1 ماۋسىم, 16:09 397 0 ايماق ارايلىم بيمەنديەۆا

«قورداي» وتكىزۋ بەكەتىنىڭ رەكونسترۋكتسياسى بيىل اياقتالادى

جامبىل وبلىسىندا قازاق-قىرعىز شەكاراسىنداعى «قورداي» وتكىزۋ بەكەتىن رەكونسترۋكتسيادان وتكىزۋ جۇمىستارى جالعاسىپ جاتىر. بەكەت كەلەسى جىلدان باستاپ تاۋلىگىنە 2 500 كولىك پەن 23 مىڭ ادامدى وتكىزە الادى.

جوبا ۇزىندىعى 137 مەترلىك 8 جولاقتى قوزعالىس بولىگىن، وتكىزۋ تەرمينالدارىن، باقىلاۋ-وتكىزۋ پۋنكتىن، شەكارا قىزمەتىنىڭ عيماراتى مەن وتكىزۋ بەكەتىنىڭ باسقا دا نىساندارىن قايتا جاڭارتۋدى قاراستىرادى. بۇدان بولەك، بيىل ماماندار تەكسەرۋ شارالارىن جىلدام جۇزەگە اسىرۋعا ارنالعان جاڭا ينسپەكتسيالىق تەكسەرۋ كەشەنىنىڭ قۇرىلىس جۇمىستارىن ورىندايدى. بۇگىنگى تاڭدا قۇرىلىس جۇمىستارىنا قاجەتتى تەحنيكانىڭ بارلىعى جۇمىلدىرىلىپ، قۇرىلىس ماتەريالدارى جەتكىزىلگەن. قايتا جاڭارتۋ جۇمىستارىنا 127 ادام مەن 15 تەحنيكا تارتىلدى. وتكىزۋ بەكەتىن رەكونسترۋكتسيالاۋ اۋدانى 3,5 گا.

جول-قۇرىلىس ماۋسىمى قىزعان شاقتا «قورداي» وتكىزۋ بەكەتى تەك جاياۋ جۇرگىنشىلەر ءۇشىن ساعات 6:00-دان 24:00-كە دەيىن جۇمىس ىستەيدى. اۆتوكولىكتەر كورشىلەس «قاراسۋ»، «سورتوبە» جانە «اۋقاتتى» بەكەتتەرى ارقىلى وتكىزىلىپ جاتىر. اتالمىش وتكىزۋ بەكەتتەرىنە كىرۋ جولدارى جاقسى جاعدايدا. بەكەتتەگى جوندەۋ جۇمىستارىن وسى جىلدىڭ سوڭىنا دەيىن اياقتاۋ جوسپارلانىپ وتىر.

سوڭعى جاڭالىقتار