31 مامىر, 11:41 964 0 جاڭالىقتار اسىل تۇمار

بۇگىن تۇندە الماتىداعى بلوكبەكەتتەر الىنادى – اكىم

سۋرەت - اكىمنىڭ ينستاگرام پاراقشاسىنان الىندى
سۋرەت - اكىمنىڭ ينستاگرام پاراقشاسىنان الىندى

الماتىدا 1 ماۋسىمعا قاراعان ءتۇنى قالا بويىنشا ورنالاسقان بارلىق بلوكپوستار الىنادى. بۇل تۋرالى قالا اكىمى باقىتجان ساعىنتاەۆ Instagram الەۋمەتتىك پاراقشاسىندا مالىمدەدى.

«1 ماۋسىمعا قاراعان ءتۇنى قالا اۋماعى بويىنشا ورنالاسقان بلوكپوستاردى الامىز. توتەنشە جاعداي رەجيمى كەزىندە بۇل بەكەتتەر قالادان شىعۋ جانە قالاعا كىرۋدى شەكتەدى. بۇل – كوروناۆيرۋستىڭ تارالۋىن توقتاتۋ ءۇشىن قاجەتتى شارا بولدى. بارلىق پوليتسيا، سانيتارلىق قىزمەت، فيتو جانە ۆەتباقىلاۋ قىزمەتكەرلەرىنە، اۋداندىق اكىمدىكتەر مەن ۇلتتىق گۆارديا، قورعانىس مينيسترلىگىنىڭ اسكەري قىزمەتشىلەرىنە العىسىمدى بىلدىرەمىن»، – دەدى ساعىنتاەۆ.

ونىڭ ايتۋىنشا، ەلدە، سونىڭ ىشىندە الماتىدا جاعدايدىڭ تۇراقتانۋىنا بايلانىستى شەكتەۋ الىنادى.

قالا باسشىسى بارلىق كاسىپورىندار مەن ۇيىمدار سانيتارلىق قاۋىپسىزدىكتىڭ كۇشەيتىلگەن شارالارى نەگىزىندە جۇمىس ىستەيتىنىن ەسكە سالدى. ۇيلەردى، اۋلا الاڭدارى مەن كوشەلەردى دەزينفەكتسيالاۋ جۇمىستارى جۇرگىزىلە بەرەدى.

«بەلگىلەنگەن تارتىپكە باعىنىپ، سانيتارلىق گيگيەنا مەن الەۋمەتتىك قاشىقتىقتى ساقتاپ، قورعانىس ماسكالارىن كيىپ جۇرۋگە شاقىرامىن. بۇل قازىرگى ءومىردىڭ قالىپتى نورماسىنا اينالۋى ءتيىس. ءوزىڭىزدى جانە جاقىندارىڭىزدى قورعاڭىز!»، – دەپ جازدى قالا اكىمى.

 

سوڭعى جاڭالىقتار