1 شىلدە, 12:02 405 0 جاڭالىقتار انار لەپەسوۆا

"جاس وتباسى" تۇرعىن ءۇي باعدارلاماسى ىسكە قوسىلدى

"قازاقستاننىڭ تۇرعىن ءۇي قۇرىلىس جيناق بانكى" اق 1 شىلدەدەن باستاپ وتباسىن جاڭادان قۇرعان جانۇيالارعا ءتيىمدى شارتتارمەن پاتەر الۋعا مۇمكىندىك بەرەتىن "جاس وتباسى" جاڭا تۇرعىن ءۇي باعدارلاماسىن ىسكە قوستى.

بۇل تۋرالى بانكتىڭ ءباسپاسوز قىزمەتى حابارلادى.

جاڭا باعدارلاما بويىنشا نەسيە مولشەرلەمەسى جىلدىق 6% تەڭ، ياعني، "نۇرلى جەر" باعدارلاماسى ۇسىناتىن مولشەرلەمەدەن 1%  عانا جوعارى. بۇل تەك العاشقى ەكى جىلداعى مولشەرلەمە كولەمى، ال ودان كەيىن ول 5% دەيىن تومەندەيدى.

باعدارلاماعا قاتىسۋ ءۇشىن ەرلى-زايىپتىلاردىڭ ءبىرى نەمەسە ەكەۋى "تۇرعىن ءۇي قۇرىلىس جيناق بانكىندە" "جاس وتباسى" دەپوزيتىن اشىپ، ءبىر جىل ىشىندە بولاشاق پاتەرلەرىنىڭ 50% جيناپ باعالاۋ كورسەتكىشىنىڭ "5-ءشى" دەڭگەيىنە جەتۋى كەرەك. دەپوزيتتى اشار كەزدە، ولاردىڭ نەكەگە تۇرعان مەرزىمى 3 جىلدان اسپاۋى ءتيىس (نەكەگە تۇرۋ تۋرالى كۋالىككە سايكەس).

قاراجاتتى جيناقتاۋ كەزىندە وعان جىلدىق 2% كولەمىندە بانك سىياقىسى مەن 20% مولشەرىندە جىل سايىنعى مەملەكەت سىيلىقاقىسى (200 اەك-تەن اسپايتىن سوماعا ەسەپتەلىنەدى) تۇسەدى. ەرلى-زايىپتىلار دەپوزيتتى ارقايسىسى ءوز اتىنا اشىپ، كەيىننەن شوتتاردى "وتباسىلىق پاكەتكە" بىرىكتىرۋ ارقىلى ەكى ەسە كوپ مەملەكەت سىيلىقاقىسىن الۋلارىنا دا بولادى.

"جاس وتباسى" باعدارلاماسىنىڭ تاعى ءبىر ارتىقشىلىعى – وعان قاتىسۋ بارىسىندا ەرلى-زايىپتىلاردىڭ جاس مولشەرى مەن وتباسىنداعى بالالار سانىنا نازار اۋدارىلمايدى.

باعدارلاما شارتتارىنا سايكەس، جاس وتباسىلار پاتەردى جاڭا جانە قولدانىستاعى ۇيلەردەن الا الادى. نەمەسە جەر تەلىمىن ساتىپ الىپ، ءۇي سالۋلارىنا دا بولادى. ولارعا زاەم 6 جىلدان 9 جىلعا دەيىنگى مەرزىمگە بەرىلەدى.

ء"اربىر جاس وتباسى تۇرعىن ءۇي جاعدايىن جاقسارتىپ، ءوزىنىڭ جەكە باسپاناسى بولعانىن قالايدى. جىل سايىن قازاقستاندا ورتا ەسەپپەن 152 مىڭنان استام ادام نەكەگە تۇرادى. ستاتيستيكالىق كورسەتكىشتەرگە سۇيەنەتىن بولساق، وتباسىنىڭ جەكە باسپاناسىنىڭ بولماۋى كوپ جاعدايدا ولاردىڭ اجىراسىپ كەتۋىنە سەبەپ بولۋدا. "جاس وتباسى" - جاقىندا عانا وتباسىن قۇرىپ، ءوز ارمانىن جۇزەگە اسىرعىسى كەلەتىندەر ءۇشىن تاماشا مۇمكىندىك", - دەپ اتاپ ءوتتى "تۇرعىن ءۇي قۇرىلىس جيناق بانكىنىڭ" باسقارما توراعاسى ءلاززات يبراگيموۆا.

بۇگىندە جاس وتباسىلاردى باسپانامەن قامتاماسىز ەتۋ - قازاقستانداعى ەڭ وزەكتى ماسەلەلەردىڭ ءبىرى. 2012 جىلدان 2017 جىلعا دەيىنگى 5 جىل ىشىندە ەلىمىزدە جاس وتباسىلار ءۇشىن باسپانا كوپتەپ سالىندى. وسى ورايدا، جاسى 29-عا دەيىنگى كەمىندە 2 جىل نەكەدە تۇرعان وتباسىلارعا باستاپقى جارناسىز، الداعى ۋاقىتتا ساتىپ الۋعا بولاتىن جالدامالى پاتەرلەر بەرىلدى. 2017 جىلى وسكەمەن قالاسىنداعى جاس وتباسىلار ءۇشىن دە ءدال وسىنداي مۇمكىندىكتەر ۇسىنىلدى.

سونىمەن قاتار، 2019 جىلعى قاڭتار ايىنىڭ باسىندا اتالعان باعدارلاما بويىنشا الماتى قالاسىنىڭ الاتاۋ اۋدانىنداعى "العاباس" جانە "سايالى" ىقشام اۋداندارىندا بولىنگەن 40 پاتەر بويىنشا قۇجاتتار قابىلداندى. الايدا بۇل جاس وتباسىلاردىڭ باسپانا ماسەلەسىن تۇبەگەيلى شەشە المادى. "جاس وتباسى" باعدارلاماسى رەسپۋبليكانىڭ بارلىق ايماقتارىندا تۇراقتى تۇردە جۇزەگە اسىرىلاتىن بولادى. ونىڭ شارتتارى وتە ءتيىمدى ءارى كوپشىلىككە قولجەتىمدى.

سوڭعى جاڭالىقتار