2 شىلدە, 12:20 5270 0 قوعام انار لەپەسوۆا

5 شىلدەدەن باستاپ قانداي شەكتەۋ شارالارى ەنگىزىلەدى – ۇكىمەت شەشىمى

قر پرەمەر-ءمينيسترى اسقار ءماميننىڭ توراعالىعىمەن وتكەن مەملەكەتتىك كوميسسيا وتىرىسىندا قر پرەزيدەنتى قاسىم-جومارت توقاەۆتىڭ تاپسىرماسىنا سايكەس قازاقستانداعى ەپيدەميولوگيالىق احۋالدى تۇراقتاندىرۋ شارالارى قارالدى.

ەلدەگى سانيتارلىق-ەپيدەميولوگيالىق جاعداي جانە كوروناۆيرۋس ينفەكتسياسىنىڭ تارالۋىنا جول بەرمەۋ ماقساتىندا شەكتەۋ شارالارىن ەنگىزۋ بويىنشا ۇسىنىلاتىن شارالار تۋرالى دەنساۋلىق ساقتاۋ ءمينيسترى ا. تسوي باياندادى.

قازاقستاندا ەپيدەميولوگيالىق احۋالدىڭ ءورشۋىن جانە كوروناۆيرۋس ينفەكتسياسىمەن سىرقاتتانۋشىلىقتىڭ ءوسۋىن ەسكەرە وتىرىپ، مەملەكەتتىك كوميسسيا بيىلعى 5 شىلدەدەن باستاپ 14 كۇنگە كەلەسى شەكتەۋ شارالارىن ەنگىزۋ تۋرالى شەشىم قابىلدادى:

كولىك قاتىناسى بويىنشا:

1. ەلدەر ءتىزىمىن كوبەيتپەي، حالىقارالىق اۋە قاتىناسىن ساقتاۋ;

2. وڭىرلەر اراسىنداعى اۋە قاتىناسىن، تەمىر جول قاتىناسىن ساقتاۋ (شەكتەۋلەرمەن);

3. وڭىرلەر اراسىنداعى جولاۋشىلار اۆتوبۋسى قاتىناسىن ۋاقىتشا توقتاتۋ;

4. قوعامدىق كولىكتىڭ جۇمىسىن ۋاقىت بويىنشا شەكتەۋ.

ازاماتتاردىڭ ءجۇرىپ-تۇرۋى بويىنشا:

1. ويىن-ساۋىق، سپورت جانە باسقا دا بۇقارالىق ءىس-شارالاردى، سونداي-اق وتباسىلىق، ەسكە الۋ شارالارىن وتكىزۋگە تىيىم سالۋ;

2. اشىق اۋادا جاتتىعۋلار جاساۋعا رۇقسات ەتۋ;

3. تۇرعىنداردىڭ كوشەلەردە، ساياباقتاردا، سكۆەرلەردە 3 ادامنان ارتىق سەرۋەندەۋىن شەكتەۋ;

4. 65 جاستان اسقان ادامداردىڭ سىرتقا شىعۋىن شەكتەۋ.

مىنا نىسانداردىڭ قىزمەتىنە تىيىم سالۋ كەرەك:

  1. سۇلۋلىق سالوندارى، شاشتاراز، سپورت زالدارى، فيتنەس ورتالىقتار، باسسەيندەر، ازىق-تۇلىك جانە ازىق-تۇلىكتىك ەمەس جابىق بازارلار، جاعاجايلار، اكۆاپاركتەر، مادەنيەت نىساندارى، مۋزەيلەر، كورمەلەر، فورۋمدار، كونفەرەنتسيالار جانە وزگە دە ۇيىمداستىرىلعان بۇقارالىق ءىس-شارالار، ويىن-ساۋىق ورتالىقتارى، مەكتەپكە دەيىنگى بالالار مەكەمەلەرى (كەزەكشى توپتاردان باسقا), ءدىني نىساندار جانە ت. ب. (سوسو-داعى ويىن-ساۋىق ورتالىقتارى، ويىن-ساۋىق نىساندارى (كاراوكە، بيليارد، كومپيۋتەر كلۋبتارى، بوۋلينگ ورتالىقتارى), كينوتەاترلار، بالالاردى ساۋىقتىرۋ لاگەرلەرى، فۋدكورتتار، بانكەت زالدارى).
  2. مەملەكەتتىك ورگانداردىڭ (ۇيىمداردىڭ), كەڭسەلەردىڭ، ۇلتتىق كومپانيالاردىڭ جانە وزگە دە ۇيىمداردىڭ قىزمەتكەرلەرىنىڭ كەمىندە 80%-نىڭ قاشىقتان جۇمىس ىستەۋ رەجيمىن ساقتاۋ;
  3. الدىن الا جازىلۋ بويىنشا مەديتسينا ورتالىقتارىنىڭ قىزمەتىن ساقتاۋ;
  4. ءدارىحانالاردىڭ، ازىق-تۇلىك دۇكەندەرىنىڭ، اشىق بازارلاردىڭ قىزمەتىن ساقتاۋ;
  5. كۇشەيتىلگەن سانيتارلىق-دەزينفەكتسيالىق رەجيمدى ساقتاي وتىرىپ، كەلەسى نىسانداردىڭ قىزمەتىن ساقتاۋ: اشىق اۋادا قوعامدىق تاماقتانۋ نىساندارى; ۇزدىكسىز وندىرىستىك اينالىمى بار قۇرىلىس، ونەركاسىپ كاسىپورىندارى; اشىق اۋاداعى قۇرىلىس جۇمىستارى; اۋىل شارۋاشىلىعى، بالىق شارۋاشىلىعى جانە مال شارۋاشىلىعى جۇمىستارى; حالىققا قىزمەت كورسەتۋ سالالارى، ونىڭ ىشىندە اۆتو جۋ، اۆتوموبيلدەردى جانە تۇرمىستىق تەحنيكانى جوندەۋ، حقكو-لار، ەكىنشى دەڭگەيلى بانكتەر (ۋاقىت بويىنشا شەكتەۋ ەنگىزۋمەن).

ۇكىمەت باسشىسى ەلىمىزدەگى ەپيدەميولوگيالىق احۋالدىڭ الداعى ۋاقىتتا قالاي وزگەرەتىنىنە بايلانىستى اتالعان شەكتەۋ شارالارى 2 اپتاعا ۇزارتىلۋى نەمەسە قاتاڭداتىلۋى مۇمكىن ەكەنىن اتاپ ءوتتى.

جاڭا شەكتەۋ شارالارىن تالقىلاۋعا ورتالىق مەملەكەتتىك جانە جەرگىلىكتى اتقارۋشى ورگانداردىڭ باسشىلارى، قر پارلامەنتى ءماجىلىسىنىڭ دەپۋتاتتارى، «اتامەكەن» ۇكپ توراعاسى ا. مىرزاحمەتوۆ، قازاقستان كاسىپكەرلەرىنىڭ قۇقىقتارىن قورعاۋ جونىندەگى ۋاكىلەتتى ر. ءجۇرسىنوۆ جانە ت. ب. قاتىستى.

سوڭعى جاڭالىقتار