2 ماۋسىم, 17:10 404 0 ايماق ارايلىم بيمەنديەۆا

تۇركىستاندا جاڭبىرلاتىپ سۋعارۋ تەحنولوگياسى ىسكە قوسىلدى

تۇركىستان وبلىسى اۋىل شارۋاشىلىعى باسقارماسىنىڭ باسشىسى نۇربەك بادىراقوۆ كوكتەمگى ەگىستىك جۇمىستارى تولىعىمەن اياقتالعانىن حابارلادى. ەگىستىكتى ءارتاراپتاندىرۋ ماقساتىندا ەندى ءداستۇرلى ماقتا، ماساق داقىلدارىن ازايتىپ، ولاردىڭ ورنىنا كوكونىس، مال ازىعى مەن مايلى داقىلداردى كوبەيتۋ قولعا الىنادى.

اتالعان سالادا ەڭبەك ونىمدىلىگىن ارتتىرۋ ءۇشىن جان-جاقتى تالداپ، ناقتى ناتيجە بەرەتىن 3 نەگىزگى باعىتتى دامىتۋ كوزدەلىپ وتىر. ەڭ الدىمەن، اگروقۇرىلىمداردى ىرىلەندىرە وتىرىپ، زاماناۋي وزىق تەحنولوگيالار ەنگىزىلگەن. بۇل باعىتتا تۇركىستان قالاسى اۋماعىندا ازىق-تۇلىك بەلدەۋىن قالىپتاسىرۋ اياسىندا جاڭبىرلاتىپ سۋعارۋ تەحنولوگياسى ىسكە قوسىلىپ، ناتيجەسىندە سۋسىز قۋراپ، بوس جاتقان جەرلەرگە سۋ كەلە باستادى.

«جاڭبىرلاتىپ سۋعارۋ تەحنولوگياسىنىڭ تيىمدىلىگىن ەسكەرە وتىرىپ، ەلىمىزدە كەڭىنەن ەندىرۋدى قاجەت دەپ سانايمىز. جاڭا تەحنولوگيا قويۋ كەرەك. بىلەكتى سىبانىپ وسىعان كىرىسۋ كەرەك. سالا ءۇش باعىتتا داميدى. ۇلكەن شارۋاشىلىق  جاساپ، نە ورتا شارۋاشىلىقپەن جىلىنا 2-3 ءونىم الۋعا بولادى. بولماسا، كىشىگىرىم  ءۇيدىڭ ىرگەسىندەگى جەردەن دە ءونىم الۋعا بولادى. كەيبىر اۋداندار بار، بوس جاتقان، نە تال جوق، نە ەگىس جوق. جۇمىس ىستەتۋ كەرەك، بوس جاتقان جەر قالماۋ كەرەك»، – دەدى اپپارات ماجىلىسىندە وبلىس اكىمى ومىرزاق شوكەەۆ.

وڭىردە 2-3 گا القاپتان جىلىنا 2-3 ءونىم الۋ جوباسىن ەندىرۋ ءوز ناتيجەسىن بەرىپ وتىر. جوبانىڭ تيىمدىلىگى – 1 گا جەردەن جىلىنا 6-7 ملن. تەڭگەگە دەيىن تابىس تابۋعا مۇمكىندىك بەرەدى. ءۇشىنشى باعىت – جەكە قوسالقى شارۋاشىلىقتاردىڭ اۋلاسىنا تامشىلاتىپ سۋعارۋ تەحنولوگياسىن ەندىرۋ ارقىلى ەرتە پىسەتىن كوكونىس، كارتوپ، باقشا ونىمدەرىن ءوندىرۋ. بۇل ءتاسىل – الەمدە اۋىل شارۋاشىلىعى ءونىمىن وندىرۋدەن، ەكسپورتتاۋدان ۇزدىك ەلدەردىڭ ءبىرى – يزرايل مەملەكەتىندە كەڭىنەن قولدانىلادى.

سوڭعى جاڭالىقتار