8 شىلدە, 16:05 517 0 جاھان انار لەپەسوۆا

قىتايدان كەك الۋ: اقش-تا TikTok-تى قولدانۋعا تىيىم سالىنۋى مۇمكىن

اقش كوشباسشىسى دونالد ترامپ ءوز اكىمشىلىگى ەل اۋماعىندا TikTok قوسىمشاسىن قولدانۋعا تىيىم سالۋ ماسەلەسىن قاراستىرىپ جاتقانىن مالىمدەدى. اق ءۇي باسشىسىنىڭ ايتۋىنشا، بۇل – قىتايدان كوروناۆيرۋس پاندامياسى ءۇشىن كەك الۋ جولدارىنىڭ ءبىرى، دەپ جازادى Fortune.

– ءيا، ءبىز TikTok قوسىمشاسىنىڭ قولدانىسىنا تىيىم سالۋعا نيەتتىمىز. بۇل – ۇلكەن بيزنەس. پاندەميانىڭ اۋقىمىن كورىپ وتىرمىز. قىتايدىڭ ءبىزدىڭ ەلىمىزگە، بۇكىل الەمگە ىستەگەنى – سوراقىلىق، – دەدى ترامپ جۋرناليست گرەتا ۆان ساستەرەنگە بەرگەن سۇحباتىندا.

اقش پرەزيدەنتىنىڭ سوزىنشە، TikTok-قا تىيىم سالۋ – قىتاي بيلىگىنە «جاۋاپتى سوققى» بەرۋدىڭ كوپ ءتاسىلىنىڭ ءبىرى عانا.

ەسكە سالا كەتەيىك، بۇعان دەيىن ترامپ كوروناۆيرۋستى دەر كەزىندە اۋىزدىقتاي الماعانى ءۇشىن اسپان استى ەلىن جازالاۋدىڭ ءبىر نۇسقاسى رەتىندە قىتايمەن قارىم-قاتىناستى ءبىرجولا ءۇزۋدى ۇسىنعان.

اق ءۇي باسشىسىنىڭ ايتۋىنشا، بۇدان اقش-تىڭ ۇتارى كوپ بولماق. اقش كوشباسشىسىنىڭ ەسەبىنە سۇيەنسەك، قىتايمەن قارىم-قاتىناس ۇزىلسە، ۆاشينگتون 500 ملرد دوللار ۇنەمدەي الادى.

سوڭعى جاڭالىقتار