2 شىلدە, 13:26 518 0 مادەنيەت ارايلىم بيمەنديەۆا

«اباي» وپەراسى ونلاين كورسەتىلەدى

«استانا وپەرا» جاز ايىندا TengriTV جانە تەاتر سايتى ارقىلى ونەرسۇيەر قاۋىمنىڭ نازارىنا 20-دان استام وپەرا، بالەت سپەكتاكلدەرى مەن كونتسەرتتەردى ۇسىنادى.

ونلاين كورسەتىلىمدەردىڭ رەپەرتۋارى ەرەسەكتەرگە، جاس كورەرمەندەرگە، بالالارعا دا لايىقتالعان. وسىلايشا، تەاتر مۋزىكاتانۋشىلارى مەكتەپكە دەيىنگى جانە مەكتەپ جاسىنداعى جەتكىنشەكتەردىڭ نازارىنا «بالالارعا ارنالعان كلاسسيكا»، «تەاترعا ساياحات» جانە «بالالار تەاترعا شاقىرادى» توپتامالارىن ۇسىنادى.

ال بالەت سپەكتاكلدەرى ەرەسەكتەر اۋديتورياسىن تاماشا كوڭىل-كۇيگە بولەيدى، اتاپ ايتقاندا، ولار «استانا وپەرا» بالەت ترۋپپاسىنىڭ كوركەمدىك جەتەكشىسى، رەسەيدىڭ حالىق ءارتىسى التىناي اسىلمۇراتوۆانىڭ قويىلىمىنداعى ليۋدۆيگ مينكۋستىڭ «دون كيحوت»، ادولف اداننىڭ «كورسار»، فريدەريك شوپەننىڭ مۋزىكاسىنا «شوپەنيانا» جانە ت.ب. اتاقتى حورەوگرافتاردىڭ قويىلىمدارىنداعى وزگە دە بالەتتەردى تاماشالاي الادى.

وپەرا جانرى ۇلتتىق جانە باتىس ەۋروپالىق كلاسسيكا جاۋھارلارى – ەۆگەني برۋسيلوۆسكيدىڭ «قىز جىبەك»، احمەت جۇبانوۆ پەن لاتيف ءحاميديدىڭ «اباي»، دجواككينو ءروسسينيدىڭ «جىبەك ساتى»، دجاككومو ءپۋچچينيدىڭ «توسكا» جانە ت.ب. وپەرالارىن ۇسىنادى.

«استانا وپەرانىڭ» باس ديريجەرى الان بورىباەۆتىڭ تەاتردىڭ ۇلكەن زالىندا جۇزەگە اسىرعان «يتاليادان كەلگەن حاتتار» جانە ديريجەر ابزال مۇحيتدين ىسكە اسىرعان «جىلدىڭ سەگىز مەزگىلى: انتونيو ۆيۆالدي مەن استور پياتستسوللا» جوبالارى شىلدە جانە تامىز ايلارىندا كورسەتىلەتىن بولادى. ترانسلياتسيالار قاتارىنا «استانا وپەرا» كامەرالىق زالىندا وتكىزىلگەن تاماشا كونتسەرتتەر دە قوسىلادى.

ۇلى ويشىل، اعارتۋشى، فيلوسوف اباي قۇنانبايۇلىنىڭ تۋعان كۇنى 10 تامىزدا كورەرمەندەر اۋديتورياسىنا ۇسىنىلاتىن احمەت جۇبانوۆ، لاتيف ءحاميديدىڭ «اباي» وپەراسى وسى جازدىڭ ەڭ ايتۋلى ونلاين وقيعالارىنىڭ ءبىرى بولماق.

ايتا كەتەتىن بولساق، TengriTV-ءدىڭ ديزاينى دا وزگەرگەن. قازىر ول پايدالانۋشىلار ءۇشىن اناعۇرلىم ىڭعايلى: ەندى بۇرىنعىداي ءبىر اپتاعا ارنالعان ترانسلياتسيالار كەستەسىمەن ەمەس، ءبىر ايلىق كەستەمەن تانىسۋعا بولادى. بۇدان بولەك، وقىرماندار وتكىزىلەتىن كۇنى مەن ۋاقىتى كورسەتىلگەن سۇيىكتى سپەكتاكلدەرىن تەز ءارى وڭاي تاۋىپ الۋلارى ءۇشىن وزدەرىنە «ۆيزۋالدىق كەستەنى» ساقتاي الادى.

سوڭعى جاڭالىقتار