4 ماۋسىم 2020, 12:58 689 0 زاڭ انار لەپەسوۆا

جاڭا زاڭ: پرەزيدەنتتىڭ وكىلەتتىگى تولىقتىرىلدى

Cەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سوعىس جاعدايى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى قابىلداندى. 

زاڭ جوباسىنىڭ نەگىزگى ماقساتى – سوعىس جاعدايى سالاسىنداعى زاڭنامانى جەتىلدىرۋ. بۇل ەلىمىزدە قاۋىپسىزدىككە تونەتىن قاتەرگە دەن قويۋ ءۇشىن مەملەكەتتىڭ قورعانىس الەۋەتىن قولداۋ قاجەتتىگىنەن تۋىنداپ وتىر.

زاڭ جوباسىمەن قازاقستان رەسپۋبليكاسىنىڭ ەڭبەك كودەكسىنە جانە «جۇمىلدىرۋ دايىندىعى مەن جۇمىلدىرۋ تۋرالى»، «مەملەكەتتىك قۇپيالار تۋرالى»، «سوعىس جاعدايى تۋرالى»، «قازاقستان رەسپۋبليكاسىنىڭ قورعانىسى جانە قارۋلى كۇشتەرى تۋرالى»، «ءبىلىم تۋرالى» جانە «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» زاڭدارىنا تۇزەتۋلەر ەنگىزىلەدى.

«ونىڭ ماقساتى – مەملەكەتتىڭ سوعىس جاعدايى كەزەڭىندە جۇمىس ىستەۋى، سونىمەن قاتار بەيبىت ۋاقىتتا وعان دايىندالۋ ماسەلەسىن قۇقىقتىق رەتتەۋ. اسىرەسە، «سوعىس جاعدايى تۋرالى» زاڭدا پرەزيدەنت وكىلەتتىگىن تولىقتىرۋ ۇسىنىلىپ وتىر. ول بەيبىت ۋاقىتتا ىسكە اسىرىلادى. بۇل سوعىس جاعدايى سالاسىن قولدانۋ ءتارتىبىن ايقىنداۋ، قارۋلى كۇشتەر جوعارعى باس قولباسشىلىعى ستاۆكاسى تۋرالى، قورعانىس كەڭەستەرى تۋرالى، سوعىس جاعدايى كەزەڭىندە ۇكىمەت قىزمەتىن ۇيىمداستىرۋ تۋرالى ەرەجەنى بەكىتۋ بولىپ وتىر»، - دەدى قر قورعانىس ءمينيسترىنىڭ ءبىرىنشى ورىنباسارى مۇرات بەكتانوۆ.

ودان باسقا ۇكىمەت قىزمەتى مىناداي وكىلەتتىكپەن تولىقتىرىلادى: بەيبىت ۋاقىتتا سوعىس جاعدايى كەزەڭىندەگى مينيسترلىكتەر تۋرالى ەرەجەنى بەكىتۋ، سوعىس جاعدايى كەزەڭىندە مەملەكەتتىك ورگاندى سوعىس ۋاقىتىنداعى شتاتقا كوشىرۋدى ۇيىمداستىرۋ، جەرگىلىكتى اتقارۋشى ورگانعا ازاماتتىق جانە اۋماقتىق قورعانىس سالاسىن قامتاماسىز ەتۋ مىندەتىن بەلگىلەۋ.

«سونىمەن قاتار، سوعىس جاعدايى كەزەڭىندە جەرگىلىكتى اتقارۋشى ورگاننىڭ وكىلەتتىگىن كوزدەۋ، ولارعا «وبلىستىڭ، رەسپۋبليكالىق ماڭىزى بار قالانىڭ، استانانىڭ قورعانىس كەڭەسىن» قۇرۋعا وكىلەتتىك بەرۋ ۇسىنىلادى. بۇل رەتتە قورعانىس كەڭەستەرى اسكەري باسقارۋ ورگانى رەتىندە سوعىس جاعدايى سالاسىنىڭ ورىندالۋىن قامتاماسىز ەتەدى. ولار تەك سوعىس جاعدايى كەزەڭىنە قۇرىلادى. سوندىقتان قارۋلى كۇشتەر قۇرىلىمىنا كىرمەيدى»، - دەپ ناقتىلادى ۆەدومستۆو وكىلى.

مۇنىمەن قوسا، «قورعانىس جانە قارۋلى كۇشتەر تۋرالى» زاڭعا قورعانىستى جوسپارلاۋ بويىنشا بىرقاتار تۇزەتۋ ەنگىزۋ ۇسىنىلدى. ولار جۇيەلى تۇردە، ياعني بارلىق باسقارۋ ۆەرتيكالى بويىنشا قارالدى. ءاربىر دەڭگەيگە ءتيىستى وكىلەتتىك پەن فۋنكتسيا ەنگىزىلەدى. بىرىنشىدەن، پرەزيدەنت وكىلەتتىگىن قورعانىستى جوسپارلاۋ قاعيداسىن بەكىتۋمەن تولىقتىرۋ ۇسىنىلادى. وندا جوسپاردىڭ قۇجاتتار جيناعى، مەملەكەتتىك ورگاننىڭ قۇجاتتى ازىرلەۋ قۇزىرەتى كوزدەلگەن.

«اسكەري قىزمەت تۋرالى» زاڭعا زاپاستاعى سەرجانتتى دايارلاۋ بويىنشا بىرنەشە تۇزەتۋ ەنگىزىلەدى. اسكەري رەزەرۆتى تولىقتىرۋ ماقساتىندا اسكەري كافەدرادا اقىلى نەگىزدە زاپاستاعى سەرجانتتى دايارلاۋ ۇسىنىلادى. «ءبىلىم تۋرالى» زاڭعا جوعارى ءبىلىم بەرۋ ۇيىمىنا وسى باعدارلاما بويىنشا اقىلى نەگىزدە زاپاستاعى سەرجانتتى دايارلاۋ وكىلەتتىگىن بەرۋ ارقىلى تولىقتىرۋ ۇسىنىلدى»، - دەدى قورعانىس ءمينيسترىنىڭ ءبىرىنشى ورىنباسارى.

 

سوڭعى جاڭالىقتار