9 شىلدە, 14:53 421 0 دەنساۋلىق انار لەپەسوۆا

الدا قازاقستاندىقتاردى 100 پايىز تەستىلەۋ مىندەتى تۇرعان جوق – الەكسەي تسوي

دەنساۋلىق ساقتاۋ جۇيەسىنىڭ الدىندا قازاقستاندىقتاردى 100 پايىز تەستىلەۋ مىندەتى تۇرعان جوق. بۇل تۋرالى  قر دەنساۋلىق ساقتاۋ ءمينيسترى الەكسەي تسوي مالىمدەدى. 

«تاعى دا قايتالاپ ايتامىن، قازىرگى ۋاقىتتا دەنساۋلىق ساقتاۋ جۇيەسىنىڭ الدىندا بارلىعىن 100 پايىز تەستىلەۋ مىندەتى تۇرعان جوق. ويتكەنى، وسى اۋرۋدىڭ العاشقى بەلگىلەرى بار تىكەلەي ناۋقاستارعا باسىمدىق جاسالىپ وتىر. سەبەبى، ولارعا كومەك كورسەتىپ، وسى كەزەڭدە ارەكەت ەتۋ ارقىلى ۆيرۋستىڭ اۋىر تۇرگە ءوتىپ كەتۋىنە جول بەرمەۋ نەگىزگى ماقساتىمىز»، - دەدى مينيستر.

الەكسەي تسويدىڭ سوزىنشە، كوروناۆيرۋستى سيمپتومسىز وتكەرىپ جاتقان ناۋقاستاردى تەستىلەۋدەن وتكىزۋدىڭ ءمانى جوق.

«سيمپتومسىز ناۋقاستاردىڭ كوپشىلىگى اۋىرمايدى. ءيا، ولار ىندەتتى تاراتۋى مۇمكىن. بىراق ولار 14 كۇننەن كەيىن ساۋىعىپ كەتەدى. ەشتەڭە مازالامايتىن ادامداردان تەست الۋدىڭ قانداي ءمانى بار؟ ءبىز نەگىزگى باسىمدىق پەن قارجىلاندىرۋدى ەڭ ءبىرىنشى كەزەكتە، كومەككە مۇقتاج بولىپ وتىرعان ناۋقاستارعا جۇمساعان دۇرىس دەپ سانايمىز»، - دەدى ۆەدومستۆو باسشىسى.

ايتا كەتەيىك، ەلىمىزدە قالىپتاسقان احۋالعا بايلانىستى جاساعان تەلەۆيزيالىق ۇندەۋىندە مەملەكەت باسشىسى قازاقستاندا پتر تەستىلەۋدەن ءوتۋ جيىلىگى تاۋلىگىنە 40 مىڭعا جەتكىزىلەتىنىن مالىمدەدى.

پرەزيدەنتتىڭ ايتۋىنشا، تەستكە قولجەتىمدىلىكتى ارتتىرۋ ءۇشىن قوسىمشا 20 پتر اناليزاتور ساتىپ الىنادى. پتر تەستىلەۋ ءۇشىن 8 ءموبيلدى ورتالىق قۇرىلادى.

 

سوڭعى جاڭالىقتار