4 شىلدە, 16:17 827 0 جاڭالىقتار اسىل تۇمار

نۇر-سۇلتان قالاسىندا تابيعي گاز بەرىلدى

نۇر-سۇلتان قالاسىندا تابيعي گاز بەرىلىپ، العاشقى الەۋمەتتىك نىساندار مەن جەكە تۇرعىن ۇيلەرگە قوسىلدى، – دەپ حابارلادى قالا اكىمدىگىنىڭ رەسمي سايتى.

كوكتال-1 تۇرعىن ءۇي الابىندا «شاراپات» الەۋمەتتىك قىزمەت كورسەتۋ ورتالىعى، №29 مەكتەپ جانە بىرقاتار جەكە ۇيلەر گازعا قوسىلدى. تەحنيكالىق قوسىلۋ گاز تاراتۋ جەلىلەرىنىڭ جەكە ۇيلەر مەن عيماراتتاردى گازعا قوسۋعا دايىن ەكەندىگىن كورسەتتى.

باسقا تۇتىنۋشىلاردى قوسۋ ءراسىمى ىسكە قوسۋ-جوندەۋ جۇمىستارى اياقتالعاننان كەيىن جالعاسادى. وسىلايشا، جەلەزنودوروجنىي تۇرعىن ءۇي الابىندا گازبەن جابدىقتاۋ تاراتۋ جەلىلەرىنىڭ 96%-ى سالىندى. جەو-1/2, تۇرعىن ءۇي الاپتارىندا تىكەلەي ۇيلەرگە جەلىلەردى بۇرۋ بويىنشا جۇمىستار جۇرگىزىلۋدە.

«ەلوردا كۇنى قارساڭىندا ەرەكشە قۋانىشتى جاعدايدى اتاپ وتكەن ءجون. بىزگە كوگىلدىر وتىن كەلدى. پەش جاعىپ كورگەن جاندار عانا ءبىزدى تۇسىنەدى. قىستا اسپانىمىز تۇتىننەن كورىنبەيتىن. ەندى ءبارى وزگەرەدى. كوكتال تۇرعىندارى – نەگىزىنەن قارت ادامدار. ەندى ولارعا الدەقايدا جەڭىل بولادى، كومىر ساتىپ الۋدىڭ قاجەتى جوق» – دەدى كوكتال-1 تۇرعىنى گالينا انتونيۋك.

جەلەزنودوروجنىي تۇرعىنى ساۋلە ءجۇنىسوۆا ەلباسىنا تاريحي جوبا ءۇشىن العىس ايتتى: «تابيعي كوگىلدىر وتىنعا قوسىلۋ ءبىز ءۇشىن ۇمىتىلماس وقيعا».

ەلوردا اكىمى التاي كولگىنوۆ بيىلعى جىلىتۋ ماۋسىمىندا گاز تاراتۋ جەلىلەرى جەكە سەكتورداعى 8 مىڭ ۇيگە تارتىلاتىنىن اتاپ ءوتتى.

«گازداندىرۋ – تۇڭعىش پرەزيدەنتىمىزدىڭ تاريحي جوباسى. «بەس الەۋمەتتىك باستامانى» ءبىرى. ەلورداعا وتكەن جىلى 1 مىڭ شاقىرىم ماگيسترالدى گاز قۇبىرى تارتىلدى. گازداندىرۋ مەملەكەت باسشىسىنىڭ باقىلاۋىندا. بيىل ءبىز 8 مىڭ جەكە ۇيگە گاز تاراتۋ جەلىلەرىن سالۋدى جوسپارلاپ وتىرمىز. بۇگىن استانا كۇنى قارساڭىندا العاشقى الەۋمەتتىك نىساندار مەن ۇيلەر گازعا قوسىلدى. كوكتال 1,2, اگروگورودوك، پرومىشلەننىي، جەلەزنودوروجنىي جانە وڭتۇستىك-شىعىس اۋدانىندا اعىمداعى جىلىتۋ ماۋسىمىندا ءبىرىنشى كەزەڭدە گاز جۇرگىزىلەدى. سونداي-اق، جەو - 1/2 گازعا اۋىستىرىلادى»، – دەدى قالا اكىمى التاي كولگىنوۆ.

اكىمدىك قالا تۇرعىندارى ءۇشىن تەگىن ەسەپتەۋىشتەر ورناتۋدى قاراستىرۋدا. تۇرعىندارعا گاز تاراتۋ جەلىلەرىنە قوسىلۋ ءۇشىن پەش دايىنداۋ قاجەت. وندىرىستىك سەكتور مەن تۇرعىن ءۇي الاپتارىن گازداندىرۋ 3 كەزەڭدە جۇرگىزىلەدى.

ەكىنشى كەزەڭدە گاز ميچۋرينو، ينتەرناتسيونالنىي، كۇيگەنجار (1-2 پك), تەلمان (3-پك), پريگورودنىي، Garden Village جانە Family Village (4-پك) تۇرعىن الاپتارىنا وتكىزىلەدى. ءۇشىنشى كەزەكتە يلينكا (1-2-ءشى پك), شۇبار (3-ءشى پك), ءوندىرىس (4-ءشى پك) تۇرعىن الاپتارى گازداندىرىلاتىن بولادى. ىسكە اسىرۋ مەرزىمى - 2020-2023 جىلدارعا جوسپارلانعان.

ەلوردانى گازداندىرۋ قالاعا زياندى قالدىقتاردى 6 ەسەگە، قاتتى زاتتاردى – 40 مىڭ تونناعا دەيىن ازايتۋعا مۇمكىندىك بەرەدى.

سوڭعى جاڭالىقتار