9 شىلدە, 09:42 1125 0 قوعام انار لەپەسوۆا

ءدارىحانا باسشىسى تەكسەرۋگە كەلگەن دەپۋتاتتى سىرتقا قۋىپ شىقتى

الماتىدا ءدارىحانالار پرەپاراتتاردى ءوز باعاسىنان ەكى ەسە قىمباتقا ساتىپ جاتىر. بۇعان سىبايلاس جەمقورلىققا قارسى مونيتورينگ قىزمەتى كوز جەتكىزدى.

رەيد كەزىندە الەۋمەتتىك ارا قاشىقتىق ساقتالماعانى انىقتالدى. ءتىپتى ساعاتتاپ كەزەكتە تۇرعانداردىڭ ىزدەگەن دارىلەرى تابىلماي، بارى قىمبات باعاعا ساتىلىپ جاتىر، دەپ حابارلادى كتك.

توسىننان كەلگەن تەكسەرۋشىلەردى كۇتپەگەن مۇنداعىلار ءبىراز ابىگەرگە ءتۇستى. ءتىپتى ءدارىحانا باسشىسىنىڭ ءوزى سىناي كەلگەن قىزمەتكەرلەر مەن دەپۋتاتتى دالاعا الىپ شىقتى. ءسويتىپ، "تالاپقا ساي جۇمىس ىستەپ جاتىرمىز" دەپ تىراشتانعاندار ءدارى باعاسى بەكىتىلگەن قاعازدى كورسەتۋدەن باس تارتتى.

"جوق، رۇقسات بەرمەيمىن. بارلىعى جۇمىس ىستەپ جاتىر. كەزەككە تۇرىڭىز دا، باعاسىن ءبىلىڭىز. ءبىز تەك قالا اكىمدىگىنە باعىنامىز جانە تەك سولارعا ەسەپ بەرەمىز. ال سىزدەرگە مۇندا ايتىپ تۇرمايمىز".

ءدارىحانا باسشىلارىنىڭ رەيدكە كەلگەندەردى سىرتقا قۋىپ شىققانى بىلاي تۇرسىن، ءتىپتى جاي عانا ءدارىنىڭ باعاسىن ءبىلۋ ءۇشىن دە كەزەك كۇتۋ كەرەگىن ايتتى. ۇزىن-سونار كەزەكتە ساعاتتاپ تۇرۋعا تۋرا كەلەدى.

وسىلايشا ازەر دەگەندە ىشكە كىرگەن ماماندارعا "باعانى باقىلاۋدا ۇستاپ وتىرمىز، شەكتى باعادا شەكتەن شىقپادىق" دەيدى. سونداي-اق، مۇنداعى كەيبىر ءدارىنىڭ جوقتىعىنا حالىقتىڭ ءوزىن كىنالاپ وتىر.

"پاراتسەتامول 125 تەڭگە. سۋمامەد 5600, زيتماك 4900 تەڭگە. بۇل ايتىپ تۇرعان باعالارىم 500 مگ. تاميفليۋ 9990 تەڭگەدەن بولدى. بىراق قازىر جوق. گيپارەن دە جوق. سۇرانىستاعى دارىلەر كەلە سالىسىمەن، ءبىر-اق كۇندە تاۋسىلىپ كەتۋدە. ويتكەنى ادامدار كوپتەپ ساتىپ الادى دا، وزگەلەرگە جەتپەي قالادى", - ەپ ءتۇسىندىردى ءبولىم مەڭگەرۋشىسىنىڭ ورىنباسارى وكسانا Aليەۆا.

وسىلايشا دەرتىنە داۋا ىزدەگەندەر ءدارىحانالاردى كەزۋگە ءماجبۇر. تاڭەرتەڭنەن بەرى كۇن استىندا تۇرىپ كۇتكەندەردىڭ ىزدەگەنى تابىلماي،  ۋاقىتى زايا كەتۋدە.

"مىنە، بۇگىن ساعات 10-نان بەرى ءدارىحانا ارالاپ ءجۇرمىن. بۇل 15-ءشى ءدارىحانام. ورتالىق دارىحاناعا كەلىپ تۇرمىن. ەشقانداي ءدارى جوق. تەك پاراتسەتامول بار دەيدى. ىزدەگەن ءدارىمنىڭ ەشقايسىسى جوق. پاراتسەتامول ءۇشىن ءۇش ساعات بويى كەزەكتە تۇرمىن", - دەيدى قالا تۇرعىنى.

ەكىنشى ءدارىحانادا دا جاعداي ءدال وسىلاي. ۇزىن-سونار كەزەك. قاپتاعان قاراشا حالىق. مۇندا دا قاباعى قار جاۋعان باسشىلىق ءدارىنىڭ باعاسىنا شاڭ جۋىتپادى. ال سىناي بارعاندار ماسەلەنى بۇلاي قالدىرمايمىز دەپ اشۋلى.

"1800 تەڭگە تۇراتىن انتيبيوتيك قازىر 2600 تەڭگەدەن ساتىلىپ جاتقانىن بايقادىق. بارعان ءدارىحانالاردان دارىلەر باعاسىنىڭ بەكىتىلگەن قاعازىن سۇرادىق. بارلىعىندا جوق دەگەن جاۋاپ. دەمەك ءوز بەتىمەن باعا قويىپ، قىمباتقا ساتۋى عاجاپ ەمەس. بۇل جاعدايدى شۇعىل تۇردە وزگەرتىپ، شەشىمىن تابۋ كەرەك. ەندى اكىمدىك پەن ىشكى ىستەر مينيسترلىكتەرىنە رەسمي حات جولدايتىن بولامىز", - دەپ اتاپ ءوتتى پارلامەنت ءماجىلىسىنىڭ دەپۋتاتى يرينا سميرنوۆا.

 

سوڭعى جاڭالىقتار