2 ماۋسىم, 12:59 431 0 جاڭالىقتار اسىل تۇمار

تالعار وزەنىندە بالىق نەگە قىرىلدى – قازگيدرومەت سىناما ناتيجەسىن ايتتى

قازگيدرومەت رمك الماتى وبلىسى تالعار وزەنىندە بالىق قىرىلعان وزەن سۋىنىڭ قورىتىندى تالداۋىن جاريالادى، – دەپ جازدى قازاقپارات.

باق-تا جانە «Facebook» جەلىسىندە الماتى وبلىسى بازاركەلدى اۋىلى جانىنداعى تالعار وزەنىندە بالىقتاردىڭ قىرىلۋى مەن سۋدىڭ قارايۋى تۋرالى تارالعان بەينەاقپارات بويىنشا 27 مامىردا «قازگيدرومەت» رمك قالالىق فيليالى زەرتحاناسىنىڭ ماماندارى 3 نۇكتەدە جوسپاردان تىس سۋ سىنامالارىن الدى.

«سۋداعى وتتەگى تۇتىنۋىنىڭ بيوحيميالىق تالداۋى 5 تاۋلىك بويى قالىپتى مولشەردە بولعان (0,8-1,0 مگ/دم3). ءبىرىنشى تالداۋ ناتيجەلەرى بويىنشا سۋ تەمپەراتۋراسى 25,1-26,4 ºC بولعان. سۋتەگى كورسەتكىشى 8,1-8,2, سۋدا ەرىتىلگەن وتتەگىنىڭ شوعىرلانۋى قالىپتى مولشەردە جانە 7,4-7,7 مگ/دم3 دياپازونىندا، ءتۇسى – 6-7 گرادۋس، مولدىرلىگى – 20 سم، ءيىسى – 1 بالل، تابيعي سۋعا ءتان ەمەس ءيىس (قي ءيىسى) سەزىلەدى»، – دەپ ءمالىم ەتتى «قازگيدرومەت» رمك.

ياعني سۋ قۇرامىندا ۋلى حيميالىق زاتتار جوق. ەسكە سالا كەتسەك، وسىعان دەيىن جەرگىلىكتى تۇرعىندار تالعار وزەنىندە بالىقتار قىرىلىپ جتاتقانىن ايتىپ دابىل قاققان. ەكولوگيالىق بەلسەندى ولگا گۋميروۆا ۆيدەونى Facebook پاراقشاسىندا جاريالادى.

قر ەكولوگيا، گەولوگيا جانە تابيعي رەسۋرستار مينيسترلىگىنىڭ ورمان جانە مال شارۋاشىلىعى كوميتەتىنىڭ ءباسپاسوز حاتشىسى ساكەن دىلداحمەتتىڭ ايتۋىنشا، 27 مامىردا الماتى وبلىسى قاپشاعاي قالاسى تەرريتوريالدىق ينسپەكتسياسىنىڭ مەملەكەتتىك ينسپەكتورلارى وقيعا ورنىنا بارىپ، تەكسەرۋ جۇرگىزگەن.

ودان بولەك سۋدىڭ ساپاسىن انىقتاۋ ءۇشىن «كازگيدرومەت» رمك قىزمەتكەرلەرى زەرتحانالىق سىناما الدى. وسىعان ۇقساس وقيعا الماتىدا 26 ناۋرىزدا بولعان ەدى. 28 پانفيلوۆشىلار پاركىندە 20-30 كەپتەر قىرىلىپ قالعان. قالا تۇرعىندارى قۇستار دەزينفەكتسيالىق زاتتاردان ۋلاندى دەگەن بولجام ايتتى. الايدا، ۇلتتىق رەفەرەنتتىك ورتالىق ماماندارى ولاردىڭ ولىمىنە قاتىستى شىعارعان قورىتىندىدا حيميالىق ۋلانۋدى جوققا شىعاردى.

«قۇس تۇماۋى، نيۋكاسل ىندەتى، وربيتوز، حلاميديوز، پاستەريوز سياقتى ينفەكتسيالىق اۋرۋلار جوق ەكەندىگى انىقتالدى. قۇستاردىڭ اعزاسىنان اۋىر مەتالل تۇزدارى، حلور تابىلمادى»، – دەدى ورتالىق ماماندارى.

سوڭعى جاڭالىقتار