4 ماۋسىم 2020, 15:04 947 0 ءبىلىم انار لەپەسوۆا

اۋىل مۇعالىمدەرىنە جالاقى تولەۋ جۇيەسى وزگەرەدى

ەلىمىزدە اۋىل مۇعالىمدەرىنە جالاقى تولەۋ جۇيەسى وزگەرۋى مۇمكىن. بۇل تۋرالى Facebook جەلىسىندە حالىق الدىندا ەسەپ بەرۋ بارىسىندا قر ءبىلىم جانە عىلىم ءمينيسترى اسحات ايماعامبەتوۆ ايتتى.

«اۋىل مەن قالا اراسىنداعى الشاقتىقتى ازايتۋ ماسەلەسى ۇنەمى نازاردا. PISA رەيتينگى ارقىلى تەك اۋىل مەن قالا ەمەس، ءوڭىر مەن ءوڭىر اراسىنداعى ۇلكەن الشاقتىقتى كورىپ وتىرمىز. بۇل، ارينە، كەشەندى شارا قابىلداۋدى قاجەت ەتەدى. اۋىل مەن قالانىڭ قاشىقتىعىن ايتقاندا، ەڭ الدىمەن مۇعالىم تاپشىلىعى ماسەلەسى كورىنەدى. سوندىقتان، مەملەكەت باسشىسى ءتيىستى تاپسىرما بەرىپ، اۋىلدا ىستەيتىن مۇعالىمدەردىڭ جالاقى الۋ جۇيەسىن وزگەرتۋدى ۇسىندى. بۇل نەگە ماڭىزدى؟ ويتكەنى، ءبىلىم سالاسىندا ءبىر ستاۆكا - 18 ساعات. ال شاعىن جيناقتالعان مەكتەپتەردە 18 ساعات بولمايدى، ءبىر سىنىپ ەكىنشى سىنىپپەن قوسىلىپ وقيدى نەمەسە بالا سانى از. سوندىقتان دا، 4-6 ساعات ءۇشىن مۇعالىم اۋىلعا بارمايدى. مۇعالىم بولماعاسىن، ءبىلىم ساپاسى دا بولمايدى»، - دەدى مينيستر.

ايتا كەتەيىك، بۇعان دەيىن اسحات ايماعامبەتوۆ قازاقستاندا مەكتەپ ديرەكتورلارى مەن ولاردىڭ ورىنباسارلارى اتتەستاتسيادان وتكىزۋ ينستيتۋتى ەنگىزىلەتىنىن مالىمدەگەن.

 

سوڭعى جاڭالىقتار