپى قامقورلىق كورسەتۋ ءۇشىن 1,5 ملن تەڭگە سوماسىندا پارا الۋ كۇدىگىنە ءىلىندى»، - دەدى تەرگەۋشى.

ونىڭ ايتۋىنشا، تەكەلى قالاسى اكىمى اپپاراتىنىڭ باسشىسىن اشكەرەلەۋ كەزىندە ول ءوز باسىن قاۋىپ-قاتەرگە تىگىپ، وقيعا ورنىنان جاسىرىنباق بولعان.

«ول وزەنگە سەكىرىپ، ونى ءجۇزىپ ءوتۋ ارقىلى جاسىرىنعىسى كەلگەن. سونىمەن بىرگە ءوزى وزەنگە اعىپ كەتە جازداعان. الايدا، ونى سىبايلاس جەمقورلىققا قارسى قىزمەتتىڭ قىزمەتكەرلەرى ۇستادى. قر قپك 201-بابىنا سايكەس وزگە اقپارات تەرگەۋ مۇددەسى ءۇشىن جاريالاۋعا جاتپايدى»، - دەدى قايسار بارجاقسىنوۆ.

 

سوڭعى جاڭالىقتار