9 شىلدە, 10:57 512 0 قوعام انار لەپەسوۆا

نۇرتورە ءجۇسىپ: اماندىققا ەشتەڭە جەتپەيدى

كەشە قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ  حالىققا تەلەۆيزيالىق ۇندەۋ جاسادى. مەملەكەت باسشىسى  قازىر الەمدەگى پاندەمياعا بايلانىستى قالىپتاسقان جاعدايدىڭ وتە كۇردەلى ەكەندىگىن اتاپ ءوتتى.

الەم بويىنشا جانە قازاقستاندا كوروناۆيرۋستىڭ تارالۋى باسەڭدەمەي وتىر. كەيبىر ەلدەردە بۇل ىندەت قايتادان ۋشىعىپ بارا جاتىر. پرەزيدەنت «الەم بويىنشا وسى ۆيرۋستى جۇقتىرعانداردىڭ سانى شامامەن 12 ميلليونعا جەتتى، سونىڭ سالدارىنان 500 مىڭنان استام ادام قايتىس بولدى. سول سەبەپتى، بىرقاتار ەلدەردە  كارانتين ءتارتىبى قايتا كۇشەيتىلىپ، اۋە، كولىك قاتىناسى قايتادان شەكتەلدى. وكىنىشكە قاراي، ءبىزدىڭ ەلدەگى جاعداي دا وڭاي بولىپ تۇرعان جوق. مەملەكەتتىك كوميسسيانىڭ شەشىمىمەن 5 شىلدەدەن باستاپ ەلىمىزدە ەكى اپتالىق مەرزىمگە كارانتين شارالارى ەنگىزىلدى. بۇل اسا قاجەتتى شەشىم بولدى. جاعدايدىڭ تۇراقتالاتىنى ءسوزسىز. ونىڭ العاشقى بەلگىلەرى دە بار. سوندىقتان، الداعى ەكى اپتا ءبىزدىڭ بولاشاق قادامدارىمىز ءۇشىن شەشۋشى كەزەڭ بولماق. بارلىق ازاماتتاردى تاعى دا كارانتين ەرەجەلەرىن قاتاڭ ساقتاۋعا شاقىرامىن. ىندەتپەن كۇرەستىڭ ناتيجەلى بولۋى، ەڭ الدىمەن، بارشا جۇرتتىڭ سانالى ارەكەتى مەن جاۋاپكەرشىلىگىنە بايلانىستى»، - دەپ اتاپ ءوتتى.

ءبىزدىڭ ەلىمىزدەگى جاعداي قاتتى الاڭداتارلىق، ءتىپتى SOS دابىلىن قاعاتىن دەڭگەيگە جەتتى.كۇن سايىن الەۋمەتتىك جەلىدە قايتىس بولعان ازاماتتار تۋرالى قازاناما كوبەيدى. قايعى ارقالاعان اۋلەتتەر قاتارى ارتىپ بارادى. ەت جاقىن تۋىستارىنان ايرىلعان وتباسىلارعا كوڭىل ايتامىز.

پرەزيدەنت  «دەنساۋلىق ساقتاۋ جۇيەسى ىندەتكە تويتارىس بەرۋگە دايىن بولعان جوق. وسى ماسەلە بويىنشا ءبىز تەرگەۋ جۇرگىزەمىز جانە بۇل جاعدايدان ساباق الامىز. اكىمدەردىڭ جىبەرگەن قاتەلىكتەرىنە ءتيىستى باعا بەرەمىز»، - دەپ ماسەلەنى اشىق ايتتى.

مەملەكەت باسشىسى پاندەميامەن كۇرەسۋگە 150 ملرد تەڭگەدەن استام قارجى بولىنگەنىن ايتتى. مەملەكەت تاراپىنان بارلىق قاجەتتى شارالار قابىلدانىپ جاتقانى بەلگىلى. الايدا، بولىنگەن قاراجات قانشالىقتى ءتيىمدى جۇمسالىپ جاتىر؟ حالىق ءدارىحانادان قاراپايىم پاراتسەتومولدىڭ ءوزىن تاپپاي قينالىپ قالدى. بۇل تۇرعىدا قاتاڭ تەكسەرىس جاسالۋى كەرەك.

حالىقتىڭ دەنساۋلىعى – باستى بايلىق.

مەملەكەت باسشىسى  «ءار قازاق – مەنىڭ جالعىزىم» دەگەندەي، ءار ازاماتىمىزدىڭ قازاسى مەنىڭ جۇرەگىمە قاتتى باتادى. مىناۋ الاپات ىندەت ارامىزدان تالاي اسىلدارىمىزدى جۇلىپ اكەتۋدە. بۇگىندە قارا جامىلىپ وتىرعان ازاماتتاردىڭ قايعىلارىنا ورتاقتاسىپ، كوڭىل ايتامىن.  سول ءۇشىن 13 شىلدەنى – ۇلتتىق ازا تۇتۋ كۇنى دەپ جاريالايمىن»، - دەدى.

ادىلەتتى شەشىم.

بەيبىت زاماندا ەل-جۇرت قىناداي قىرىلىپ، قايعىدان قان جۇتىپ جاتىر. الەمدىك دەڭگەيدە ىندەت كەڭ تاراپ وتىر. ءبىزدىڭ ەلىمىزدەگى جاعدايدىڭ قانداي ەكەنىن ءبارىڭىز كورىپ ءبىلىپ وتىرسىزدار.

ەندىگى كەزەكتە بالا-شاعامىز بەن ءوز دەنساۋلىعىمىز ءۇشىن  جاۋاپكەرشىلىك الاتىن ۋاقىت جەتتى. «ىندەت جوق» دەگەن سوزگە سەنۋگە بولمايدى. ونىڭ قانشالىقتى قاۋىپتى ەكەنىن جان-تانىمىزبەن سەزىنىپ جاتىرمىز.

قازىر ازاماتتار وزىمەن ءوزى قالدى. قيىندىقتارمەن بەتپە-بەت ۇشىراسىپ، اركىم ءوز بىلگەن ارەكەتىمەن جان ساقتاۋعا ۇمتىلىپ جاتىر. وسى رەتتە پرەزيدەنتتىڭ «دارىگەرلەرىمىز بۇقارالىق اقپارات قۇرالدارى ارقىلى ازاماتتارعا ناقتى، ءبىرىزدى مالىمەت بەرۋى كەرەك. دەرتتى ەمدەۋدىڭ نەشە ءتۇرلى جولدارىن كورسەتىپ، ادامداردىڭ دەنساۋلىعىنا قاۋىپ توندىرۋگە بولمايدى. بۇنداي ارەكەتتەرگە توسقاۋىل قويۋ كەرەك. قىلمىستىق كودەكستىڭ 174-بابىنا سايكەس جالعان اقپارات تاراتقان ادام جاۋاپقا تارتىلادى. قۇقىق قورعاۋ ورگاندارى ەل ىشىندەگى وسىنداي جونسىزدىككە قاتىستى قاتاڭ شارالار قولداناتىن بولادى. سول سياقتى ءدارى-دارمەكتىڭ باعاسىن بىرنەشە ەسە ءوسىرىپ، قالىپتاسقان جاعدايدى ءوز ماقساتىنا پايدالانعىسى كەلگەن الىپساتارلاردى دا قۇقىق قورعاۋ ورگاندارى مەنىڭ تاپسىرماما سايكەس جاۋاپقا تارتا باستادى. قازىر مەملەكەتتىك ورگاندار ەلدى مەكەندەردى قاجەتتى ءدارى دارمەكپەن تولىق قامتاماسىز ەتۋدە. وسىعان وراي، ءتيىستى قور جاساقتالعان. توسەك ورىندارى دا، مەديتسينالىق قىزمەت كورسەتۋ ءىسى دە  تولىعىمەن قامتاماسىز ەتىلەدى» دەگەن سوزدەرى داتكە قۋات بەرگەندەي.

ءدارىحانالاردى قاجەتتى ءدارى-دەرمەكتەرمەن قامتاماسىز ەتۋ ماسەلەسى قاتاڭ قاداعالاۋدا بولۋى ءتيىس. الىپساتارلار مەن الاياقتاردىڭ جولىن كەسۋ قاجەت. قازاقستاننىڭ قۇقىق قورعاۋ ورگاندارى بۇل ماسەلەمەن جەدەل تۇردە اينالىسپاسا جاعداي ۋشىعىپ كەتۋى مۇمكىن.

مەملەكەت باسشىسى قاسىم-جومارت توقاەۆ قازاقستان حالقىنا ارناپ جاساعان ۇندەۋىندە بىرقاتار ناقتى  تاپسىرمالار بەردى. مۇنىڭ ءبارى ەڭ الدىمەن حالىقتى اسا قاۋىپتى ىندەتتەن امان ساقتاپ قالۋ ءۇشىن جاسالىپ جاتىر. سوندىقتان، وسىناۋ سىن ساعاتتا بارىمىزگە تاستاي جۇمىلىپ، الاپات ىندەتكە قارسى بىرىگىپ كۇرەسۋدەن باسقا امال جوق.

ءار شاڭىراق امان بولسىن!

ءار اۋلەت قارا جامىلماسىن!

اماندىققا ەشتەڭە جەتپەيدى!

 

سوڭعى جاڭالىقتار