18 ماۋسىم, 19:29 847 0 دەنساۋلىق ارايلىم بيمەنديەۆا

ەلباسى ىندەتتەن تەز ارادا ايىعىپ كەتەتىنىنە سەنەمىز – زارەما شاۋكەنوۆا

زارەما شاۋكەنوۆا، قازاقستان رەسپۋبليكاسى پرەزيدەنتىنىڭ جانىنداعى قازاقستان ستراتەگيالىق زەرتتەۋلەر ينستيتۋتىنىڭ ديرەكتورى:

– بەلگىلى بولعانداي، وكىنىشكە وراي، قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىشۇلى نازارباەۆتىڭ دا كوروناۆيرۋسكە تاپسىرعان تەستى وڭ ناتيجە كورسەتكەن. قازىرگى تاڭدا ەلباسى وقشاۋلانىپ، قاشىقتىقتان ەل ساياساتىنا قاتىستى قىزمەتىن جالعاستىرۋدا. تۇڭعىش پرەزيدەنت – ەلباسى كەڭسەسى ءباسپاسوز قىزمەتىنىڭ حابارلاۋىنشا الاڭداۋعا ەش نەگىز جوق. ءوز تاراپىمىزدان ءبىز دە ەلباسىمىزدىڭ جاي-كۇيىنە ۇلكەن الاڭداۋشىلىق ءبىلدىرىپ، نۇرسۇلتان ءابىشۇلىنىڭ ءوزىنىڭ فيزيكالىق فورماسىنا، سپورتپەن شۇعىلدانۋعا ەداۋىر كوڭىل بولەتىندىگىن ەسكەرە وتىرىپ، بۇل ىندەتتەن تەز ارادا ايىعىپ كەتەتىندىگىنە سەنىم بىلدىرەمىز. ۇنەمى ەلىنىڭ مۇددەسى ءۇشىن ايانباي ەڭبەك ەتىپ كەلە جاتقان ەلباسىمىزعا زور دەنساۋلىق، قاجىماس قايرات، بيىك رۋح، اماندىق-ساۋلىق تىلەي وتىرىپ، جاسالىپ جاتقان ەمىنىڭ شيپا بولۋىنا، جۇقتىرعان دەرتتەن تەزىرەك ساۋىعىپ كەتۋىنە نيەتتەسپىز. وسى تىلەگىمىزگە بارشا قازاقستان حالقى قولداۋ بىلدىرەتىندىگىنە سەنىمدىمىز.

بۇگىنگى تاڭدا جاھاندىق ىندەتكە اينالعان Covid19 پاندەمياسىنىڭ قارقىنى ءالى دە باسەڭدەر ەمەس. گەوگرافيالىق تۇرعىدان 213 مەملەكەتتى قامتىپ، ۆيرۋسقا شالدىققاندار سانى 8,5 ملن ادامعا جەتىپ وتىر. قازاقستاندا دا كوروناۆيرۋس بويىنشا ستاتيستيكا كۇننەن كۇنگە ۇلعايىپ، قوعامنىڭ جانە بيلىك ورگاندارىنىڭ زور الاڭداۋشىلىعىن تۋدىرىپ وتىر. مەملەكەت تاراپىنان جاسالعان ىندەتپەن كۇرەسۋ شارالارى حالىقتىڭ اسقان جاۋاپكەرشىلىگىمەن ۇشتاسۋى قاجەت ەكەنىن سوڭعى ايلارداعى تاجىريبە انىق اڭعارتتى.

وسى ورايدا، عاسىر ىندەتىمەن كۇرەس، ونىڭ ەكونوميكالىق، الەۋمەتتىك، پسيحولوگيالىق سالدارىن ەڭسەرۋ ادامزاتقا بەرىلگەن ۇلكەن سىناق. بۇل سىننان سۇرىنبەي ءوتىپ، دامۋدىڭ جاڭا بەلەسىنە كوتەرىلۋ ءۇشىن قازاقستان حالقىنا اسقان توزىمدىلىك، بەرەكە-بىرلىك، ىنتىماق، جاقىندارىنا، قورشاعان ورتاعا دەگەن قامقورلىق كورسەتۋ، ايتىلىپ جاتقان كارانتين تالاپتارىن ساقتاۋعا بايلانىستى كەڭەستەرگە اسا مۇقيات بولۋ قاجەت.

سوڭعى جاڭالىقتار