4 ماۋسىم, 17:19 736 0 ءبىلىم ارايلىم بيمەنديەۆا

اسحات ايماعامبەتوۆ: وقۋلىقتاردى ساراپتاۋ جۇمىستارىمەن تەك تاۋەلسىز ماماندار اينالىسادى

2020 جىلدان باستاپ پەداگوگتەردى اتتەستاتتاۋ جۇيەسى جەتىلدىرىلىپ، بىلىكتىلىك ساناتتارىنا ءوتۋ بالدارىنا قويىلاتىن تالاپتار كۇشەيتىلدى. مۇنداي وزگەرىستەر جالاقىنىڭ ايتارلىقتاي وسۋىنە اسەر ەتەءدى. بۇل جونىندە ءبىلىم جانە عىلىم ءمينيسترى اسحات ايماعامبەتوۆ Facebook-تە تىكەلەي ەفيردە وتكەن حالىق الدىنداعى ەسەپتىك كەزدەسۋىندە مالىمدەدى.

«بيىلدان باستاپ وقۋلىقتاردىڭ ساپاسىنا قويىلاتىن تالاپتاردى كۇشەيتۋ تۋرالى بعم-ءنىڭ بۇيرىعى شىقتى. وقۋلىقتاردى ساراپتاۋ جۇمىستارىمەن تەك تاۋەلسىز ماماندار اينالىسادى. وقۋلىق اۆتورلارى مەن باسپالاردىڭ وقۋلىقتاردى ازىرلەۋدەگى جاۋاپكەرشىلىگى ارتتى. ەندى ساتىپ الىنعان وقۋلىقتاردا قاتەلەر انىقتالعان جاعدايدا، باسپالار بارلىق شىعىندى وزدەرى وتەيدى. اۆتورلار مەن ساراپشىلاردى وقىتۋ جۇمىسى قولعا الىنادى. سونداي-اق جەرگىلىكتى اتقارۋشى ورگاندارعا وقۋلىقتارمەن قامتاماسىز ەتۋ جونىندە قويىلاتىن تالاپتاردى كۇشەيتەمىز، 100% قامتاماسىز ەتۋ ءبىز ءۇشىن قالىپتى جاعدايعا اينالۋى ءتيىس»، – دەدى ءبىلىم جانە عىلىم ءمينيسترى.

ول سونداي-اق بۇگىنگى تاڭدا مەكتەپ وقۋشىلارىنىڭ 96%-ى جاڭارتىلعان ءبىلىم مازمۇنىنا كوشكەنىن، ال 11-سىنىپتار بيىل اۋىساتىنىن ايتتى. وسىلايشا، ۆەدومستۆو باسشىسى ورتا ءبىلىم بەرۋ جۇيەسىنىڭ جاڭارتىلعان ءبىلىم مازمۇنىنا كوشۋىن اياقتايتىنىن مالىمدەدى. ابايدىڭ 175 جىلدىق مەرەيتويى اياسىندا گۋمانيتارلىق پاندەردى تەرەڭدەتىپ وقىتاتىن اباي اتىنداعى مەكتەپتەر مەن مەكتەپ-ينتەرناتتار جەلىسىن قۇرۋ باستالدى. 10 وڭىردە وسىنداي مەكتەپتەر اشىلىپ، جىل سوڭىنا دەيىن تاعى جەتى مەكتەپ اشۋ جوسپارلانىپ وتىر.

پەداگوگتەردىڭ بىلىكتىلىگىن ارتتىرۋ جۇيەسى جەتىلدىرىلىپ جاتىر. پەداگوگتەردى وقىتۋ تاجىريبەلەرىن جاقسارتۋ ءۇشىن كۋرستان كەيىنگى مونيتورينگ پەن سۇيەمەلدەۋ ەنگىزىلدى. سونىمەن قاتار ماماندىق بويىنشا قايتا دايارلاۋ مۇمكىندىگى قاراستىرىلعان. جاس پەداگوگتەرگە ادىستەمەلىك قولداۋ كورسەتۋ ءۇشىن تالىمگەرلىك ينستيتۋتى ەنگىزىلى جاتىر. تاجىريبەلى پەداگوگتەردىڭ جۇمىسقا جاڭادان قابىلدانعان ارىپتەستەرىنە تالىمگەر بولعانى ءۇشىن اي سايىن 17 مىڭ تەڭگە كولەمىندە قوسىمشا اقى قاراستىرىلعان. بالالاردى ءبىرىنشى سىنىپقا قابىلداۋ جانە ءبىر مەكتەپتەن ەكىنشىسىنە اۋىستىرۋ جۇيەسى اۆتوماتتاندىرىلادى.

«ەندى اتا-انالارعا ءبىر مەكتەپتەن ەكىنشى مەكتەپكە بارىپ، قۇجاتتارىن قاعاز تۇرىندە تاپسىرۋدىڭ قاجەتى جوق. مۇنى ە-gov پلاتفورماسىندا جاساۋعا بولادى. بۇل اتا-انالاردىڭ ۋاقىتتارىن ۇنەمدەۋگە مۇمكىندىك بەرەدى. سونىمەن قاتار وقۋ جەتىستىكتەرىن سىرتتاي باعالاۋدى ترانسفورماتسيالاۋ جۇمىستارى جۇرگىزىلىپ جاتىر. 2021 جىلدان باستاپ 4 جانە 9-سىنىپ وقۋشىلارىنىڭ پاننەن العان بىلىمدەرىن باعالاۋعا ەمەس، فۋنكتسيونالدىق ساۋاتتىلىقتارىن انىقتاۋعا باعىتتالعان مونيتورينگ جۇرگىزىلەدى»، – دەدى ءبىلىم جانە عىلىم ءمينيسترى اسحات ايماعامبەتوۆ.

 

 

 

سوڭعى جاڭالىقتار