9 شىلدە, 12:36 1646 0 دەنساۋلىق انار لەپەسوۆا

قازاقستاندا كارانتين مەرزىمى ۇزارتىلا ما – مينيستر جاۋاپ بەردى

ەلىمىزدە كارانتيندىك شەكتەۋلەر مەرزىمى ۇزارتىلا ما؟ بۇل سۇراققا ورتالىق كوممۋنيكاتسيالار قىزمەتىندە وتكەن بريفينگتە دەنساۋلىق ساقتاۋ ءمينيسترى الەكسەي تسوي جاۋاپ بەردى. 

«كارانتيندى ۇزارتۋعا قاتىستى ايتار بولسام، باستاپقىدا ۇسىنىس ەنگىزگەندە ازاماتتاردىڭ تىلەكتەرى ەسكەرىلدى. رەجيمنىڭ بيزنەس قوعامداستىقتارعا دا بارىنشا بەيىمدى بولۋى كوزدەلدى. دەگەنمەن، وسىناۋ ۆيرۋسقا شالدىعۋدىڭ كۇرت ءورشىپ كەتۋىن ەڭسەرۋگە سەپتىگىن تيگىزەتىن شەكتەۋ شارالارى دا قاراستىرىلدى»، - دەدى ۆەدومستۆو باسشىسى.

ءمينيستردىڭ ايتۋىنشا، ەنگىزىلگەن شەكتەۋ شارالارى كەلەسى اپتادا ءوز تيىمدىلىگىن كورسەتە باستايدى.

«قازىر ءبىز قانداي دا ءبىر ارالىق ناتيجەلەردى قاراپ وتىرمىز. دەگەنمەن، شىنايى تيىمدىلىگىن ەكىنشى اپتاعا قاراي نە بولماسا ءبىز باعالاۋ جۇرگىزگەننەن سوڭ بىردەن كورەتىن بولامىز. كارانتين اياقتالعاننان كەيىن ونىڭ ۇزارتىلاتىنى نەمەسە شارالاردىڭ قاتاڭداتىلاتىنى تۇسىنىكتى بولادى»، - دەدى الەكسەي تسوي.

ەسكە سالا كەتەيىك، ەلىمىزدەگى ەپيدەميولوگيالىق احۋالدى تۇراقتاندىرۋ ماقساتىندا 5 شىلدەدەن باستاپ 14 كۇنگە كارانتين ەنگىزىلدى.

سوڭعى دەرەك بويىنشا، قازاقستاندا كوروناۆيرۋس جۇقتىرعاندار سانى 53 مىڭنان اسىپ جىعىلدى. 35 مىڭنان استام ادام ىندەتتەن ەمدەلىپ شىقتى. 264 ناۋقاس كوز جۇمدى.

سوڭعى جاڭالىقتار